Daniyeli 8 - Mazu Otchena a Mulungu

Yoroha ya Daniyeli zela nibila vamohi na mbuzi

¹ Yaka yaneraru yatonga mwene Belisazare, miyo dagali mulombwana Daniyeli dagaonihiwe joroha joroma jile, dohowelela onihiwa jimohi jiwa mmuruni mwaga.

² Muwari mwa jengo jaonihiwa miyo mmuruni mwaga, akala nnga dili sidadi ya Suzani, pandi umangiwe ja umwene ja porovinsiya ya Elamu, dagali muhindje wa Ulayi.

³ Mwa enne dagavenyihile meso aga diing'anaga, mobaranya dohoonaga nibila na mulombwana nagaimenle tcherela ya muhindje. Nibila nne nanna manyanga menli. Manyangale kali olapetchetcha. Mbwenye muwari molapa mule, nohokalavo nnyanga nimohi nali nolapa bure mukwaranya nfwaye. Eto nnyanga nolapa nne nali nowelela mela nfwaye agamelile.

⁴ Muwari moing'ana, dohoonaga nibila nne nitamangaga muwari moagondjiha atu a mavirelo wa nzuwa, nomala pandi ya norti, nomala pandi ya suli. Kalivo mwanainyama uli watene awanda wana na liye fiyeda mugondjiha. Kalivo awanda avunela aliba gondjihiwa. Liye oirana yatene yafuna liye eto kopolo daye dodowave musogolro.

⁵ Mwa enne miyo diumbuwelaga ejile, mobaranya dohomuonaga nakoro wa mbuzi akumelaga mavirelo wa nzuwa, aviraga ilambo ya vati ahasakwinyile teya. Mbuzi ile yohokana nnyanga nooneya pama vari va meso aye.

⁶ Mbuzile yohotamangaga na uwali wohokala wa masika na kopolo izaga wa nibila nanna manyanga menli nne, neno daonne miyo nagaimenle wandamelana mwiko mule.

⁷ Dohoonaga mbuzile ifiyaga wandamelana vafwanyeya nibila nne, no takaleliwa waye wene. Evale ohobubudaga nibila nne, liye mala kotolawo manyangaye amenlene anne. Evale nibila nne kananna kopolo ira niwande vivunela. Evale mbuzile yohogwiheda nibila nne vati, liye ninyingala na manyalo aye. Eto kalivo afuna za ira avunele nibila nne muwari mwa kopolo da mbuzi.

⁸ Mwa enne mbuzile yohokalave yolimbene na makalelo ohokala a masika. Mbwenye yagalive muwari mwa kopolo daye, nnyanga naye nlukulu nne nohokotoliwagavo. Eto vamalroni va nnyanga nimohi vale, vohomelaga manyanga mamohiwa mannayi olapa, anno kaulukula kalimbelaga pandi dannayi dene da ilambo.

⁹ Eto mwa manyanga mannayi ale, vannyangani nimohi vohomelaga nnyanga nimohi niwa ning'ining'ini, aliwa ulukula na makalelo ohokala a masika nilimbelaga pandi ya suli na pandi ya makumelo wa nzuwa eto nilimbelaga ilambo yotitimihiwa ya Izarayeli.

¹⁰ Evale nnyanga nne nohoulukulaga ante aliwa fiyeda nikuru na zulu. Eto nagafiyile zulu ule, nnyanga nne nohamoriheda vati atu amohiwa kafwanyeya muwari mwa nikuru na zulu nne vamohi na nyenyedi dimohi diwa. Jagamorenle vati, liye ohonyingalelaga.

¹¹ Na ibaribari nnyanga nne nohoviulukulihaga fiyeda jofuna lingana na musogolrelri wa nikuru na zulu nne. Nnyanga nne nohomaliha mikuto dotumeya da malambo matene daveleliwetcha wa musogolrelri ule eto nohokarakasulaga nimburo naye notchena.

¹² Na mwasa wa jotega ja atu a Mulugu, mikuto dotumeya da malambo matene vamohi na nikuru natene na wewule nohovahediwa mmandani mwa nnyanga nne. Nnyanga nne nohotukulaga ibaribari, moriheda vati. Eto nodowave sogolro nigondjihaga.

