Detoronomiyo 12 - Mazu Otchena a Mulungu

Mozeji ohawandela aIzarayeli zela makalelo apama omutamalela Yehova

¹ Mozeji ohowongagave eraga: <<Mwadowa ilambo yenno Yehova Mulugu wa makolo enyu inauvahani liye ira ikale yenyu, inafwanela muing'ane pama ira muharihegemo mangano na jotonga jatene ji malambo matene anafuna nyo kalawo mwilamboni ya vati:

² Mwadowa, mwabwanyulege mamburo matene mwemo annya a ilambwele munaatamaleletcha atu amilugu ewa, vazulu va mwango dolapa, na mmikumani vamohi na vati va mitengo datene da matakuru gubugubu.

³ Eto mubwanyulege vibuwa dewa, mutwege mambozo a mabwe anno anaatamalela atu nnga amilugu ewa, mutumeyege mambozo a mulugu wewa Azera eto mugwihege jolandaniha josemiwa ja amilugu ewa ira mudimelihe mazina a amilugu ewa mamburo anne.

⁴ Eto nyo kammutamalelege Yehova Mulugu wenyu na makalelo nnga aliwa anaatamalela atu amilugu ewa.

⁵ <<Mbwenye nyo munadowege mwamutamalelege nimburo neno Yehova Mulugu wenyu unasakulre liye muwari mwa malogo enyu matene ira akalegewo eto nzina naye nitamaleleiwege wewo. Nyo munadowege mwamutamalelege wewo.

⁶ Nyo munerege zana mikuto dotumeya na mikuto dimohi diwa, vamohi na yanekumi ya jatene jinakayegena nyo, vamohi na jovelela ja sokasoka, vamohi na jovelela jokwakwaneliheda yolumbela, vamohi na jovelela ja mutu funa waye, vamohi na arandji reliwa a ng'ombe dinyu vamohi na mabila enyu.

⁷ Mwa enne nyo munodowa mwadjege vamentoni va Yehova Mulugu wenyu, vamohi no hagalala romela nyo vamohi na atu atene a vande venyu zela mabasa matene mulabile nyo, nnga Nabwiya Mulugu munaureliheleni liye.

⁸ <<Mwadowa ilambo yenne kamuiregena nnga jejo jinairana hiyo uno peno, kada mutu airagana yenno inamuzivela.

⁹ Tchoira nyo kamunakayena vuma nne kamunawatchele ilambo yenno inafuna uvahani Yehova Mulugu wenyu.

¹⁰ Mbwenye mwalambuwa muhindje Jordawu, mwadowa kalaga ilambo yenno inafuna uvahani Yehova Mulugu wenyu, wewule Yehova auvahani vuma zela amwidaninyu atene anno kauwerewerileni eto mwakalagawo mwa murendele,

¹¹ evale Yehova Mulugu wenyu unoza akayena nimburo nnafuna liye sakulra ira nzina naye nikalege wewule. Nyo munerege velela nimburo neno jatene jinauwandelani miyo ji: mikuto dotumeya, na mikuto denyu datene, na janekumi jenyu, na jovelela ja sokasoka jokumela mmandani mwenyu vamohi na jovelela japama jokwakwaneliheda jolumbela jenyu jinalumbelege nyo wa Yehova.

¹² Eto munerege hagalala vamentoni va Yehova Mulugu wenyu, mudjege pwando evo, romela weyo vamohi na ahimawo a anapongwe vamohi na ahimawo a anavihiyana, na anamalaba awo a anapongwe na anamalaba a anavihiyana, na muLevi watene unafwanyeya mutatamoni mwawo. Tchoira aliwa kinagaweliwa ilambo vamohi na nyo.

¹³ Polre polre tawiha ira munarome velela mikuto denyu dotumeya nimburo nili natene nnaone nyo.

¹⁴ Mbwenye mudowege nimburo neno nnafuna sakulra Yehova muwari mwa malogo enyu, mwavelelege mikuto denyu dotumeya wewo vamohi no irana jatene jinaurumani miyo.

Mozeji ohawandela aIzarayeli zela makalelo odja nyama

¹⁵ <<Mbwenye mwafunaga dja nyama, munerege pa nyama mudjege mmavande mwenyu munakala nyo ante vinafunela nyo, malringana makalelo unaureliheni Yehova Mulugu wenyu. Atu atene anerege dja masiki atu anne anafwanyeya kagatakanle nari atu anne anafwanyeya kagali apamene. Mudjege nnga munadjela nyo nase na nangoma.

¹⁶ So mbwenye sangiri niwa kamudje, mutatilelege vati nnga mahindje.

