Eberewu 10 - Mazu Otchena a Mulungu

Mukuto wa Yesu gu mukuto okwaranya mikuto davelela atu mwilamboni ya vati

¹ Muwari mwa malamulo munafwanyeya nfulri bahi wa jengo japama jinafuna za sogolro. Mbwenye malamulo kahi jengo japama jiwa jinatonyihediwa muwari mwa nfulri. Nona malamulo tchawanda akwakwaneliheda atu anne kamukwivela Mulugu ira kamutamalele muwari mwa mikuto, masiki aliwa kavelelege mikuto dimohive kada yaka.

² Ahakanlege nnga mikuto diwandaga muhuwa mutu, kadaveleliwegeve yaka datene. Tchoira aliba mutamalela Mulugu kamala velela fendo imohi bahi kogokala apamene. Tchakanave yokumbanya bure zela jotega jiwa jile.

³ Eto fwanyeya ira yaireya kahi yenno. So mbwenye mikuto dedo dalaba ira mutu awumbutchediwe zela jotega jaye yaka ili yatene.

⁴ Tchoira kavali wandeya ira sangiri na ng'ombe na sangiri na mbuzi niwatchele jotega.

⁵ Voira sangiri na anavinyama kannawatchela jotega, nona pa evale vazile Kiristu mwilamboni ya vati, awongaga na Mulugu ira: <<Nyo kamufunne mikuto da vinyama na jovelela. Mbwenye nyo muhudisakanyela maningo.

⁶ Kamuziveliwile jovelela jotumeya nne jovelela jowatchela jotega.

⁷ Miyo eto dohowonga ira: <Mulugu kaing'anani miyo dili vano. Miyo dizile ira diiregena jofuna jenyu nnga mwalrembiwele atu mMazuni zela miyo.> >>

^8-9 Yesu agawongile ira: <<Nyo kamufunne mikuto nne jovelela nne vinyama jotumeya nne jovelela jowatchela jotega>>, ohowendjedave liye ira: <<Kavwani. Miyo dizile ira diirena jofuna jenyu.>> Fwanyeya ira mikuto datene edile dairiwana nnga mwemo mwawongela malamulo. Eto kadakwakwana ira mutu aleveleliwe. Nona pa evo Mulugu vamalihile liye makalelo oroma ira akunge makalelo maxa.

¹⁰ Muwari mwa Yesu Kiristu za irana jofuna ja Mulugu, liye za vivelelaga maningo aye fendo imohi eto fendo yogomiheda, pa evo vawandile hiyo tchenihiwa.

¹¹ Muwari mwa Yopangana ya Wanle, malambo matene anamakuta anadowa imela vamabasani viwa, aliwa velelaga mikuto dimohive dedo dahanawanda maliha jotega.

¹² Mbwenye Kiristu avelenle mukuto mmohi, fendo yoroma eto fendo yogomiheda. Agamanle velela mukuto waye, liye dowa garati nimburo na muwononi odjana wa Mulugu,

¹³ liye dedihaga ora yenno Mulugu unafuna liye ahela amwidanaye ira kakale nnga yengo yonyingalihavo manyalo aye.

¹⁴ Tchoira muwari mwa mukuto mmohive wenno, liye uwanda akwakwaneliheda para tempu datene atu anno anatchenihiwa.

¹⁵ Munemba Otchena eto unohidedela umboni vamentoni vehu awongaga ira:

¹⁶ <<Miyo dagali Nabwiya nnowonga ira malambo a Yopangana ya Wanle kagamanle, nnoza disakanye Yopangana Ixa na aliwa. Yopangana Ixa inafuna miyo sakanya dagali Nabwiya tchi ila: Miyo nnotukula malamulo aga, divolotchihe mmirimani mwewa. Nnoza dilrembe malamulo aga mmuruni mwewa.>>

¹⁷ Eto ohowendjeda ira: <<Miyo eto kadiza diumbuwelave jotega jiwa na joviringaniha jiwa.>>

¹⁸ Jotega jile jagamanle leveleliwa, kavali velela mukuto mmohiwa ofuna levelela jotega.

Jokokomeza zela makalelo anafuna hiyo wenda nagatchenihiwe

¹⁹ Nona abalaga, muwari mwa sangiri na Yesu, hiyo nnowanda volowa mamburo otchena molimbiha murima.

²⁰ Yesu ohula ndila ixa ya ingumi para hiyo. Yesu muwari mwa ukwa wa maningo aye, liye ohula ndila kurtinani ira nivolowe wa Mulugu.