¹³ Noira eno, dohovwaga mutu mmohi otchena awongaga. Evale mutu otchena mmohiwa ohonfukaga wenno awongaga, liye ira: <<Kodi jengo jionihiwe nfwihu zela goma wa mikuto dotumeya da malambo matene eto yotega yomaliha mabasa a Nyumba ya Yehova eto nyumbele na nikuru na zulu jinyingaliwaga, jatene ejo jinafuna jimale malambo mangasi?>>

¹⁴ Mwa enne dohonvwaga mungelro nfwaye ule adiwandelaga eraga: <<Jeji jinaza jimale vagamanle mahiyu na ntana 2.300. Era eno Nyumba ya Yehova inotchenihiwa akoka!>>

Mungelro Gabiriyeli ohomuwandela Daniyeli yotapulela ya yoroha

¹⁵ Miyo Daniyeli dagaonihiwe jejile, dohosakaga iziwelamo. Mwa enne ukala azilege vasogolro vaga akalaga nnga mutu.

¹⁶ Evale dohovwaga nizu na mutu nakumelaga mmambalo mwa muhindje Ulayi mule, akuwaga eraga: <<Gabiriyeli, kamuiziwihe jatene eji mutula!>>

¹⁷ Mwa enne Gabiriyeli ohozaga adiwandamelaga vevo vaimenle miyo. Evale miyo dagamuonile, dohokagana ova wohokala wa masika eto dohogwelaga vati na koveni. Mbwenye liye ohodiwandelaga eraga: <<Kavuruwana we mwana wa mutu. Inafwanela uiziwe ira jejo jionihiwe we, jinawonga zela tempu yogomiheda!>>

¹⁸ Evale liye awongaga na miyo, dohogonelagavo kove dohokala da masika dagaing'anihileve kove yaga vati. Eto liye ohodihindaga, liye diimeliha.

¹⁹ Eto ohodiwandelaga eraga: <<Kaing'ana. Miyo nnafuna duiziwihe uwali wa Mulugu unafuna za ireya malambo ogomiheda! Mwasiwa jeji jinafuna jize jiireye malambo ogomiheda nnga mwabalrele Mulugu wanle!

²⁰ Nibila na mulombwana naonne we nne, neno nanna manyanga menli, manyanga ayo ba amwene a Mediya na Perisiya.

²¹ <<Mbwenye nakoro wa mbuzi ya mawoya umuonne we, gu umwene wa Geresiya. Eto nnyanga nindimuwa nafwanyeya vari va meso aye, gu mwene oroma.

²² Zela nnyanga nimohi nakotoliwe eto vamalroni vaye kamelagavo manyanga mannayi, ku tapulela ira mwene oroma ule unokotoliwa eto vamalroni vaye vinoza vivenye amwene annayi a munlogoni mwaye, kagane umwene waye, kakale maumwene mannayi. Mbwenye kopolo diwa kannakala nnga kopolo da mwene oroma ule.

²³ Magomelo wa umwene wewa wawandamelaga, joira jiwa jabure jaroma fiyavo pama pama, unoza avenye eto mwene mmohiwa owopiha eto mwinnya owonga ja ungongomwa.

²⁴ Liye utongi waye unoza ukale wa kopolo, mbwenye kopolo diwa kannakala daye. Liye unerege tatamula bwanyula wohokala wa masika, unerege atolotcha atu a kopolo na atu otchenihiwa. Liye unerege irana jatene jinafunege liye.

²⁵ Muwari mwa joxangaxanga jaye, jonyenga jaye jinerege muwendela pama, jidowegeve musogolro. Liye vamentoni vaye unavionege nnga mutu ohokala wa masika. Unoatolotcha atu oindjiva morurumutcha mwene. Eto unovenya ira awane na Musogolrelri wa Asogolrelri Atene. Mbwenye unoza akotoliwe. Eto kotoliwa waye unafuna mukotola kanakala mutu.

²⁶ Eto zela ja mahiyu na ntana okwakwana 2.300 uwandeliwe we, tchi yengo ya ibaribari. Weyo mbwenye kumuwandele mutu uli watene zela jeji. Mwasiwa jeji kahi jengo jinafuna ireya tchineneva. Jinaireya malambo madjindji a sogolro.>>

²⁷ Kagamanle diwandela enne, miyo mulombwana Daniyeli dohokalaga lohulo eto dohomalaga malambo madjindjene dagali murenda. Noira eno, dohovulumuwaga, miyo roma labaga mabasa a mwene. Mbwenye masiki davulumuwileve, dohokalave okukumuwene zela joroha daona miyo jile eto kadawanda onelramo yotapuleliwa.