Detoronomiyo 4 - Mazu Otchena a Mulungu

Mozeji ohakokomeza aIzarayeli ira kamuharegeve Mulugu

¹ Mozeji ohowongagave eraga: <<Mwa eno aIzarayeli kavuruwanani mangano na jotonga jejo jinaufundjihani miyo, mukwakwanelihedege ira muwande kalawo eto muwande volowa ira mwatukule ilambo yenno Yehova Mulugu wa makolo enyu unafuna liye uvahani.

² Muwari mwa mazu matene anaurumani miyo, kikalevo mazu anafuna nyo wendjeda nne vungula. Mbwenye inafwanela muharihege malamulo a Yehova Mulugu wenyu anno nnauwandelani miyo.

³ Meso enyu kohomala ona jejo Yehova jairile liye mwagali mwango Peyori. Tchoira atu atene kamuharile mulugu Baali wa mwango Peyori, Yehova Mulugu wenyu ohatolotcha vari venyu.

⁴ Mbwenye nyo mwamuharile Yehova Mulugu wenyu, ante peno nyo mwatene muhukalawo.

⁵ <<Miyo dihimala ufundjihani mangano vamohi na jotonga nnga mwemo mudirumile Yehova Mulugu waga ira mudowe mwaharihegemo ilambo yenno inafuna nyo dowa tukula.

⁶ Inafwanela mukoye jatene jene eto muiregena, tchoira jejo jinafwanyeya jagali zelru vamohi no onelramo watene vamentoni va malogo amohiwa anafuna vuruwana mangano matene ala. Aliwa kavwa anoza kawongege keraga: <Nlogo nindimuwa ni ba atu a toto eto ba atu oiziwetchetcha.>

⁷ Tchoira kanilivo nlogo nne nimohi nindimuwa nnawanda wandameliwa na mulugu wewa nnga makalelo unaniwandamela Yehova Mulugu wehu fendo datene nnamuitana hiyo.

⁸ Eto kanilivo nlogo nimohi niwa nindimuwa ninna mangano okwakwanela vamohi na jotonga jokwakwanela jolingana na malamulo anno nnauvahani miyo vamentoni venyu peno.

⁹ <<So inafwanela mukale ororomeleya. Eto polre polre tawiha ira munadiwale jejo jionne nyo na meso enyu eto kajikumemo mmirimani mwenyu kalawo wenyu watene. Eto mwaawandelege ahiminyu vamohi na ahiminyu ahimiwa.

¹⁰ Kamudiwale siku naligi nyo vamentoni va Yehova Mulugu wenyu, mwango Orebi. Tchoira siku nenne Yehova ohodiwandelaga eraga: <Waagumanihe atu atene kaze wa miyo ira daawandele mazu aga matene eto aliwa kafundje ira kawandege diova malambo matene anafuna atu kalawo mwilamboni ya vati. Eto anerege afundjiha ahimiwa.>

¹¹ Mwa enne mohozaga, nyo imela wandamelana mwangoni ule. Eto mwangole siku nenne ohindaga munlo fiyeda gwelaga zulu. Eto wohokalaga isi na mirambo eto mwango watene agali odiba pii.

¹² Mwa enne Yehova ohowongaga na nyo muwari mwa munlo. Eto nyo mohovwaga nizu niwongaga mazu. Mbwenye kamwaonileve yengo ili yatene, so mwavwilege nizu ve.

¹³ Mwa enne liye ohouwandelagani yopangana yaye ira muharihegemo, yenno inafwanyeya yagali Malamulo Kumi. Evale oholremba vamabweni menli osemiwa nnga matabwa.

¹⁴ Eto tempu imohive yenne Yehova ohodiwandelaga ira dufundjiheni mangano vamohi na jotonga jatene ira muharihegemo ilambo yenno inafuna nyo dowa tukula.>>

Jokokomeza ira aIzarayeli kahakayena vikwamutu josema

¹⁵ Mozeji ohowongagave eraga: <<Siku Yehova awongaga liye na nyo mwango Orebi muwari mwa munlo, kamwaonile yengo ili yatene, so mwavwaga nizu ve bahi.

