Daniyeli 9 - Mazu Otchena a Mulungu

Daniyeli ohalobelela aIzarayeli

¹ Muwari mwa yaka yoroma yatonga mulombwana Dariyo mwana Asuwero, nkuda Mediya, mwene wa aBabiloniya,

² yaka yoroma ya umwene waye, miyo mulombwana Daniyeli dagatukunle malivuru, diilerigi mazu a Yehova kalrembiwe na namafiyiheda Jeremiya, dohofwanyaga ira sidadi ya Jeruzalemu yafuna ikale yobwanyuliwene fiyeda vimale yaka 70.

³ Na mwasa wenne, miyo dohoing'anihaga kove yaga wa Nabwiya Mulugu dinvepaga eto dilobelaga ira aniwendele tangaranga. Muwari molobela mule, miyo dohojejuwarigi, dagawarile sakwi, dagamanle vizoliha ndora.

⁴ Doholobelaga wa Yehova Mulugu waga, dilrapaga jotega jehu diiraga: <<Nyo Nabwiya, muli Mulugu mundimuwa eto owopiha. Nyo munohariha yopangana yenno musakanyile nyo eto munoaoniha zivela wenyu atu anne anauziveliwani na atu anne anahariha malamulo enyu!

⁵ Hiyo nihitega, nihisakanya yabure, nihiirana jotakala jahanafuna nyo, nihiya uvwelelani, nihiyaga malamulo enyu na mangano enyu.

⁶ Hiyo kanaavwelenle anamalaba enyu, anamafiyiheda anno kawonga na nzina nenyu kaawandelaga mazu amwene ehu, asogolrelri ehu, ababihu, vamohi na atu atene a mwilamboni.

⁷ <<Nabwiya nyo muli mwinnya wa upama. Mbwenye hiyo nili annya oirana ja manyazo vatando vene pakana peno. Oirana ja manyazo ba alombwana a Juda na atu atene anakala muJeruzalemu na aIzarayeli atene, masiki ale anakala vakwikwive na Jeruzalemu nari ale mwaavokenle nyo vilambo didjindji dolapela na mwasa wa ubure usakanyile atu wa nyo.

⁸ Yehova, hiyo nili annya oirana ja manyazo vatando vene, romela hiyo, amwene ehu, asogolrelri ehu na ababihu mwasiwa hiyo ninnana utegelani nyo.

⁹ Mbwenye nyo Nabwiya Mulugu wehu muli wa tangaranga eto muli okurumuwela, masiki hiyo nikondagave jofuna jenyu.

¹⁰ Hiyo Yehova Mulugu wehu kanivwelenle mazu mwaniwandenle nyo, kanifunile hara malamulo anno mwanivahile nyo muwari mwa azari enyu anno anafwanyeya kagali anamafiyiheda.

¹¹ Hiyo aIzarayeli atene nihiviringaniha malamulo enyu, nihimala peruwa. Nihikonda vwelela mazu enyu. Na mwasa wenno nyo muhuwanda nivaha matembelrelro na ubure watene ulrembiwe mmalamuloni mwa namalaba wenyu Mozeji mwasiwa hiyo nuhutegelani nyo.

¹² Nyo muhuwanda nizelana ubure wohokala wa masika muwari mokwakwaneliheda mazu enyu mwawongile nyo zela hiyo vamohi na amwene ehu atene anatonga. Mwasiwa makalelo abure munitongile nyo Jeruzalemu, kinababihe ireya mwilamboni yatene ya vati.

¹³ Ubure watene wenno unizenle nnga mulrembiwele atu mmalamuloni a Mozeji. Masiki eno, kanivendile wendeliwa tangaranga na nyo Yehova Mulugu wehu eto kaniwandile hiya joviringaniha jehu, nne kaniwandile sakasaka ira niwandege wenda na ibaribari inafuna nyo.

¹⁴ Na mwasa wenno nyo Yehova muhuwanda nitonga na makalelo anna, munizelagana ubure wenna mwamanle nyo balra wanle. Nyo Yehova Mulugu wehu muhusakanya pama muwari mwa jatene jairile nyo tchoira hiyo kanifunile uvwelelani.

¹⁵ Nyo Nabwiya Mulugu wehu, muhuwanda akumiha atwinyu Ijipitu muwari mwa ndanda nenyu wa kopolo. Eto muhuwanda vweyiha nzina nenyu ira muteteliwe fiyeda peno. Mbwenye hiyo ninnanave utegelani, nuirelagani jabure.

¹⁶ <<Nabwiya, voira nyo munairetcha jatene japama, nnouvepani mukwihe takaleliwa wenyu na uwali wenyu munna nyo zela sidadi yenyu ya Jeruzalemu, yenno inafwanyeya yagali mwango wenyu otchena. So Nabwiya, atu a vilambo dowandamelana anopeta sidadi ya Jeruzalemu eto anapeta mulogo wenyu na mwasa wa jotega jehu na jotega jasakanyile makolo ehu a wanle.

