Detoronomiyo 23 - Mazu Otchena a Mulungu

Jowelruza jidjindji ja Mozeji

¹ Mozeji ohowongagave eraga: <<Mulombwana ukapalreyile nari ugwadeyile yano ya ilombwana, kadowege gumana vamohi na atu kagumanaga wa Yehova.

² <<Mutu wenne ubaliwe mmararuwelo, kadowege gumana vamohi na atu kagumanaga wa Yehova, roma liye, na ahimaye eto ahimaye anno ahimiwa, vamohi na ahimiwa anno ahimiwa dowagave eno nne masiki fiyeda ndila kumi.

³ Eto nne nkuda Amoni nari nkuda Mowabe kadowege gumana vamohi na atu kagumanaga wa Yehova, roma liye, na ahimaye eto ahimaye anno ahimiwa, vamohi na ahimiwa anno ahimiwa dowagave eno, nne masiki fiyeda ndila kumi, kakalevo unafuna dowa gumana vamohi na atu a Yehova kagumanaga.

⁴ Tchoira mundila mwawenda nyo mukumaga Ijipitu, aliwa tchafunne za wa nyo na pawu vamohi na mahindje ira kauwatcheleni. Mbwenye kohomugula Balawu, mwana Beyori wa sidadi ya Petori mwilamboni mwa Mezopotamiya ira aze autembelrelreni.

⁵ Mbwenye Yehova Mulugu wenyu kafunne vwa jowonga ja Balawu. Yehova ohofutukula matembelrelro aye, aliwa kala mareliho, na mwasa oira Yehova Mulugu wenyu ouzivelani.

⁶ Kamusakanye yopangana yowandana na aliwa nne kamwairele upama kalawo wenyu watene, kala no kala.

⁷ <<Mbwenye kamwaatakaleliwege akuda Edomu, mwasiwa aliwa anafwanyeya kagali abalinyu, nne kamwaatakaleliwege akuda Ijipitu tchoira nyo mwafwanyeya mwagali atu oza mwilamboni mwewa.

⁸ Aliwa azuliwa anabaliwege musogolro anerege dowa gumana vamohi na atu kagumanaga wa Yehova.

⁹ <<Nikuru nenyu na anyakondo navenya ira kadowe kawane na amwidaniwa, inafwanela kawande rambela jabure jatene.

¹⁰ <<Akalawo mulombwana mmohi muwari mwa nyo avitakaliha na mahiyu mokuma ilombwana, akala otakalene, inafwanela akumemo muwari mwa nikuru na anyakondo afwaye. Liye kagumane vamohi na afwaye vamusasani vamohive.

¹¹ Mbwenye nzuwa naviraga, avenye adowe avihuwe na mahindje. Evale nzuwa namalelawo, liye podi welela vamisasani vakoka vene.

¹² <<Eto munokana nimburo unde wa misasa dinyu ira mutu afunaga woza, adowege wewo.

¹³ Eto munyakondo atukulaga jowanana jaye ja kondoni, inafwanela atukulege mwana paya ira afunaga woza ababihege timba, amala woza avuhelelena mambi ale.

¹⁴ Tchoira Yehova Mulugu wenyu unawendawenda vari va misasa dinyu evale ira auvuneleni eto ira auvahedeni amwidaninyu vasogolro venyu. Nona vamisasani venyu inafwanela vikalege votchena, tawiha ira Yehova unaze aone jonyakavala wa nyo era eno, awelele mundulri.

Muzari omutawa mbwiyaye

¹⁵ <<Mwamuona muzari wa mutu mmohiwene atawela musidadi mwenyu, kammudowena mwanvaheda mwinnya wenno umutawile liye.

¹⁶ Mmuhiye akalege na nyo, malringana nimburo nnasakulre liye, neno nnamuzivele muwari mwa sidadi inakala nyo. Eto nne kammuonihe goyi.

¹⁷ <<Kakalevo muIzarayeli mmohi wa mulombwana nari wa muhiyana unafuna kala puta muwari mwa nyumba munaatamalela atu amilugu.

¹⁸ Eto nne kakalevo unafuna dowagana muNyumbani mwa Yehova Mulugu wenyu kobiri dedo nnakumela muwari mwa uputa mule ira avelele muwari mokwakwaneliheda yolumbela yaye na Yehova. Tchoira jatene ejo jinafwanyeya jagali jengo jotakaletchetcha wa Yehova Mulugu wenyu.

¹⁹ <<Wambolihaga muIzarayeli nfwawo kobiri, kumbolihe ira auwelihede mowendjededeya, masiki kala kobiri, nari yodja, nari yengo ili yatene yoboliha.

²⁰ So mbwenye mutu wenne ahali muIzarayeli, we podi mboliha ira awelihe mowendjededeya, mbwenye mbalawo muIzarayeli kumbolihe ira awelihe mowendjededeya ira Yehova Mulugu wawo aurelihe muwari mwa jatene jinalaba mandawo ilambo yenno inafuna nyo dowa tukula ira ikale yenyu.

²¹ <<Wasakanya yolumbela wa Yehova Mulugu wawo, kudibeliwege kwakwaneliheda. Tchoira Yehova Mulugu wawo unoukosa eto weyo unofwanyeyana yotega.

²² Waona ira kannawanda kwakwaneliheda yolumbela yaga, ili yapama wahalumbele. Tchoira wahalumbele kavili yabure.

²³ Mbwenye inafwanela uing'ane pama ira ikumihile we vamulomoni vawo ukwakwanelihedege. Masiki ikale yovelela yofuna mmirimani mwawo wekave, inafwanela ukwakwanelihede nnga mulumbenle we wa Yehova Mulugu wawo eto nnga muwongele we na mulomo wawo.

²⁴ <<Wavolowa mmundani mwa uva mwa mwinnya, we podi dja uva malringana vinagomele dja wawo ante ufiyede rumbala, so mbwenye kuhele mutengwani ira udowegena.

²⁵ Eto wavira mmundani mwa jodja mwa mwinnya, we podi kotolaga mangala a jozala jinafwanyeya emule, we takunaga. So mbwenye kuzena ikwakwa uroma urumulaga.>>