Detoronomiyo 2 - Mazu Otchena a Mulungu

Mozeji ohawumbutcheda aIzarayeli zela vira wewa ilambo ya akuda Ezawu na ilambo ya Mowabe

¹ Mozeji ohowongagave eraga: <<Noira enne, nohorungunuwaga nidowaga muisalesaleni, niharaga ndila ya Bara Yofila nnga mwemo mwadiwandenle Yehova. Mwa enne hiyo nohomala malambo madjindjene nirungunuwaga mwango wa Seyire.

² Mwa enne Yehova ohodiwandelaga eraga:

³ <Rungunuwa wenyu ilambo ya mmwangoni ila ukwakwana. Karungunuwani muing'ane pandi ya norti.

⁴ Waawandele atu atene ira: <<Muvire mmadilreni mwa abalinyu ana Ezawu, anno anakala Seyire. Mwadowa wewule aliwa anerege uovani. Mbwenye polre polre.

⁵ Kamwairele yabure, mwasiwa miyo kaduvahileni pandi ili yatene ya ilambo yewa, nne vonyingaliha nnyalo. Tchoira Ezawu miyo dihinvaha mwango wa Seyire ira ikale ilambo yaye.

⁶ Mwadowa wewule, jodja jinafuna nyo djaga munerege gula na aliwa. Eto nne mahindje anno munang'wege nyo, munerege gula na aliwa.

⁷ Tchoira miyo dagali Yehova Mulugu wenyu duhurelihani muwari mwa mabasa matene munalaba nyo na mandinyu, mwasiwa miyo dihiiziwa ira nyo munawendawenda muisalesaleni indimuwa mu. Eto yaka 40 mumanle nyo muisalesaleni, miyo dagali Yehova Mulugu wenyu dalive na nyo. Tchalivo yengo ili yatene yauhalenleni.>> > >>

⁸ Evale Mozeji ohowongaga na aIzarayeli eraga: <<Mwa enne hiyo niviraga ilambo ya abalihu ana Ezawu anno kakala Seyire, roma ndila ya ilambo ya Araba kuma Elate na Eziyomi-Jeberi, nohorungunuwa hiyo roma hara ndila ya isalesale ya Mowabe.

⁹ Mwa enne Yehova ohodiwandelaga eraga: <Kwamexeri akuda Mowabe, nne kukangane na aliwa uvendaga jowana, mwasiwa miyo kannauvaha pandi ili yatene ya ilambo yewa ira utukule. Tchoira miyo dahavaha ahima a Lroti sidadi ya Ari ira ikale yewa.> >>

¹⁰ (Fwanyeya ira wanle nohokalawo nlogo na atu olapa bure, a kopolo nnga aAnaki, kagali oindjivetchetcha, kaitaniwetcha aEmi, kakaletcha sidadi ya Ari.

¹¹ Aliwa vamohi na aAnaki ale kabalriwa nnga akuda Refayina. Mbwenye akuda Mowabe kaaitanetcha aEmi.

¹² Eto wanle akuda Hori kakaletcha Seyire. Mbwenye ana Ezawu kohatamangiha mwilamboni mwewa, aliwa mala atolotcha, aliwa halana ilambwele kalaga nnga jairile aIzarayeli na vilambo dedo Yehova aavahile liye ira dikale dewa.)

¹³ Mozeji ohowongagave eraga: <<Yehova ohoniwandelaga eraga: <Muvenye mulambuwe mwana muhindje wa Zeredi.> Evale hiyo noholambuwa mwana muhindje wa Zeredi.

¹⁴ Kuma Kadeji-Barneya ante dowa lambuwa mwana muhindje wa Zeredi ule namanle yaka 38, fiyeda alombwana atene okana idadi yodowa kondoni a tempu yenno aliwa mala kwa, aliwa dimela vari vehu nnga mwemo mwalumbenle Yehova.

¹⁵ Tchoira Yehova gwairihile na ndanda naye na kopolo ira atene kamale tolowa tempu yenne fiyeda atolotcha atene ira kahafwanyeye muwari mwa hiyo.

¹⁶ <<Evale alombwana atene okana idadi yodowa kondoni kagamanle tolowa vari vehu,

¹⁷ Yehova ohodiwandelaga eraga:

¹⁸ <Peno muvire mmadilreni mwa Mowabe sidadi ya Ari,

¹⁹ ante mudowe mwafiye ilambo ya akuda Amoni. Mwafiya wewule, kamwamexeri nne kamukangane na aliwa. Tchoira ilambo ya aAmoni miyo kaduvahileni pandi ili yatene ira ikale yenyu. Mbwenye daavahile ahima a Lroti ira ikale ilambo yewa.> >>

²⁰ (Fwanyeya ira ilambo ya akuda Amoni wanle yabalriwa nnga ilambo ya akuda Refayina. Tchoira wanle akuda Refayina bakalamo. Mbwenye akuda Amoni kaaitanetcha aZanzumi.

