Detoronomiyo 3 - Mazu Otchena a Mulungu

Mozeji ohawumbutcheda aIzarayeli zela gondjihiwa wa mwene Oge

¹ Mozeji ohowongagave eraga: <<Noira eno, nohorungunuwa hiyo haraga ndila yodowa ilambo ya Bazani. Mwa enne mulombwana Oge, mwene wa Bazani ohomaruwaga vamohi na atwaye atene, liye za gumana na hiyo sidadi ya Edereyi ira niwane.

² Evale Yehova ohodiwandela eraga: <Kumuove. Tchoira miyo dihimala uvaheda mmandani mwawo romela liye vamohi na atwaye atene vamohi na ilambo yaye. Umuirena nnga wamuirilena we Seyoni mwene wa aAmore wenno akaletcha sidadi ya Ejiboni.>

³ Evale Yehova Mulugu wehu ohonivaheda mmandani mwihu mulombwana Oge mwene wa Bazani vamohi na atwaye atene. Mwa enne hiyo nohapa atene, nne mmohi kanamuhiyilege.

⁴ Eto mwa tempu yenne nohomala gondjiha sidadi daye datene. Kilivo nne sidadi imohi nahagondjihile hiyo. Nohogondjiha ilambo yatene ya Arigobe vamohi na mwatene mwavirile umwene wa Oge mwilamboni mwa Bazani. Sidadi dagondjihile hiyo dali 60.

⁵ Fwanyeya ira sidadi datene dedi nagondjihile hiyo dali sidadi dolimba dokana miru dolapa na misuwo vamohi na momba unde uwa. Nohogondjiha eto sidadi dimohi didjindji dahanna miru.

⁶ Nohotolotchaga sidadi datene dedile nnga namuirilena hiyo mulombwana Seyoni mwene wa Ejiboni nitolotchaga sidadi daye datene na alombwana, ahiyana na ahima atene kafwanyeya emule.

⁷ Mbwenye jifuwo jatene na jengo jatene jaawakile hiyo musidadi mule, nohotukulaga ira jikale jehu.

⁸ Kukala makalelo natukunle hiyo vilambo mmandani mwa amwene ambinli a aAmore anno kafwanyeya makumelo wa nzuwa wa Jordawu, romela mwana muhindje Arinoni fiyeda mwango Herimoni.>>

⁹ (Mwango Herimoni ule, akuda Sidoni anaitana na nzina na Siriyoni. Mbwenye aAmore anaitana na nzina na Seniri.)

¹⁰ Mozeji ohowongagave eraga: <<Nohogondjiha eto sidadi datene dafwanyeya ilambo yotandeleya yagali yogwela roma ilambo yatene ya Jileyadi na Bazani watene fiyeda Salika na Edereyi, dedo dafwanyeya dagali sidadi da umwene wa mulombwana Oge ilambo ya Bazani.>>

¹¹ (Fwanyeya ira mulombwana Oge mwene wa Bazani ahanapiwe, liye ali mutu ogomiheda muwari mwa nlogo na atu alukulu aRefayina. Kama yaye yali yosakanyiwa na momba eto ikalawove fiyeda siku na peno sidadi ya Raba ilambo ya akuda Amoni. Kama ile lapa uwa inna mameturu mannayi eto rambalala uwa inna mameturu menli nnga munapimela atu.)

Mozeji ohawumbutcheda aIzarayeli zela gawiwa wa ilambo ya makumelo wa nzuwa wa Jordawu

¹² Mozeji ohowongagave eraga: <<Mwa tempu yenne hiyo nohogondjiha romela sidadi ya Aroweri, yenno inafwanyeya wandamelana tcherela ya mwana muhindje wa Arinoni vamohi na metadi ya ilambo ya mwango didjindji ya Jileyadi vamohi na sidadi datene dafwanyeya wewule. Mwa enne dohotukula ilambo yatene yenne, miyo avaha atu a nlogo na Rubeni na atu a nlogo na Gadi ira kakalegemo.

¹³ Eto metadi ya Jileyadi yohala vamohi na Bazani watene wewo wavirile umwene wa Oge daavahile metadi ya nlogo na Manasesi.>> (Fwanyeya ira pandi yatene ya Arigobe na Bazani watene yaitaniwa ilambo ya aRefayina.