¹⁶ Nona inafwanela muing'ane pama ira mwahaviringane eto mwaharome sakanya nlandaniho nosemiwa na jofwalrafwaniha jili jatene, nari yofwalrafwaniha ya muhiyana nari ya mulombwana,

¹⁷ nari yofwalrafwaniha ya mwanainyama uli watene unafwanyeya mwilamboni ya vati, nari yofwalrafwaniha ya mbalrame ili yatene inavava zulu

¹⁸ nne yofwalrafwaniha ya mwanainyama uli watene omburunuwa vati nari yofwalrafwaniha ya somba ili yatene inafwanyeya mwiko.

¹⁹ Eto wavenyiha meso awo uing'aniha zulu, waona mwedi nari nyenyedi vamohi na jomoneya jatene ja zulu, polre polre tawiha ira unanyengiwe uroma kokorela jejo eto uroma tamalelaga jejo Yehova Mulugu wenyu aavahile liye atu atene a ilambo ya vati.

²⁰ Nyo mbwenye kamuharege jejo, mwasiwa Yehova ohoutukulani, aukumihagani Ijipitu muhofuni monyungulrutcha momba ira mukale atu osakulriwa a Yehova nnga munaonela nyo peno eni.

²¹ <<Eto Yehova ohotakaleliwa zela miyo na mwasa wa mazu enyu eto oholumbela adikamelihaga lambuwa muhindje Jordawu vamohi no volowa ilambo yapama yenno Yehova Mulugu wenyu unafuna liye uvahani ira ikale yenyu.

²² Nona miyo kannalambuwa muhindje Jordawu, nnokwa ilambo yenna. Nyo mbwenye munolambuwa eto munodowa mwatukule ilambo yapama ile.

²³ Mwa eno, inafwanela mwahadiwale yopangana yenno Yehova Mulugu wenyu usakanyile liye na nyo eto nne kamusakanye nlandaniho nosemiwa, nari yofwalrafwaniha ili yatene yenno Yehova Mulugu wenyu ukondihileni liye.

²⁴ Tchoira Yehova Mulugu wenyu gu munlo otolotcha eto gu Mulugu okana sandje.

²⁵ <<Nyo mwaabala ahima eto ahiminyu kaabalaga ahimiwa, nyo mwamala ulula, mwaroma sakanya johokala pama, mwaroma sakanya nlandaniho nosemiwa nari yofwalrafwaniha ili yatene, muromaga sakanya jabure vamentoni va Yehova Mulugu wenyu, mutatamulaga uwali wa Yehova,

²⁶ miyo peno nnoitana ilambo ya zulu vamohi na ilambo ya vati ira jikale amboni ira na ibaribari mohodibeliwa munagomela dimela ilambo yenno inafuna nyo dowa tukula mwagalambuwile muhindje Jordawu. Kamunasusa. Munagomela tolotchiwa atene.

²⁷ Eto Yehova unoubalaletchelani muwari mwa atu atene eto munoza muhale atu a vang'ono vari va atu anno Yehova unaudowanani liye.

²⁸ Eto wewule munerege alaba amilugu osakanyiwa na manda a atu, kagali amilugu a mitengo, a mabwe, anno kahanaona nne kahanavwa nne kahanadja nne kahanaona nukela wa yengo ili yatene.

²⁹ <<Nyo mwagali wewule, mwagamanle holowa, malringana mwanvenda Yehova Mulugu wenyu na mmirimani mwenyu mwatene no kalawo wenyu watene, munonfwanya.

³⁰ Mwa tempu yenno mwaza mukala mmakatamihoni eto ubure watene wenna waufwanyani, magomelo wa malambo anne munoza murungunuwe muing'ane wa Yehova Mulugu wenyu eto muvwelelege jowonga jaye.

³¹ Tchoira Yehova Mulugu wenyu gu Mulugu wa tangaranga. Mwavwelela inawonga liye, Mulugu kanauhiyani, nne kanautolotchani nne kanadiwala yopangana yenno yalumbenle liye na makolo enyu.

³² <<Kafukedani ilambo ya vati yatene komoni ya wu ante komoni ya wu akala wanle nyo mwahanabaliwe, romela siku Mulugu ampandutchile liye mutu amuhela mwilamboni, akala ihiroma ireya yengo ilukulu nnga yenna owu hehi akala ihiroma vweya yengo nnga yenna.

³³ Owu hehi mufukede akala kohokalawo atu kababihile vwa nizu na mulugu wewa awongaga muwari mwa munlo nnga muvwile nyo, amala kahakwa, kakalawo.

