Detoronomiyo 5 - Mazu Otchena a Mulungu

Mozeji ohawumbutcheda aIzarayeli zela Malamulo Kumi

¹ Mozeji ohaitanaga aIzarayeli atene, liye roma awandela eraga: <<Izarayeli muvuruwane mangano na jotonga jejo jinauwandelani miyo peno muvwaga na mabaru enyu. Mufundje eto mukoyege jatene eji ira muharihegemo muwari moing'ana pama.

² Yehova Mulugu wehu ohosakanya yopangana na hiyo mwango Orebi.

³ Yehova asakanyaga yopangana ila, kasakanyile para makolo ehu bahi. Asakanyile eto para na hiyene atene nnafwanyeya nagaliwo peno.

⁴ Yehova ohowonga na hiyo kove na kove mwangoni muwari mwa munlo.

⁵ Mwa tempu yenne miyo daligi oimelene vari va Yehova na nyo ira dufiyihedegeni mazu a Yehova. Tchoira nyo kamwawandilege dowa gwela mwangoni ule na mwasa oova munlo. <<Siku nenne Yehova ohowongaga eraga:

⁶ <Miyo dili Yehova Mulugu wenyu uukumihileni ilambo ya Ijipitu muuzarini mwafwanyeya nyo.

⁷ Kamukayena amilugu amohiwa ahali miyo.

⁸ Kamusakanye nlandaniho nosemiwa ira mutamalelege, nne yofwalrafwaniha ya yengo ili yatene inafwanyeya zulu nari mwilamboni ya vati nari mwiko.

⁹ Kamukokorele eto nne kamutamalele jejo mwasiwa miyo Yehova Mulugu wenyu dili Mulugu okana sandje. Tchoira atu anno anadiida, miyo nnotonga yotega yewa mwa ahimiwa anaabalege atu, fiyeda azuliwa ahimiwa.

¹⁰ Mbwenye zela anno anadiziveliwa miyo, kaharihagamo malamulo aga, nnoaoniha zivela waga wororomeleya roma aliwa, dowaga ahimiwa eto ahimiwa anno ahimiwa, vamohi na ahimiwa anno ahimiwa dowagave eno fiyeda ndila 1.000.

¹¹ <<Kamuromolege nzina na Yehova Mulugu wenyu vasayi. Mutu wenne unaromole nzina naga vasayi, miyo dagali Yehova nnomubalra nnga mutu okana mulandu.

¹² <<Muharihegemo siku na sabado ira nikale siku notchenihiwa nnga mwemo Yehova Mulugu wehu aurumeleni liye.

¹³ Mulabege eto muhindege mabasinyu ali matene muwari mwa malambo matanu na nimohi.

¹⁴ Mbwenye siku nanetanu na mbinli ti siku na sabado, siku nomuumbuwela Yehova Mulugu wenyu. Siku neni nafiya kamuhindege mabasa ali matene, nyo nari mwaninyu wa mulombwana, nari mwaninyu wa muhiyana, nari namalaba wa mulombwana, nari namalaba wa muhiyana, nari ng'ombe nari buru, nari ifuwo yenyu ili yatene nari mutu oza, wenno unakala vamohi na nyo, kakalevo unafuna hinda mabasa. Ili ira namalabinyu wa mulombwana nari wa muhiyana avume nnga munavumela nyo.

¹⁵ Tchoira munerege umbuwela ira mwali azari mwilamboni mwa Ijipitu eto Yehova Mulugu wenyu ohoukumihanimo mwilamboni mule na ndanda na kopolo vamohi na muwono owongowa. Nona Yehova Mulugu wenyu auwandelagani ira mukoyege siku na sabado.

¹⁶ <<Umurihedege babawo na mmawo nnga mwemo muuwandenle Yehova Mulugu wawo ira ugonele malambo madjindjene eto ira jatene juwendelege pama ilambo yenno inafuna Yehova Mulugu wenyu uvahani.

¹⁷ <<Kumpe mutu.

¹⁸ <<Kuraruwe.

¹⁹ <<Kube.

²⁰ <<Kuwonge umboni onama omunukeda mutu.

²¹ <<Kumusilrilre mwadi mwinnya, nne kufune nyumba ya mwinnya, nne mundaye, nne namalabaye wa mulombwana nne namalabaye wa muhiyana, nne ng'ombe yaye nne buru waye nne yengo yatene ili yaye.> >>

Mozeji ohawumbutcheda aIzarayeli zela ova wewa siku naligi atu mwango Sinayi

²² Mozeji ohowongagave eraga: <<Mazu matene anna awongile ali Yehova, awandelaga atu atene mwangoni vari va munlo, na mirambo vamohi na isi, na nizu nindimuwa. Eto nne kilivo mazu amohiwa awendjedilege liye. Mazuwa ali anna bahi. Mwa eno, ohalrembaga vamabweni menli osemiwa nnga matabwa, liye divaheda miyo.

²³ Fwanyeya ira ejile jagaireyile, atu atene kavwaga nizu nne muwari mwa isi eto kaonaga mwangole ahindaga munlo, nyo andimuwa atene a malogo vamohi na asogolrelri amohiwa, mohoza wonga na miyo,

²⁴ muiraga: <Kaing'anani, Yehova Mulugu wehu uhunioniha undimuwa waye vamohi no ulukula waye. Hiyo nihivwa nizu naye muwari mwa munlo. Peno hiyo nihiona ira Mulugu unowonga na mutu eto mutuwa liye kalawo, hakwa.

²⁵ Hiyo nnatawa nnakwe na munlo mundimuwa ula. Tchoira nera nivuruwanegeve nizu na Yehova Mulugu wehu, na ibaribari nnagomela kwa.

²⁶ Mwasiwa kalivo mutu ubabihile vuruwana nizu na Mulugu Okalawo awongaga muwari mwa munlo nnga nnavwela hiyo peno, amala eno mutuwa akalawo.

²⁷ Nona nyo andimuwa Mozeji mufiye mwangoni ule, mwavuruwane jatene jinawonga Yehova Mulugu wehu, amala eno muze, muniwandele jatene jinawonge Yehova Mulugu wehu. Mwaniwandela, hiyo nnovwa eto nnoirana.> >>

²⁸ <<Fwanyeya ira Yehova agavwile mazu mwawongaga nyo na miyo, liye ohodiwandelaga eraga: <Miyo dihivwa jatene jiwongile atwayo kawongaga na weyo. Jatene jiwongile atu, kohowonga pama.

²⁹ Ahakale aliwa kakana murima wenno, kadiovaga eto kaharihaga malamulo aga malambo matene, jatene jerege awendela pama aliwa vamohi na ahimiwa kala no kala.

³⁰ Udowe waawandele ira: <<Muwelele mmisasani mwenyu.>>

³¹ Weyo mbwenye unohala wewuno vamohi na miyo ira duwandele malamulo matene, mangano matene na jotonga jatene ira udowe waafundjihe ira kaharihegemo kavolowa ilambo yenno inafuna miyo avaha ira kaitukule, ikale yewa.> >>

³² Mozeji ohowongaga eraga: <<Nona inafwanela muing'ane pama ira muiregena jejo jurumileni Yehova Mulugu wenyu. Kamuperuwe, nne para muwononi odjana nne para muwononi oromana.

³³ Muwendege ndila yatene yenno inaurumani Yehova Mulugu wenyu ira mukalewo eto ira jatene juwendelegeni pama eto ira malambo enyu kaindjive muwari mwa ilambo yenno inafuna nyo dowa tukula ira ikale yenyu.>>