Detoronomiyo 9 - Mazu Otchena a Mulungu

Mozeji ohawumbutcheda aIzarayeli mwasa wafunela Mulugu atamangiha anamurala a Kana

¹ Mozeji ohowongagave eraga: <<Kavuruwanani aIzarayeli. Nyo peno eni muhanle vang'ono ira mulambuwe muhindje Jordawu ira mwavolowe, mwatukule ilambo ya malogo mandimuwa eto malogo a kopolo oukwaranyani nyo. Munadowa mwatukule sidadi dindimuwa dowerewerihiwa na muru olapa ante fiya zulu.

² Munadowa mwatukule ilambo ya atu alukulu eto kagali olapa, akuda Anaki anno mwaaiziwile nyo eto anno mwavwetcha nyo kawongaga keraga: <Kodi bani unawanda imela vamentoni va akuda Anaki?>

³ Eto peno inafwanela muiziwe ira Yehova Mulugu wenyu wenno unakala vasogolro venyu gu munlo otolotcha. Yehova unodowa aatolotche atene eto aagwihede vati vasogolro venyu. Era eno nyo munodowa mwaatamangihe eto munomala adimeliha mobaranya nnga mwemo mwapanganne Yehova.

⁴ <<Yehova Mulugu wenyu amala atamangiha amwidaninyu vasogolro venyu, kamuwongege mmirimani mwenyu muiraga: <Para Yehova nizana ilambwela ira ikale yehu tchoira hiyo nali atu apama.> Tchoira Yehova unaatamangihela aliwa vari venyu na mwasa wa ubure wewa.

⁵ Ira nyo mutukule ilambwele kahi ira nyo muli atu apama, nne kahi ira nyo muli atu owongowa mirima, nari. Mbwenye ili na mwasa wa ubure wa malogo ale. Nona Yehova Mulugu wenyu aatamangihagamo aliwa mwilamboni mule vasogolro venyu. Eto Yehova Mulugu wenyu unoirana eno ira akwakwanelihede nipangano nalumbenle liye na makolo enyu Abarahamu, Izaki na Jako.

Mozeji ohawumbutcheda aIzarayeli zela viringaniha wewa osakanya ikwamutu yosema ya mwana ng'ombe

⁶ <<Muiziwe ira para Yehova Mulugu wenyu uvahagani ilambo yapama ile ira ikale yenyu kahi na mwasa wa upama wenyu nari. Tchoira nyo munafwanyeya mwagali atu ohofuna vwa.

⁷ Muumbuwele eto kamudiwale ira nyo mohomutatamula uwali Yehova Mulugu wenyu muisalesaleni. Romela siku nakumile nyo Ijipitu, fiyeda nimburo neni nyo munafwanyeya mwagalive atu omuruniha Yehova.

⁸ Tchoira nyo mwagali mwango Orebi mohomutatamula Yehova uwali. Mwa enne Yehova ohotakaleliwa na makalelo ohokala a masika afunaga ira autolotcheni.

⁹ Mwa enne miyo dagagwenle mwangoni ira dawatchele mabwe osemiwa nnga matabwa, vevo valrembiwe yopangana Yehova asakanyile liye na hiyo, dohomalawo mwangoni ule malambo 40 ntana na mahiyu. Muwari mwa malambo matene anne miyo kadadjile pawu nne kadang'wile mahindje.

¹⁰ Evale Yehova ohodivaha mabwe menli osemiwa nnga matabwa, vevo valrembiwe na ibuno ya Yehova Mulugu. Vamabweni vale Yehova alrembilevo mazu matene awongile liye na nyo mwangoni, muwari mwa munlo, siku nagumannege atu atene wewule.

¹¹ Magomelo wa malambo 40 ntana na mahiyu ale, Yehova ohodivaheda mabwe menli osemiwa nnga matabwa ale, anno valrembile liye yopangana.

¹² Yehova ohodiwandelaga eraga: <Uvenye utite mwangoni uno mobaranya, mwasiwa atwawo anno waakumihile we Ijipitu kohomala viringana. Aliwa kohomala holowa mobaranya, kohomala hiya ndila yenno yaawandenle miyo. Kohomala visakanyela yofwalrafwaniha yonyungulrutcha.>

¹³ <<Eto Yehova ohodiwandelagave eraga: <Miyo dihimala aona ira aliwa ba atu ohofuna vwa.