¹⁷ Nona so Mulugu wehu muvuruwane yolobela ya miyo namalaba wenyu. Muvuruwane jovepa jaga ira muniwendele tangaranga. So Nabwiya wandani ing'ana moziveliwa nimburo ninyu notchena nnafwanyeya vagali vadebe peno para atu atene kaiziwe ira nyo muli Mulugu!

¹⁸ So Mulugu waga, mureye mabaru enyu, muvuruwane. Mugudubulre meso enyu muniing'ane hiyo mugoyini munafwanyeya hiyo. Muing'ane sidadi yenno inaitaniwa na nzina nenyu. Hiyo nauvepagani eni, kannauvepelani moira niire kala atu apama, nari. Mbwenye nnauvepelani na mwasa wa tangaranga dinyu dilukulu.

¹⁹ So Nabwiya nivuruwaneni. So Nabwiya, munikurumuwele. So Mulugu waga munibalre eto muze munikamihede. Muze munivunele mohodibeliwa ira atu atene kaiziwe ira nyo muli Mulugu. Tchoira hiyo vamohi na sidadi ya Jeruzalemu, nnaitaniwa na nzina nenyu.>>

Mungelro Gabiriyeli ohomuwandela Daniyeli yotapulela ya mazu afiyihedile Jeremiya

²⁰ <<Miyo diwongagave, dagali vari volobela, dilrapaga jotega jaga na jotega ja mulogo waga wa Izarayeli eto dinvepaga Yehova Mulugu waga ira avenyihede mwango waye otchena,

²¹ mwa enne dilobelagave, mungelro Gabiriyeli, wenne damuonile miyo dirohaga voroma vale, ohozaga avavaga mobaranya, liye za vakwikwive na vafwanyeya miyo. Aligi tempu yovelela mikuto ya tchiguwo.

²² Agazile ohodifundjihaga awongaga eraga: <Daniyeli miyo dizile wa weyo ira duvahe toto no onelramo zela jionne we!

²³ Uromaga wene vepa tangaranga, miyo dohovahiwa mazu ira dize duwandelemo, mwasiwa weyo uli mutu oziveliwiwa valukulu. Nona inafwanela uvuruwane pama mazu anafuna miyo wonga ira uonelremo jatene jionihiwe we morohani!

²⁴ <<Eni mulogo wawo vamohi na sidadiwene yotchena kohovahiwa sumana 70 ira jengo tanu na imohi ji jiireye: Yoroma, kawande hiya jabure jiwa jatene jinaira atu. Yanembinli, kawande gomiheda jotega jiwa jatene. Yaneraru, jotakala jimalihiwe. Yowelela, uze upama wohomala. Yowelela, jiwande kwakwanela jatene jawongiwa morohani vamohi na jofiyiheda. Yogomiheda, Nimburo Notchenetchetcha niwande venyihediwa.

²⁵ Kavuruwana pama eto uonelremo inafuna miyo wonga. Kuma vinafuna za nlamulo ira sidadi ya Jeruzalemu imangiwe vamohi no sakanyediwa akoka, fiyeda mazelo a musogolrelri wenno usakulriwe na Mulugu, vinavira sumana tanu na mbinli. Eto amala vinavira sumana 62 para Jeruzalemu amangiwe akoka aganna marampa na muru olimba orungunuwa sidadile. Mbwenye para mangiwa akoka, jinaireya muwari mwa goyi yohokala ya masika.

²⁶ <<Magomelo wa sumana 62 dile, wenno usakulriwe na Mulugu ule unopiwa, agomeleve eno. Era eno ukalawo mwene unafuna za vamohi na nikuru naye na anyakondo, aze abwanyule sidadi yatene vamohi na Nyumba ya Yehova. Mbwenye goma waye unoza umuzele nnga za wa mahindje madjindji. Inoza ivenye kondo vamohi na jobwanyula jatene Mulugu amanle liye balra ira azena mwilamboni, fiyeda makutulo.

²⁷ Mwene muxole agazile, unosakanya yopangana yaye yolimba na atu adjindji fiyeda sumana imohi. Mbwenye vamala metadi ya sumana ile, liye unomaliha mikuto na jovelela ira atu kahavelelege Nyumba ya Yehova! Eto unotukula yengo yabure yohokala ya masika, yengo yotakaliha Nyumba ya Yehova, aimetche muNyumbani mule. Yengo yotakaliha ile inokalave eno fiyeda Mulugu amutonge mwene ule na uwali waye nnga mwamanle liye balra wanle.> >>