Detoronomiyo 19 - Mazu Otchena a Mulungu

Mozeji ohawandela aIzarayeli zela sidadi dotawelamo

¹ Mozeji ohowongagave eraga: <<Yehova Mulugu wenyu amala adulamo malogo a ilambo yenno inafuna liye uvahani, nyo mwamala atamangihamo, mwaroma kala muwari mwa sidadi dewa na nyumba diwa,

² inafwanela musakulre sidadi taru muwari mwa ilambo yenno inafuna uvahani Yehova Mulugu wenyu ira ikale yenyu.

³ Ilambo yatene inafuna Yehova Mulugu wenyu auvaheni, mugawe ira ikayena pandi taru ira kada pandi ikayena sidadi imohi yotawelamo eto kada sidadi yotawelamo ikayegena rampa niwa. Sidadi taru dile nnalabege ira mutu wenne unampe nfwaye ahali mofuna mwaye, awandege tawelamo.

⁴ <<Unafuna tawelaga sidadi dedile ira ahapiwe, gu mutu wenne unampe nfwaye ahali mofuna mwaye eto wenno ahamwidile liye wanle.

⁵ Kalaga nnga mutu avenya, adowa muguguruni na nfwaye ira karebe kuni, akakataga mutengo, mbazo yakuleya yanfwanya nfwaye ule, imporotcha afiyeda kwa, mutu wenne umpile nfwaye ule unodowa atawele sidadi imohi muwari mwa sidadi dedile ira ahapiwe.

⁶ Tawiha ira maliba weliha kunyakunya muwari mwa abali a mutu ukwile ule, atakaleliwa bure mmirimani mwaye unaze amutamangihe afiyede nfwanya, ampe, na mwasa oira ndiliwa ihilapela. Mwa enne unompa agali liye kafwanele piwa, mwasiwa liye wanle kamuidetcha.

⁷ Nona duwandelagani diiraga: <Musakulre sidadi taru ira dikale sidadi dotawelamo.>

^8-9 Nyo mwaharihagamo malamulo matene nnauwandelani miyo peno ira mukwakwanelihedege, mmuzivelaga Yehova Mulugu wenyu eto muharaga ndila daye malambo matene, Yehova Mulugu wenyu unoza aulukulihe ilambo yenyu nnga mwemo mwalumbenle liye na makolo enyu eto unouvahani ilambo yatene yenno yalumbenle liye avaha makolo enyu. Yaireya eno, munowendjeda sidadi taru dimohi diwa kwaranya taru di,

¹⁰ tawiha ira ilambo inafuna uvahani Yehova Mulugu wenyu ira ikale yenyu, munavuvihiwege sangiri na atu ohotegene eto nyo munaze mufwanyeyena mulandu ovuviha sangiri na atu kahategile.

¹¹ <<Mbwenye akalavo mutu amuidetcha nfwaye eto amutchingaga, mwa enne avenya adowa amuirela yabure, amporotcha, afiyeda kwa, amala avenya adowa atawela sidadi imohi muwari mwa sidadi dile,

¹² mutu wenne mbwenye, andimuwa a sidadi inakala liye anoaruma atu ira kadowe kamukumihemo, kadowe kanvahede mmandani mwa namaweliha kunyakunya ira akwe.

¹³ Kakalevo unafuna muwendela tangaranga. Mbwenye inafwanela mumalihege ubure unafwanyeya muIzarayeli zela apa atu ohokana yabure ira mwahakayena mulandu eto jenyu juwendelegeni pama.

Mozeji ohawandela aIzarayeli zela madilre vamohi na umboni

¹⁴ <<Mwavolowa ilambo yenno inafuna Yehova Mulugu wenyu uvahani ira ikale yenyu, makolo enyu kahela madilre zela kada mutu ilambo inawatchele liye, nyo kamususihege madilre, nyo volowaga tereno ya nfwinyu.

¹⁵ <<Akalavo mutu unawanganyediwana yabure nari yotega ili yatene, ira agwena mulandu inafwanela uoneye umboni wa atu ambinli owu hehi araru. Mbwenye kakalevo unafuna gwihiwana mulandu na umboni wa mutu mmohi.

¹⁶ Eto akalawo mutu mmohi amunukedaga nfwaye zela yabure,

¹⁷ inafwanela ambinlene kadowe vamentoni va Yehova, vari va anamakuta na anamatonga anafuna kalawo tempu yenno.

¹⁸ Mwa enne anamatonga ale kafukede, kavwemo pama. Evale aliwa kawanda iziwa ira mutule ohomunukeda mbalaye,

¹⁹ inafwanela kamutonge na makalelo nnga mwafunela liye nnga nfwaye ule atongiwe. Ayo ba makalelo anafuna nyo malihaga ubure vari venyu.

²⁰ Ili ira ale anahala, kavwa, kaovege eto ira kahawelele akoka irana yengo yabure imohive vari venyu.

²¹ Eto kammuwendele tangaranga mutu. Akala ku piwa, apiwe. Nari akala niso, atwiwe niso naye. Nari akala nino, akotoliwe nino naye, nari akala ndanda, agwadiwe ndanda naye, nari akala nnyalo, agwadiwe nnyalo naye.>>