¹⁴ Udihiye ira daatolotche eto ditimihe nzina newa mwilamboni ya vati, dusakanye weyo nlogo na kopolo didjindji dohokala da masika eto nlogo nindimuwa kwaranya atene anna.>

¹⁵ Mwa enne miyo dohorungunuwa, dititaga mwangoni ule. Mwa tempu yenne mwango watene ohindaga munlo eto mabwe menli osemiwa a yopangana ale kafwanyeya dagatukunle mmandani mwaga.

¹⁶ Mwa enne miyo dagaing'anne, dohoonaga mwagamanle mutegela Yehova Mulugu wenyu. Moholowaga mobaranya ndila ya Yehova yenno yaurumileni liye. Nyo mohosakanyaga mwana ng'ombe yonyungulrutcha.

¹⁷ Mwa enne miyo dohotukulaga matabwa menli ale, miyo atatilela vati, miyo atwa nyo atene muing'anaga.

¹⁸ Noira enne, dohokokoraga vamentoni va Yehova nnga voroma vale, malambo 40 ntana na mahiyu dahadjaga pawu nne dahang'waga mahindje na mwasa wa yotega yasakanyile nyo, musakanyaga jabure vamentoni va Yehova, mmutatamulaga uwali waye.

¹⁹ Tchoira miyo dohokana ova ulukulu zela uwali wa Yehova vamohi no takaleliwa ulukulu Yehova atakaleliwile liye zela nyo, afunaga utolotchani. Mbwenye dagawelenlewo fendo yanembinli, Yehova ohodivwa akoka.

²⁰ Eto Yehova ohotakaleliwaga valukulu zela mulombwana Arawu fiyeda liye funaga ira amutolotche. Mbwenye na liyene dohomulobelela tempu imohive yenne.

²¹ Miyo eto dohotukulaga mwana ng'ombe yenno yasakanyile nyo muwari motega mwenyu, miyo dowa tumeya na munlo. Eto dohomalaga tchila, tukula utuwa, miyo dowa tatilela mwana muhindje akumela mwangoni ule.

²² <<Nyo eto mohotatamula valukulu uwali wa Yehova nagali Tabera eto nagali Masa eto nagali Kiboroti-Hatava.

²³ Yehova agaurumileni ira mukume Kadeji-Barneya, auwandelagani ira: <Mudowe mwatukule ilambo yenno yuvahileni miyo ira ikale yenyu>, nyo mohoruniha jawongile Yehova Mulugu wenyu eto kamwaroromenle eto nne kamwafunile vwelela nizu naye.

²⁴ Eto nyo mwazave murunihaga jauwandelani Yehova romela siku dagumanne miyo na nyo fendo yoroma niiziwanaga wene.

Mozeji ohawumbutcheda aIzarayeli zela lobela walobelenle liye

²⁵ <<Evale muwari mwa malambo 40 ale ntana na mahiyu miyo dalive okokorene na mwasa wa mazu awongile Yehova ira afuna autolotcheni.

²⁶ Miyo doholobela wa Yehova diiraga: <Nabwiya Yehova kamwaatolotche atwinyu anno anafwanyeya kagali yowatchela yenyu, atwinyu anno mwaawombonle nyo na undimuwa wenyu, mwaakumihaga Ijipitu na ndanda na kopolo.

²⁷ Mwaaumbuwele anamalaba enyu Abarahamu, Izaki na Jako. Kamubalre vanda mirima wa atwala, nne kamubalre ubure wewa, nne kamubalre yotega yewa.

²⁸ Yehova kamuirena. Tchoira mwairana eno atu a ilambo yenno inikumihile nyo anerege wonga kerege: <<Yehova kawandile afiyana ilambo yenno yafuna liye adowana, mwasiwa liye oatakaleliwa. Nona aakumiha mwilamboni muno, afuna adowe aape muisalesaleni.>> >

²⁹ Miyo eto doholobela ira: <Yehova aliwa mbwenye anafwanyeya kagali atwinyu vamohi na yowatchela yenyu, atwinyu anno mwaakumihile nyo Ijipitu na kopolo denyu dindimuwa na muwono wenyu owongowa.> >>