¹⁷ <<So mbwenye mwafunaga dja yanekumi ya johanda ja mmundani, yanekumi ya vinyu, na yanekumi ya azeti, yanekumi ya arandji reliwa a ng'ombe dinyu, na mabila enyu, nari yovelela ili yatene yokwakwaneliheda jolumbela wa Yehova, na jovelela jenyu jinavelela nyo mofuna mwenyu, nari josokasoka jinafuna nyo velela, jatene jejo mwafunaga dja, kamudjege vande venyu sidadi yenno inakala nyo, nari.

¹⁸ Mbwenye inafwanela mudowegena mwadjege jatene ejo vamentoni va Yehova Mulugu wenyu, nimburo neno nnafuna sakulra Yehova Mulugu wenyu. Dja uwa kunadja weka mbwenye unadja na ahimawo a anapongwe vamohi na ahimawo a anavihiyana, na anamalaba awo a anapongwe na anamalaba a anavihiyana, na muLevi uli watene unafwanyeya mutatamoni mwawo. Eto munerege hagalala vamentoni va Yehova Mulugu wenyu, mudjaga jatene malringana makalelo ugomenle we na jokana jawo.

¹⁹ Polre polre tawiha ira mwadjaga, munaalramwisege aLevi malambo matene anafuna nyo kala mwilamboni mule.

²⁰ <<Yehova Mulugu wenyu amala ulukuliha ilambo yenyu nnga mulumbenle liye eto mwaroma kana kwilu mufunaga nnga mudje nyama, nyo podi djaga nyama ante vinafunela nyo.

²¹ Eto nimburo nnafuna sakulra Yehova Mulugu wenyu ira nzina naye nitamaleliwege wewo wasimbwa lapela bure, nyo podi pa na makalelo duwandenleni miyo mabila enyu na ng'ombe dinyu dedo Yehova unauvaheni liye, mudje vande, mwagali sidadi yenyu fiyeda vanafunela nyo.

²² Mudjege nnga munadjela nyo nase na nangoma. Eto atu atene romela atu anne anafwanyeya kagatakanle nari atu anne anafwanyeya kagali apamene, anerege dja.

²³ So mbwenye polre polre tawiha ira munadje sangiri niwa. Tchoira sangiri nnafwanyeya nagali ingumi. Nona, kamudjege sangiri vamohi na nyamiwa.

²⁴ Kamudjege sangiri. Mbwenye inafwanela mutatilelege vati nnga mahindje.

²⁵ Mwahadjege sangiri eto mwakala atu oirana jokwakwanela vamentoni va Yehova, jatene jinerege uwendelani pama romela nyo vamohi na ahiminyu.

²⁶ <<Mbwenye jengo jotchenihiwa jinna nyo, vamohi na mikuto datene dokwakwaneliheda jolumbela jenyu wa Yehova, inafwanela mudowegena nimburo neno nnafuna sakulra Yehova.

²⁷ Mwavelelaga mikuto dotumeya, nyamiwa vamohi na sangiri niwa nene mutumeyege vaibuwani va Yehova Mulugu wenyu. Eto zela mikuto dimohi diwa, sangiri niwa mukutulelege vaibuwani vale, mbwenye nyamiwa munerege dja.

²⁸ Inafwanela mukoyege eto muharihegemo mazu matene anauwandelani miyo ala ira jenyu jatene juwendelegeni pama romela nyo vamohi na ahiminyu anno anafuna baliwa musogolro. Mwakala atu oirana japama eto jofwanela vamentoni va Yehova Mulugu wenyu, jatene jinerege uwendelani pama.

Yokokomeza ira aIzarayeli kamuharege Yehova Mulugu bahi.

²⁹ <<Yehova Mulugu wenyu amala adula vasogolro venyu atu a malogo a ilambo yenno inafuna nyo dowa ira yakale yenyu, mwagamanle tukula ilambwele, mwaroma kala mwemule,

³⁰ aliwa kamala tolotchiwa vasogolro venyu, polre polre tawiha ira munatukule makalelo kanna atu. Eto nne kamurome funaga joahara amilugu ewa muiraga: <Na miyene nnafuna dirome ahara amilugu ewa molingana na makalelo kahara atu.>

³¹ Eto nne kammutamalelege Yehova Mulugu wenyu molingana na makalelo kaatamalela atu amilugu ewa. Tchoira aliwa muwari moatamalela amilugu ewa, anosakanya jabure jatene jotakaletchetcha ejo Yehova unaida liye. Aliwa anofiyeda atumeya ahimiwa a anapongwe na anavihiyana, aliwa avelelaga wa amilugu ewa.

³² <<Inafwanela muharihegemo jatene jinauwandelani miyo. Kamuwendjede nne kamuvungule.>>