Eberewu 11 - Mazu Otchena a Mulungu

Mabasa kalaba afwihu wanle muwari mwa nroromelo

¹ Nroromelo ku hawanganyeda jengo jinadediha hiyo vamohi no kana ibaribari zela jengo jejo jahanaona hiyo na meso.

² Tchoira muwari mwa nroromelo puzile andimuwa a wanle teteliwa na Mulugu.

³ Muwari mwa nroromelo hiyo nnowanda rumela ira zulu na ilambo ya vati jipandutchiwe muwari mwa Mulugu wonga, aliwa panduwaga. Ku wonga jatene jinaoneya jipandutchiwe muwari mwa yengo yohooneya na meso.

⁴ Mwa nroromelo Abeli ohovelela wa Mulugu mukuto ofuneyetchetcha hiyaniha na wa Kayini waye, fiyeda Mulugu liye mutetela nnga wapama, liye rumela jovelela jaye. Muwari mwa nroromelo naye bahi Abeli masiki agakwile, na vanove unowonga.

⁵ Mwa nroromelo mulombwana Inoki ohotukuliwa ira ahaone ukwa. Kaoneyile wadowile liye mwasiwa Mulugu gwamutukunle liye ahakwile. Ahanatukuliwe, liye ohoteteliwa ira ali mutu omuziveliwiha Mulugu.

⁶ Eto vahali nroromelo, kavali wandeya ira mutu airena yengo yomuziveliha Mulugu. Tchoira mutu ira awande mukwivela Mulugu, unaroma rumela ira Mulugu ukalawo eto unoatambilriha ale ananvenda.

⁷ Mwa nroromelo mulombwana Nowe agawandeliwe zela jengo jafuna za ireya, jejo ora yenno jali jahanaoneye, liye muwari momutitimiha no muova Mulugu, ohosema mwadeya ira liye na atu a vande vaye kavuluwe. Muwari moirana eno, Nowe ohagwihana mulandu atu atene kafwanyeya mwilamboni ya vati eto liye kala mutu oing'anela watchela upama wenno unazela muwari mwa nroromelo.

⁸ Mwa nroromelo mulombwana Abarahamu agaitaniwe ira avenye adowe ilambo imohiwa yafuna liye vahiwa, liye ohonvwelela Mulugu. Liye ohomaruwa ahaiziwaga wafuna liye dowa.

⁹ Muwari mwa nroromelo naye liye ohowanda dowa garati ilambo yenno Mulugu apanganne liye ira anvahe nnga mutu oza. Liye kamangile nyumbaye, mbwenye akala mmisasani vamohi na Izaki na Jako, anno kawatchenle nipangano nimohive.

¹⁰ Tchoira liye adediha ira avolowe sidadi yokana aliserisi, yenno ilrembelriwe eto imangiwe na Mulugu.

¹¹ Mwa nroromelo Sara eto ohovahiwa kopolo dowanda kana vambani eto ohowanda bala agamanle kwaranya idadi yobala. Tchoira liye ohomuroromela wenno amuroromelihile ira: <<Weyo unokana mwana!>>

¹² Abarahamu eto ora yenno alingana na mutu unafwanyeya agali okwene. Evale muwari mwa mulombwana mmohi olingana na mutu okwene puzile baliwa ahima oindjiva nnga nyenyedi da zulu eto ahima ohowanda kontareya nnga miseva da mutcherelani mwa bara.

¹³ Atu atene anna kohofiyeda kwa kahanawatchele jatene Mulugu apanganne liye. Mbwenye kakwileve na nroromelo niwa nene. So aliwa kaonne mapangano apanganne Mulugu olapela wene ati ati ati, aliwa ziveliwa eto aliwa rumelaga ira: <<Mwilamboni muno nili atu oza. Hiyo so nnafwanyeya nagali aliba vira.>>

¹⁴ Tchoira anne anafiyeda wonga eno, anowanda oniha ibaribari ira aliwa anavenda ilambo ira ikale waniwa.

¹⁵ Ahakale kaumbuwela ilambo yenno yakumile atu, kogowanda welelawo ora yenno.

¹⁶ Mbwenye ante na vanove aliwa kohokana yoing'anela ira kadowe kavolowe ilambo yapama kwaranya. Ilambo yenno inafwanyeya yagali ilambo yokumela zulu. Nona Mulugu aavwa atu anne kamuitanaga na nzina na Mulugu wehu, liye kananyaswa zela atu anno anawonga eno. Mwasiwa na liyene umala asasanyedela sidadi yewa ira kadowe kakalegemo.

¹⁷ Mwa nroromelo Abarahamu, Mulugu agawombezile nroromelo naye, ohowanda nvelela mwanaye Izaki mukuto. Liye ohonvelela mwanaye mmohive wenno anna liye, wenno Mulugu amusakanyilena liye nipangano.

¹⁸ Masiki Mulugu agawongile zela Izaki ira: <<Weyo nzina nawo nnoza nivweye mwa ahima unaabalege we muwari mwa Izaki>>, liye ohowanda nvelela.

¹⁹ Mwa enne Abarahamu ohowanda ona ira Mulugu unowanda nvenyiha mokwani. Eto molingana na mwemo mwaumbuwela liye, Abarahamu ohomuwatchela mwanaye mokwani.

