Eberewu 13 - Mazu Otchena a Mulungu

Jokokomeza para atu omuroromela Yesu

¹ Inafwanela zivelana wenyu wa ibali munna nyo mudowegenave sogolro.

² Kamuhiye awatchela alendo na makalelo apama. Tchoira malambo a mundulrimu muwari moawatchela alendo kohokalawo kaawatchenle angelro, kahaiziwaga.

³ Eto kamwaadiwalege ale anafwanyeya mukadeya. Mwaairelege upama muwari moumbuwela kalaga nnga na nyenne muli mukadeya vamohi na aliwa. Kamwadiwalege eto ale anaireliwa ubure vasayi mwasiwa na nyenne tambe muli atu okalawo na maningo.

⁴ Inafwanela nyo mwatene murihedege telana. Kakalevo unafuna takaliha mmba mwa aliba telana. Tchoira Mulugu unoatonga ale anahiya bandja niwa kadowaga mmohi muwa mwene nari ale anafwanyeyana mulandu oraruwa uli watene.

⁵ Polre polre tawiha ira munaze mukale atu oziveliwa kobiri. Mbwenye inafwanela muwande wonga ira: <<Peno miyo dili oziveliwene zela kana unna miyo.>> Inafwanela nikale eno mwasiwa Nabwiya ohowonga ira: <<Miyo kadiza duhiya. Nne kadiza dunyanyala.>>

⁶ Nona pa evale vanawanda hiyo wonga muwari mohokayikela ira: <<Nabwiya gu Nkamihedi waga. Miyo kannaova yengo ili yatene inadiirela atu!>>

⁷ Kamudiwalege mawendelo a andimuwinyu anno kauwandenleni mazu a Mulugu. Inafwanela eto mwahadiwale makalelo anafuna atu gomela zela mawendelo ewa, na nyenne musazihe nroromelo ninna atu.

⁸ Yesu Kiristu kanatchindjeya. Gu mmohive roma nzilo, pakana peno, ante sogolro kala no kala.

⁹ Kamupupuruwe muwari mohara jofundjiha jidjindji johiyana hiyana johokana sogolro. Tchoira ili yapama mmirimani mwa mutu mulimbihiwe muwari mwa sayi da Mulugu, hiyaniha no funa limbihiwa muwari moharihamo mangano owonga zela jodja. Tchoira mangano a jodja kinawanda mukamiheda wenno unalimbela ejo.

¹⁰ Hiyo nihikana ibuwa yehu. Mbwenye anamakuta anno analaba vaMusasani va Yehova wa ilambo ya vati kinawanda dja jodja jejo jinafwanyeya vaibuwani vehu.

¹¹ Eto fwanyeya ira mundimuwa wa anamakuta unotukula sangiri na anavinyama, liye dowa volowana mamburo otchenihiwa ira sangiri nne nikale mukuto okurumuwela jotega. Mbwenye anavinyama anavuvihiwa sangiri ale, anatumeyiwa unde wa kapamento.

¹² Nona Yesu na liyene eto ohoona goyi unde wa mulango ira aatchenihe atu muwari mwa sangiri naye.

¹³ Voira Yesu ohovilela muwari mopetiwa wapetiwa liye unde wa kapamento, na hiyene ndoweni nanfwanye unde wa kapamento, nawatchele petiwa umohive.

¹⁴ Tchoira mwilamboni ya vati hiyo kaninna sidadi ya mukalakala. Hiyo mbwenye nnavenda sidadi yenno inafuna za.

¹⁵ Nona inafwanela nivelelegeve mukuto wehu omutamalela Mulugu muwari mwa Yesu ora ili yatene. Mukutuwa ku wonga jowonga jehu na milomo dihu niromolege nzina naye.

¹⁶ Kamuhiye irana japama eto kamuhiye vahana jinna nyo. Tchoira mweragana eno, ejo jinafwanyeya jagali mikuto nnaziveliwa Mulugu.

¹⁷ Mwaavwelelege andimuwinyu eto murumelege tongiwa na aliwa. Tchoira aliwa banaing'anela minemba denyu nnga atu anafuna za tongiwa vamentoni va Mulugu zela mabasa kalabile atu. Musakanye ira aliwa kawande laba mabasiwa muwari mohagalala hiya muwari moona nyemela. Tchoira aliwa kaona nyemela, yenno mbwenye kinaupindulrani.

¹⁸ Hiyo nnawenda vamentoni va Mulugu mohokana kayikela zela jinera hiyo eto yofuna yehu ili ira niiregena jatene japamave. Nona nnafuna nuvepeni ira munilobelelege ira niwendege pama.

¹⁹ Eto miyo nnaukokomezani na ntindi ira muwaralihe lobela ira diwande za wa nyo akoka, mohodibeliwa.

Mazu ogomiheda

^20-21 Mulugu wa murendele unvenyihile mokwani Nabwiya wehu Yesu, Namakumbuza Mundimuwa wa mabila muwari mwa sangiri na yopangana yohomala auvaheni jatene japama jinafuneya ira nyo muwandege irana funa waye. Muwari mwa Yesu Kiristu, Mulugu anikamihedege irana jatene jili japama vamentoni vaye. Yesu Kiristu atamaleliwe kala no kala. Ame!

²² Miyo nnouvepani abalaga ira muvuruwane pama mazu a vang'ono okokomeza dulrembenleni miyo mukartani mu.

²³ Eto inafwanela muiziwe ira mbalihu Timoteyo umala kutchiwa. Liye aza wa miyo tchineneva, miyo dagundeyaga ira dize dupandeni, nnokala vamohi na liye.

²⁴ Nnoalondjela eto andimuwinyu atene na atu atene otchenihiwa kali wewo. Eto ale kakuma Italiya anoulondjelani.

²⁵ Sayi da Mulugu dikale na nyo mwatene muli wewo. Kukala mazu a karta nalrembiwele aEberewu omuroromela Yesu.