¹⁴ Mulombwana Jayire wa muibalini mwa Manasesi ohogondjiha pandi yatene ya ilambo ya Arigobe. Ku wonga agondjihile ilambo ya Bazani fiyeda madilre a akuda Jesuri na akuda Makate. Mwa enne ohovaha ilambo ile nzina naye, aliwa itanaga Sidadi da Jaire, fiyeda siku na peno.)

¹⁵ Mozeji ohowongagave eraga: <<Eto atu a muibalini mwa Makiri daavahile ilambo ya Jileyadi.

¹⁶ Mbwenye atu a nlogo na Rubeni na atu a nlogo na Gadi daavahile romela Jileyadi ante dowaga mwana muhindje wa Arinoni, madilriwa kala mwana muhindje wenne dowaga muhindje wa Jaboke, na mmadilreni mwa aAmoni.

¹⁷ Dohavaha eto ilambo ya Araba vamohi na madilre a muhindje Jordawu romela Kinereti, ante dowa fiya Ntiya na Araba neno eto nnaitaniwa Ntiya na Mwinnyu, fiyeda mmambalo mwa Ajidode-Pijiga dowaga makumelo wa nzuwa.>>

¹⁸ Mozeji ohowongagave eraga: <<Eto miyo tempu imohive dohowonga na alombwana atene a nlogo na Rubeni, Gadi na metadi ya nlogo na Manasesi diiraga: <Yehova Mulugu wenyu uhuvahani ilambwela ira mutukule. Mwa eno, inafwanela nyo alombwana atene a kondoni mukozeye na jowanana jenyu, mudowe sogolro wa abalinyu Ana Izarayeli.

¹⁹ So mbwenye anafuna hala sidadi dedo duvahileni miyo ba ahiyaninyu na ahiminyu vamohi na jifuwo jenyu. Mwasiwa miyo dihiiziwa ira nyo muhukana jifuwo jidjindji.

²⁰ Aliwa anohala ante Yehova afiyede avaha abalinyu vuma nnga vuma wewo muvahiwe nyo ira na aliwene katukule ilambo yenno Yehova Mulugu wenyu unafuna liye avaha kombela imohiwa ya Jordawu. Ejo jagaireyile, pa evo vanafuna kada mutu awelelege ilambo yaye yenno duvahileni miyo.> >>

²¹ Mozeji ohowongagave eraga: <<Eto tempu imohive dohomuwandela mulombwana Jozuwe miyo ira: <Meso awo kohomala ona jatene Yehova Mulugu wenyu jaairele liye amwene ambinli Seyoni na Oge. Yehova unerege airana makalelo mamohive amwene atene anafuna we afwanya sogolro unadowege we.

²² Weyo kwaove, mwasiwa Yehova Mulugu wenyu gunawana vamalroni venyu.> >>

Mozeji ohowonga zela makalelo anvepile liye Mulugu ira avolowe ilambo ya Kana

²³ Mozeji ohowongagave eraga: <<Eto tempu imohive yenne miyo dohonvepaga Yehova diiraga:

²⁴ <Nabwiya Yehova, nyo muhuroma dioniha miyo namalaba wenyu undimuwa wenyu vamohi na ndanda nenyu na kopolo. Tchoira zulu na ilambo ya vati kaliwo Mulugu mmohiwa unawanda irana nnga jejo jinaira nyo, nne kalivo unna kopolo dolingana na kopolo denyu.

²⁵ Miyo nnouvepani ira mudihiye didowe daone ilambo yapama yenno inafwanyeya kombela ya Jordawu, ilambo yapama ya mwango didjindji na ilambo ya Libano.>

²⁶ Mbwenye Yehova ohotakaleliwaga valukulu zela miyo na mwasa wenyu, mwa eno karumenle yovepa yaga. Evale ohodiwandelaga eraga: <Ihikwakwana. Kuwelele wonga na miyo akoka mazu anno.

²⁷ Ugwele vazulu va mwango Pijiga, uvenyihe meso awo, uing'ane pandi dannayi dene da ilambo ira uone na meso awo ilambo yenno inaavaha miyo aIzarayeli, tchoira weyo kunalambuwa muhindje Jordawu.

²⁸ Mulombwana Jozuwe gunafuna asogolrelra atwala eto gunafuna dowa agawela atu ilambo yenno inafuna we ona na mesove bahi. Nona inafwanela umurume mulombwana Jozuwe, umukokomeze eto umulimbihe.>

²⁹ Mwa enne hiyo nohokalagave ndabo nafwanyeya sogolro wa sidadi ya Bete-Peyori.>>