²⁰ Mwa nroromelo mulombwana Izaki ohowonga mazu a sogolro amurelihaga Jako na Ezawu.

²¹ Mwa nroromelo mulombwana Jako, afunaga kwa ohareliha ana Joze ambinlene, agasamenle ikumbuzo yaye, liye mutamalela Mulugu.

²² Mwa nroromelo mulombwana Joze malambo aye kafunaga mala, ohowonga zela makumelo a Ana Izarayeli muIjipitu. Muwari mowonga zela makalelo kafuna aIzarayeli kuma Ijipitu, Joze ohowonga zela makalelo kafuna atu irana makuvaye kavenyagamo muIjipitu mule.

²³ Mwa nroromelo Mozeji agabaliwe, ababaye tchaovile nlamulo nakumihile mwene Farawu ira: <<Mwanapongwe abaliwa, apiwe.>> Mwa nroromelo, muwari moona ira: <<Mwanihu uhuriya>>, aliwa tchampile mbwenye kohomukoya medi miraru.

²⁴ Mwa nroromelo Mozeji agamanle ulukula, ohokonda itaniwa mwana Farawu mwanaye.

²⁵ Liye ohosakulra ira: <<Miyo nnafuna dionihiwe goyi vamohi na Mulugu atwaye hiyaniha no ziveliwa joziva ja jotega jejo jahanasusa.>>

²⁶ Liye ohowanda umbuwela ira: <<Zuzuma na mwasa wa Kiristu ku rayela kwaranya jorayela jatene jinafwanyeya muIjipitu.>> Tapulela liye aing'anela yotambilra yaye.

²⁷ Mwa nroromelo Mozeji ohokuma Ijipitu, ahaovaga uwali wa mwene. Liye ohowanda vilela mwa jengo jidjindji jene, kalaga nnga liye ohomuona wenno ahanaoneya.

²⁸ Mwa nroromelo Mozeji ohokwakwaneliheda mwemo mwafunela Mulugu zela Pwando ya Mavirelo, eto zela zoliha sangiri ira maliba atolotcha arandji baliwa ahaafwanye arandji baliwa a aIzarayeli.

²⁹ Mwa nroromelo aIzarayeli koholambuwa Bara Yofila kawendaga vazulu va teya youmma. Mbwenye aIjipitu kafunaga lambuwa nnga mwavirile afwiwa, aliwa kohokwa mmahindjeni.

³⁰ Mwa nroromelo aIzarayeli kagamanle werewera sidadi ya Jeriko malambo matanu na menli, miru da sidadile dohogwa.

³¹ Mwa nroromelo puta Rahabi kakwile vamohi na aJeriko afwaye anne kahanvwelela Mulugu. Mwasiwa liye ohawatchela anamawendelela na makalelo apama.

³² Kodi nnafuna diwendjede nni? Tchoira kadinna tempu ira diwongegeve zela Jideyawu na Baraki na Samisawu na Jefite na Davi na Samuweli na anamafiyiheda.

³³ Tchoira atene anno mwa nroromelo kohogondjiha maumwene, aliwa venyiha matongelo a ibaribari mwilamboni, aliwa fiyeda watchela mapangano, aliwa eto kohofunga milomo da apodogoma,

³⁴ kohotimiha kopolo da munlo, kohotawa irwa wa supada. Siku naligi atu ovuta, kohovahiwa kopolo, kohokana kopolo dilukulu kawanaga kondoni, kohotamangiha makuru a anyakondo a vilambo da unde.

³⁵ Ahiyana okweliwa kohawatchela anokwa ewa anno kavenyile mokwani. Mwa nroromelo amohiwa kohoonihiwa goyi eto kohokonda kutchiwa ira kawande venya muwari mwa ingumi imohiwa yapama kwaranya ingumi ya ilambo ya vati ila.

³⁶ Amohiwa kohoonihiwa goyi muwari mopetiwa no waxuliwa fiyeda mangiwa na makurenti, aliwa tatileliwa mukadeya.

³⁷ Amohiwa kohopiwa muwari movokiwa mabwe. Amohiwa kohogwadiwa vari na saroti. Amohiwa kohopiwa na supada. Amohiwa kawendawenda kagawarile matembe a mabila na matembe a mbuzi. Kawenda osimelene, ozuzumene, oireliwa jengo pwi johofwanela.

³⁸ Amohiwa kawendawenda muisalesaleni, amohiwa mmwangoni na mpawoni na mmafukweni a mwilamboni ya vati. Fwanyeya ira afwiwa a mwilamboni a tempu yenno tchali ofwanela ira kawendege mwilamboni ya vati imohive na aliwa.

³⁹ Atene anna kohoteteliwa na mwasa wa nroromelo newa. Mbwenye kagali mwilamboni ya vati, tchawatchenle nipangano neno Mulugu awonga liye.

⁴⁰ Tchoira Mulugu ohelavo zelru ira aliwa kibaranyede kana jatene mokwakwanela. So mbwenye Mulugu apanganne ira anigumanihe hiyo atene, a wanle na a tchineneva, amala ora yenno imohive anikwakwanelihede hiyo atene.