Eberewu 1 - Mazu Otchena a Mulungu

Yesu Mwana Mulugu goakwaranya angelro

¹ Wanle Mulugu ohowonga na makolo ehu fendo didjindji dene na makalelo ohiyana-hiyana muwari mwa anamafiyiheda.

² Mbwenye malambo ogomiheda ala, Mulugu unawonga na hiyo muwari mwa Mwanaye wenno amuhambihile liye ira akale mwinnya wa jatene. Mulugu eto apandutchile jatene muwari mwa Mwanaye wenno.

³ Ule umuonne Mwanaye, umala ona undimuwa unna Mulugu. Mwanaye wenno eto unafwanyeya agali Mulugu. Muwari mowonga mwaye wa kopolo bahi, liye unnave sogolrelra ilambo ya zulu na ilambo ya vati. Agamanle nikwela muwari mohuwa jotega jehu, liye ugarati zulu muwononi odjana wa mpando wa Wenno unna Undimuwa.

⁴ Unakala wewo mwasiwa liye peno goakwaranya angelro, sawasawa nnga liye eto uhuvahiwa nzina nokwaranya mazina kavahiwe angelro.

⁵ Tchoira Mulugu kawongile na mungelro uli watene mazu olingana na anno awongile liye na Mwanaye. Tchoira Mulugu ohowonga na Mwanaye ira: <<We uli Mwanaga. Miyo peno duhubala.>> Eto Mulugu ohowonga zela Mwanaye bahi ira: <<Miyo nnokala Babaye. Liye unokala Mwanaga.>>, hiya angelro.

⁶ Eto vazulu viwa, Mulugu amuzagana Mwana Murandji mwilamboni ya vati, unawonga ira: <<Miyo dagali Mulugu nnafuna angelro aga atene kamutamalele Mwanaga.>>

⁷ Eto zela angelro, mMazuni muhulrembiwa ira: <<Mulugu usakanya ira angelro kakale nnga nipevo eto kakale anamalabaye okala nnga nlumi na munlo.>>

⁸ Mbwenye zela Mwanaye, mMazuni muhulrembiwa ira: <<Nyo Mulugu [Mwana], mpando wenyu wa umwene gwa mukalakala. Nyo munatonga muUmweneni mwenyu na makalelo okwakwanela.

⁹ Nyo munoida ubure eto munoziveliwa upama. Nona Mulugu [Baba] wenno uli Mulugu wenyu auhambihani na makura ohagalala, nyo kalaga andimuwa oakwaranya afwinyu.>>

¹⁰ Mazu eto anowongave zela Mulugu Mwana ira: <<Nyo Nabwiya voroma muhusakanya aliserisi wa ilambo ya vati. Ilambo ya zulu eto musakanyile na mandinyu.

¹¹ Ilambo ya zulu na ilambo ya vati jinokana goma uwa, mbwenye nyo muli wa mukalakala. Eto zulu na ilambo ya vati jinoulula nnga jowara.

¹² Eto nyo munoza muvinde zulu na ilambo ya vati nnga mutu avindaga kapaye. Zulu na ilambo ya vati jinoza jitchindjiwe nnga mutu atchindjaga jowara jaye. Mbwenye nyo muli mmohive. Yaka denyu kadiza dimala.>>

¹³ Eto fwanyeya ira Mulugu kanababihege wonga na angelro mazu oira: <<Ugarati muwononi waga odjana ante difiyede agondjiha amwidanawo ira kakale nnga yengo yonyingalihavo manyalo awo.>>

¹⁴ Nnga kodi angelro bani? Angelro ti minemba. Ba anamalaba anno Mulugu unaaruma liye ira kadowe kaakamihedege atu anne anafuna watchela vulusiwa.