²¹ Aliwa kali atu oindjivetchetcha eto kali alukulu eto kali olapa nnga akuda Anaki. Mbwenye Yehova ohatolotcha. Mwa enne aAmoni ale kohatamangihamo mwilamboni mule, aliwa kalagamo vamalroni vewa.

²² Yehova ohairana makalelo amohive molingana na makalelo airilena liye akuda Ezawu anno kakala Seyire wewo waatolotchile atu akuda Hori. Evale akuda Ezawu kohatamangihamo mwilamboni mwewa, aliwa kalagamo vamalroni vewa, fiyeda peno.

²³ Eto akuda Kafitori anno kakumile mwilamboni mwa Kafitori kohotolotcha tatamo da akuda Ava, fiyeda Gaza, aliwa kalagamo vamalroni vewa.)

²⁴ Mozeji ohowongagave eraga: <<Yehova eto ohodiwandelaga eraga: <Muvenye mudowe mwalambuwe mwana muhindje wa Arinoni. Tchoira miyo dihimala uvahedani mmandani mwenyu mulombwana Seyoni nkuda Amore mwene wa Ejiboni vamohi na ilambo yaye yatene. Mudowe mwawane na liye ira mutukule ilambo yenne.

²⁵ Peno miyo nnoroma sakanya ira atu a mwilamboni yatene ya vati kasimbwege uovani. Atu atene kavwa zela nyo, anerege ngurumela sogolro wenyu eto anerege kukumuwa.> >>

Mozeji ohawumbutcheda aIzarayeli zela gondjihiwa wa mwene Seyoni

²⁶ Mozeji ohowongagave eraga: <<Yehova agadiwandenle, miyo doharumaga atu na milanyo kuma isalesale ya Kedemoti wafwanyeya hiyo ira kadowe wa Seyoni, mwene wa Ejiboni. Miyo daarumile ira kadowe kamuwandele mazu a murendele ira:

²⁷ <Nnavepa ira munihiye ira nivire mwilamboni mwenyu. So nnafuna nivire mundila bahi. Kannaperuwa nne para muwononi odjana nne para muwononi oromana.

²⁸ Eto nnavepa ira jodja jinafuna hiyo djaga munigulihedege na kobiri eto munigulihedege mahindje ong'wa. So nnavepa ira munihiye nivire bahi na mendo

²⁹ nnga jiniirele ana Ezawu anno anakala Seyire vamohi na akuda Mowabe anno anakala Ari. Munihiye nivire ira nalambuwe muhindje Jordawu, nidowe ilambo yenno inafuna nivaha Yehova Mulugu wehu.>

³⁰ <<Mbwenye miyo dagarumihile milanyo dile, mulombwana Seyoni mwene wa Ejiboni ule kafunile. Ohonikondiha hiyo vira mwilamboni mwaye, tchoira Yehova Mulugu wenyu ohomuummiha murima waye, liye nvaha murima onyinda ira ahanibalre. Mulugu airelena eno ira auvahedeni Seyoni mmandani mwenyu nnga munaonela nyo peno.

³¹ Eto Yehova ohodiwandelaga eraga: <Miyo dihiroma uvahedani mulombwana Seyoni vamohi na ilambo yaye yatene sogolro wenyu. Kadowani mwatukule ira ilambo yaye ikale yenyu.>

³² Evale mulombwana Seyoni ohoza vamohi na anyakondo aye, aliwa gumana na hiyo sidadi ya Jaza ira niwane.

³³ Mwa eno, Yehova Mulugu wehu ohonivaheda mmandani mwihu, hiyo mpa liye na ahimaye vamohi na atwaye atene.

³⁴ Evale nohogondjiha sidadi daye datene, eto hiyo mala tolotcha sidadi datene dedile, hiyo mala apamo alombwana na ahiyana vamohi na ahima kafwanyeya emule. Nne mutu mmohi kanamuhiyile.

³⁵ So mbwenye natukunlege hiyo ja meso jene ali jifuwo jiwa ira jikale jehu vamohi na jengo jatukunle hiyo sidadi dimohi diwa dedo dagondjihile hiyo.

³⁶ Romela sidadi ya Aroweri, yenno inafwanyeya wandamelana tcherela ya mwana muhindje wa Arinoni vamohi na sidadi inafwanyeya wandamelana muhindje ule, ante dowa fiya Jileyadi, kilivo nne sidadi imohi yokana muru olapa yawandile vuluwa, nahaitolotcha. Jatene ejo Yehova Mulugu wehu ohonivaheda mmandani mwihu.

³⁷ So ilambo yahafiyile hiyo ali ilambo yatene ya ana Amoni, romela tcherela yatene ya mwana muhindje wa Jaboke, vamohi na sidadi datene da ilambo ya mwango didjindji. Mwatene mwanikondihile Yehova Mulugu wehu, kanafiyilemo.>>