²¹ Hiyo eto nihikana namakuta mundimuwa, wenno unasogolrelra jatene jene jili vande va Mulugu.

²² Na mwasa wa jatene eji, inafwanela nimukwivele Mulugu mohokana yowanganyeda mmirimani mwehu, mokana nroromelo nolimba, mokana mirima dapama mowokiwa sangiri ira nahakayena jowanganyeda jotakala eto nimukwivele Mulugu muwari mokana maningo ohuwiwa na mahindje otchena.

²³ Inafwanela nihidede pama yodediha inarumela hiyo vatando muwari mohodenguma. Mwasiwa wenno univahile nipangano naye gororomeleya.

²⁴ Inafwanela eto niumbuweleni makalelo anafuna hiyo kokomezana zela zivelana eto zela irana japama

²⁵ eto nahalramwisege gumana wehu nnga vinalramwisa atu amohiwa. Hiya lramwisa gumana wehu mbwenye inafwanela nilimbihanege mmohi na nfwaye. Eto simbwasimbwa tempu inaona hiyo ira: <<Siku nnafuna liye wela nnanikwivela.>>

²⁶ Tchoira nadowave sogolro nitegaga komove nagamanle wandeliwa mazu a ibaribari, kavihanle mukuto mmohiwa unafuna rumelela jotega jejo.

²⁷ Kilivo imohiwa inafuna hiyo dediha. So nnadedihege tongiwa wohokala wa masika wa Mulugu na munlo mulukulu wenno unafuna atolotcha amwidanaye bahi.

²⁸ Fwanyeya ira yavweya na amboni araru owu hehi ambinli ira: <<Udje utatila malamulo a Mozeji mmambalo>>, mutu wenno unopiwa mohowendeliwa tangaranga.

²⁹ Akala eno, nnga ikalele mutu wenne umulramwisile Mwana Mulugu eto uwesile sangiri na yopangana neno nimutchenihile nnga yengo yohokana mabasa eto unna mulandu omutakaliha Munemba Otchena wenno unazana sayi da Mulugu, ki mutu wenno tongiwa waye unaza ukale avi?

³⁰ Tchoira hiyo nihimuiziwa wenno uwongile ira: <<Weliha kunyakunya kwaga. Miyo nnomuweliheda kada mutu zela mabasa alabile liye.>> Inakala nnga ilrembiwe mMazuni ira: <<Nabwiya unoatonga atwaye.>>

³¹ Gwana milandu mmandani mwa Mulugu Okalawo tchi yengo yowopiha.

³² Nyo eto kamudiwale ira malambo mwaromile nyo onelramo ibaribari, mohowanda vilela muwari mwa makatamiho madjindjene ozela onihiwa goyi.

³³ Malambo amohiwa nyo moruwaniwa eto moireliwa makalelo ohokala pama vatando vene. Eto malambo amohiwa nyo modowa gumanela na ale kaireliwa makalelo mamohive anno.

³⁴ Nyo mowanda awendela tangaranga ale kavokediwe mukadeya. Nyo eto mowanda hagalala muwari mowakiwa jengo janna nyo. Tchoira nyo mohokana ibaribari ira: <<Ja ilambo ya vati jiwakiwe hiyo kahi yengo. Tchoira nnoza niwatchele yengo yapama kwaranya jiwakiwe hiyo eto inafuna hiyo kana tchi yengo yohomala.>>

³⁵ Mwagairilena jatene japama jile, kamutatile yodediheda inna nyo. Tchoira muwari mwa yodediheda inna nyo, muhukana yengo ilukulu inafuna nyo za tambilra sogolro.

³⁶ Inafwanela mukale atu ovilela muiragana funa wa Mulugu. Tchoira mwavilela, mwagairilena yofuna ya Mulugu, munoza muwatchele yenno Mulugu ipanganne liye ira auvaheni.

³⁷ Tchoira mazu anawonga ira: <<Ihanle tempu ya vang'ono. Wenno unafuna za unoza tchineneva eto kanadibeliwa.

³⁸ Mbwenye mutu wenno uli wapama unokana ingumi mowenda na nroromelo. Eto awelela mundulri, miyo kannakana ziveliwa zela liye.>>

³⁹ Hiyo mbwenye kanili muwari mwa anno anawelela mundulri ira katolotchiwe. Hiyo nili muwari mwa ale kanna nroromelo. Muwari mwa nroromelo ninna hiyo, nnowanda koya kalawo wehu.