Eberewu 12 - Mazu Otchena a Mulungu

Makalelo ira atu omuroromela Yesu katamange korida ivahiwe atu

¹ Afwihu atene naawongile hiyo ala anafwanyeya kagali amboni oindjiva kanirindjile. Nona naona zela amboni adjindji ozela joira jiwa, inafwanela nitatile yengo ili yatene inaninyemela na jotega jejo jinanipitikelrelra, nitamange korida yenno ivahiwe hiyo.

² Nitamangege nimuing'anaga Yesu, wenno unafwanyeya agali maliba romiha nroromelo nehu eto maliba kwakwaneliheda nroromelo nehu, wenno avilenle akomeliwa vamuradini, alramwisaga nyaswa ozela piwa. Liye airagana eno, abalra ira: <<Dakomeliwa vamuradini, kahi yengo. Tchoira vasogolro hagalala unafuna miyo kana kahi ung'ono.>> Peno eto, ugarati nimburo na ibaribari, muwononi odjana, mpandoni wa Umwene wa Mulugu.

Yokokomeza ira nahagome

³ Mmuumbuwele wenno awandile vilela muwari mwa goyi daonihiwa liye na atu otega. Inafwanela muumbuwele jatene jeji ira mwahakale ovutene eto mwahawaheye.

⁴ Tchoira kondo inna nyo ira mugondjihe yotega, kamunawane ante mufiyeda vuvihiwa sangiri ninyu.

⁵ Kodi nyo muhudiwala mazu oukokomezani anno Mulugu auwandenleni liye nnga ahimaye? Tchoira Mazu anawonga ira: <<Mwanaga kulramwise jejo jinaulanga Nabwiya. Nne kutakaleliwe liye ausumululaga.

⁶ Tchoira Nabwiya unomulanga wenno unamuziveliwa liye. Eto unomuoniha goyi mwanaye uli watene umuwatchenle liye.>>

⁷ Mwalangiwaga, mukale atu ovilela. Mwasiwa Mulugu unoubalrani nnga ahimaye. Tchoira kalivo mwana ahanalangiwa na babaye.

⁸ Nona akala nyo kamunalangiwa nnga na makalelo analangiwa ana Mulugu atene, ku wonga nyo kamuli ahima a Mulugu. Muli ahima oraruwiwa.

⁹ Eto hiya yennove bahi, hiyo nihakana ababihu a mwilamboni ya vati anno kanibanle. Eto aliwa kanilangaga, hiyo noarihedetcha. Akala nnowanda ariheda ababihu, inafwanela niwande nvwelela Baba wo kalawo wehu na makalelo okwaranya makalelo nnaarihedetcha hiyo ababihu ira niwande kalawo.

¹⁰ Fwanyeya ira ababihu a mwilamboni ya vati kanilangetcha ora ya vang'ono na makalelo nnga mwaonela atu. Mbwenye Babihu Mulugu unanilangetcha para upama wehu ira niwande kala otchena nnga liye.

¹¹ Tchoira ora inalangiwa mutu, inakala nnga unaona upa. Kanaziveliwa. Mbwenye vasogolro mutu agafundjihiwe muwari molangiwa, langiwa wewo unomulaba ira mutule avahege misapo dapama dozana murendele.

¹² Nona inafwanela mulimbihe manda enyu ovuta na mabodo enyu ongurumela.

¹³ Musakanyede ndila yolinyareya para manyalo enyu ira mutu wenno unatchikama ahagwagwaduwe, mbwenye agomele vulumuwa.

¹⁴ Muzuzumele ira muwendege mwa murendele na atu atene. Muzuzumele eto ira muwende na makalelo otchena mwasiwa mutu wenne ahanakayena makalelo otchena kaza amuona Nabwiya.

¹⁵ Polre polre tawiha ira unakalevo mutu unaze ahafwanye sayi da Mulugu eto tawiha ira unaze akalevo mutu unafuna kala nnga mutchitchi owawa unafuna buwa muwari mwa nyo, amale avaha afwaye oindjiva makatamiho, aatakalihaga.

¹⁶ Eto polre polre tawiha ira muwari mwa nyo unakalemo mutu unagone na muhiyana nari mulombwana ahali waye. Kakalevo eto mutu oluluviha ja Mulugu nnga mulombwana Ezawu wenno agulihile undimuwa waye na parato imohi ya jodja.

¹⁷ Tchoira muhumala iziwa ira ora yafuna liye nnga avahiwe mareliho, liye ohokondihiwa na mwasa oira kavahanle tempu ira atwaruwe. Mbwenye masiki liye anlave akumihaga misodi ira awande twaruwa, tchawandeyile.

Umwene unafuna atu omuroromela Yesu watchela unokwaranya umwene ukungiwe mwango Siyawu

¹⁸ Nyo mwango mufiyile nyo kahi mwango owanda hindeya na manda wewo wali munlo na isi na utchi na nipevo,

¹⁹ vamohi no vweya wa palraza, na nizu nowonga. Atu kafiyile wewule ale, kagavwile nizu niwongaga, kohovepaga ira kahavwegeve.

²⁰ Aliwa eto kaova mazu a Mulugu oira: <<Masiki mwanainyama ahinda mwango ula, apiwe na mabwe.>>

²¹ Jengo jaireya wewule jali jowopiha, fiyeda mwezo Mozeji mwinnya liye wonga ira: <<Ii, miyo nnongurumela muwari moova.>>

²² Nyo mbwenye mufiyile mwango Siyawu, sidadi ya Mulugu Okalawo, Jeruzalemu wenno uli ilambo ya zulu wewo uli angelro ohowanda kontareya kagumanne muwari mohagalala,

²³ eto wewo unafwanyeya nikuru na arandji baliwa anno kalrembiwe zulu eto mufiyile wewo unafwanyeya Mulugu, Namatonga wa atene. Mufiyile wewo uli minemba da atu apama anno Mulugu aakwakwanelihedile liye.

²⁴ Mufiyile wa Yesu, mwinnya ukungile Yopangana Ixa. Mufiyile wewo uli sangiri niwokiwe nnawonga pama nohiyana na sangiri na Abeli.

²⁵ Polre polre tawiha ira munoza mmukonde wenno unawonga. Tchoira wanle atu anno kamukonda wenne aawendjeliha mwilamboni ya vati tchawandile wombowa. Ki eto nankonda mutu wa ilambo ya zulu unaniwendjeliha, nnafuna niwombowe avi?

²⁶ Tempu yovaha malamulo, nizu na Mulugu nohotika ilambo ya vati. Eto Mulugu ohowanda nivaha ibaribari ira: <<Ihala fendo imohiwa inafuna miyo tika ilambo ya vati. Mbwenye tika unafuna miyo tika kannagomela ilambo ya vati bahi. Nnotika ilambo ya vati vamohi na ilambo ya zulu.>>

²⁷ Navwa ira Mulugu ohowonga zela tika wanembinli, inafwanela niiziwe ira jatene jowanda tikeya, ku wonga jatene jopandutchiwa, jinoza jikumihiwemo, jimale dimela ira jihale ejo jahanawanda tikeya bahi.

²⁸ Mulugu univahile ira niwatchele umwene ohotikeya. Naona ira Mulugu uhuwanda nivaha umwene ohowanda tikeya, inafwanela nikale atu omutamalela Mulugu. Inafwanela nimutamalele na makalelo omuziveliha muwari momutitimiha eto muwari momuova.

²⁹ Tchoira Mulugu wehu gu munlo otolotcha.