³⁴ Owu hehi mufuke akala ukalawo mulugu ubabihile xixa dowa awombola atu mmandani mwa afwiwa aazagana wa liye molabana jotonyiheda na jionihedo na jotikiniha na kondo vamohi na ndanda na kopolo na muwono owongowa na jokukumula jidjindji molingana na jatene Yehova Mulugu wenyu jairile liye Ijipitu muing'anaga na meso enyu.

³⁵ Nyo mohoonihiwa jatene ejile ira muiziwe ira Yehova unafwanyeya agali Mulugu. Kaliwo Mulugu mmohiwa ahali liye.

³⁶ Mulugu ohouvwihani nizu naye kumela zulu ira aufundjiheni eto ohouonihani munlo waye mundimuwa mwilamboni ya vati eto mohovwa mazu aye muwari mwa munlo.

³⁷ Tchoira Yehova ohazivela makolo enyu eto ohofiyeda usakulrani nyo ahimiwa, liye ukumihani muIjipitu, liye mwinnya usogolrelragani na kopolo daye dindimuwa,

³⁸ liye atamangiheda olapela wene malogo amohiwa mandimuwa eto a kopolo ukwaranyani nyo, liye uvolotchihani nyo ilambo yewa, liye uvahani ira ikale yenyu nnga munaonela nyo peno.

³⁹ Nona peno inafwanela muiziwe eto muumbuwelege mmirimani mwenyu ira Yehova bahi gunafwanyeya agali Mulugu wa zulu na ilambo ya vati. Kaliwo Mulugu mmohiwa.

⁴⁰ Nona inafwanela muharihege mangano aye vamohi na malamulo aye anno nnauwandelani miyo peno ira jatene juwendelegeni pama romela nyo vamohi na ahiminyu a musogolro ira kawande kalawo malambo madjindji ilambo yenno Yehova Mulugu wenyu unafuna liye uvahani ira mukalegemo malambo a mukalakala.>>

Mozeji ohosakulra sidadi dotawelamo

⁴¹ Evale Mozeji ohosakulraga sidadi taru dafwanyeya pandi ya makumelo wa nzuwa wa muhindje Jordawu,

⁴² ira mutu ampa nfwaye ahali mofuna mwaye eto vahali idana voroma vene, atawelege sidadi dedile ira ahapiwe.

⁴³ Sidadi dasakulrile Mozeji ti di: 1. Yoroma ali sidadi ya Bezeri, yafwanyeya mukokolani, yagali ilambo yotandeleya yagali yogwela, aavahile atu a nlogo na Rubeni ira katawelegemo. 2. Yowelela ali sidadi ya Ramote yafwanyeya mwilamboni mwa Jileyadi, aavahile atu a nlogo na Gadi ira katawelegemo. 3. Yogomiheda ali sidadi ya Golani yafwanyeya mwilamboni mwa Bazani, aavahile atu a nlogo na Manasesi ira katawelegemo.

Mazu otanda Malamulo Kumi

⁴⁴ Ala ba malamulo Mozeji aavahile liye Ana Izarayeli,

⁴⁵ na jowelruza, na mangano, na jotonga jejo Mozeji aawandenle liye Ana Izarayeli kagakumile Ijipitu,

⁴⁶ kahanalambuwe muhindje Jordawu. Tempu yenno aliwa kali ndabo nafwanyeya sogolro wa sidadi ya Bete-Peyori mwilamboni mwa Seyoni mwene wa aAmore, akaletcha Ejiboni, wenno Mozeji vamohi na Ana Izarayeli kampile atu kagakumile Ijipitu.

⁴⁷ Kagampile, kohotukula ilambo yaye, kala yewa. Kohompa eto Oge mwene wa Bazani. Mwa enne kohapa amwene ambinlene a aAmore kakala pandi ya makumelo wa nzuwa wa Jordawu, aliwa tukula vilambo dewa,

⁴⁸ romela sidadi ya Aroweri, yenno inafwanyeya wandamelana tcherela ya mwana muhindje wa Arinoni ante dowa fiya mwango Siriyoni wenno eto unaitaniwa Herimoni,

⁴⁹ vamohi na ilambo yatene ya Araba, pandi ya makumelo wa nzuwa wa Jordawu, fiyeda Ntiya na Araba fiyeda mpedi mwa mwango Pijiga.