Detoronomiyo 6 - Mazu Otchena a Mulungu

Mozeji ohalimbiha aIzarayeli ira kakale atu omuhara Yehova

¹ Mozeji ohowongagave eraga: <<Ala ba malamulo na mangano vamohi na jotonga jejo jadiwandenle Yehova Mulugu wenyu ira dufundjiheni ira mwaharihegemo mwavolowa ilambo inafuna nyo dowa tukula ira ikale yenyu.

² Miyo nnoufundjihani ira mukale atu omuova Yehova Mulugu wenyu eto muharihege mangano na malamulo anno anauwandelani miyo nyo vamohi na ahiminyu eto ahiminyu ahimiwa kalawo wenyu watene ira malambo enyu kaindjive.

³ Kavuruwanani aIzarayeli eto muing'ane pama ira muharihegemo jatene ira mwavolowa ilambo yenno munafwanyeya mukaka na nuwi pwi pwi, jenyu juwendelegeni pama eto mukale atu oindjiva ohokala a masika nnga Yehova Mulugu wa makolo enyu mwapanganne liye na nyo.

⁴ <<Kavuruwanani aIzarayeli. Yehova Mulugu wehu gu Yehova mmohive bahi uliwo.

⁵ Mmuziveliwege Yehova Mulugu wenyu na murima wenyu watene, no kalawo wenyu watene, vamohi na kopolo denyu datene.

⁶ Mazu anauwandelani miyo peno ala, inafwanela kakalege mmirimani mwenyu,

⁷ eto mwaafundjihege ahiminyu ira na aliwene kakoyege mmirimani mwewa eto mwaawandelege mwagagaratile vande, nari mwawendaga mundila, nari mwagonantigi, nari mwavenyaga.

⁸ Eto mwaapotege mazwala vandandani na vakoveni venyu ira ikale ionihedo.

⁹ Eto mwaalrembege mazwala vakaxiluni na vamusuwoni va nyumba denyu.>>

¹⁰ Mozeji ohowongagave eraga: <<Yehova Mulugu wenyu auvolotchihani ilambo yenno ilumbenle liye na makolo enyu Abarahamu na Izaki na Jako ira auvaheni, mwemo munafwanyeya sidadi dindimuwa dapama dedo dahamangile nyo,

¹¹ eto nyumba muzanle jengo japama agali nyo kamuhenlemo yengo eto ilambo munafwanyeya visime pwi dedo dahatimbile nyo vamohi na minda da uva na mitengo da azeti dedo mwahazanle nyo, mwamala dja eto mwamala rumbala,

¹² polre polre tawiha ira munamudiwale Yehova wenno uukumihileni ilambo ya Ijipitu muuzarini mwafwanyeya nyo.

¹³ Mmuovege Yehova Mulugu wenyu, mmulabege liyene eto mulumbelege na nzina naye bahi.

¹⁴ Mbwenye kamwaaharege amilugu amohiwene, amilugu a atu anno mwaawandamenlena nyo,

¹⁵ tawiha ira Yehova Mulugu wenyu unatakaleliwe na makalelo ohokala a masika zela nyo, afiyede utolotchani mwilamboni yatene ya vati. Tchoira Yehova Mulugu wenyu gu Mulugu okana sandje.

¹⁶ <<Kammuxixe Yehova Mulugu wenyu nnga mwamuxixile nyo mwagali ilambo ya Masa.

¹⁷ Inafwanela muharihege pama malamulo a Yehova Mulugu wenyu vamohi na jowelruza jaye na mangano aye unaurumani liye.

¹⁸ Eto muiregena japama na jowongowa vamentoni va Yehova ira jatene juwendelegeni pama eto ira muvolowe, mutukule ilambo yapama yenno Yehova alumbenle liye na makolo enyu,

¹⁹ eto ira Yehova aatatilele unde amwidaninyu atene vasogolro venyu nnga mwemo Yehova muwongele liye.

²⁰ <<Mwanawo aufuka musogolro ira: <Kodi mwasiwa gwa nni Yehova Mulugu wehu auvahagani jowelruza vamohi na mangano na jotonga jejo juwandenleni liye?>,

²¹ weyo umuwakule mwanawo wire: <Hiyo nali azari a Farawu ilambo ya Ijipitu. Mbwenye Yehova ohonikumihamo mwilamboni mwa Ijipitu na ndanda naye na kopolo.

²² Eto Yehova ohoirana jionihedo na jotikiniha jilukulu eto jagali jowopiha muwari moatonga aIjipitu na mwene Farawu vamohi na atu atene a vande vaye. Jatene ejo Yehova ohoirana hiyo niing'anaga na meso ehu.

²³ Mwa enne ohonikumihamo muIjipitu mule, liye nitukula ira aze anivahe ilambo yenno yalumbenle liye na makolo ehu.

²⁴ Noira eno, Yehova ohoniruma ira niharege jokokomeza jatene jeji eto nimuovege Yehova Mulugu wehu ira niwande kana upama wa mukalakala eto ira niwande kalawo nnga mukalele hiyo fiyeda siku na peno ni.

²⁵ Hiyo nakala oharihamo na makalelo apama malamulo matene vamentoni va Yehova Mulugu wehu nnga mwemo munirumele liye, Yehova unoniona nagali apama.> >>