Daniyeli 7 - Mazu Otchena a Mulungu

Yoroha ya Daniyeli zela anavinyama annayi

¹ Yaka yoroma yatonga Belisazare mwene wa Babiloniya, siku nimohi mulombwana Daniyeli agagonatile vakamani vaye, ohokana yoroha yaye, vamohi na jengo jaonihiwa liye mmuruni mwaye. Noira enne, oholrembaga yoroha ile awongagamo mogwada mwene jaonne liye.

² Mulombwana Daniyeli ohowongaga eraga: <<Miyo dohoonaga jengo mmuruni mwaga na mahiyu. Miyo daonnege nipevo nokumela zulu niombaga pandi dannayi dene da ilambo, nibubudaga mahindje matene a bara indimuwa.

³ Dohaonaga anavinyama andimuwa annayi ohiyana, katavuwaga mbara mule. Kada inyama yanna makalelo ayene.

⁴ Mwanainyama oroma ali nnga podogoma. Eto ohokana mapepelo nnga a kakozi! Eto diing'anagave, mwanainyamole ohoduliwaga mapepelo ale. Evale ohoimelihiwa na manyalo menli ira awendege nnga mutu. Eto ohovahiwa zelru ira awande umbuwela nnga mutu!

⁵ Diing'anagave, dohomuonaga mwanainyama wanembinli, liye ali olingana na urusu. Liye ovenyihaga mwendo mmohi. Eto wanoni waye ohokagana mbaru taru alumile liye na meno aye. Evale eto dohovwaga mazu kawongaga na urusu ule, ira: <Kavenya udowe watakune nyama didjindji!>

⁶ Noira eno, diing'anagave dohomuonaga mwanainyama mmohiwa alingana na nyarugwe. Liye unduli waye ohokana mapepelo mannayi nnga mapepelo a mbalrame. Mwanainyama wenne ohokana miru minnayi eto ohovahiwa utongi!

⁷ Jagaireyile eno, miyo dohowelela diing'anagave muwari mwa jengo jaonne miyo mmuruni mwaga na mahiyu. Muwari moing'ana dohomuonaga mwanainyama wanennayi owopiha na makalelo ohokala a masika, orendjetcha, okana kopolo dohokala da masika anna meno malukulu a momba. Liye otakuna eto ogwadanya eto jimohi jahala, onyingalela na manyalo aye. Mwanainyamole mbwenye ali ohiyana na anavinyama araru amohiwa ale eto ohokana manyanga kumi.

⁸ Miyo diumbuwelaga zela manyangale, diing'anagave, dohoonaga manyanga mararu kaduleyaga na mitchitchi diwa dene ira niwande melavo nnyanga nimohi ning'ining'ini. Nnyanga ning'ining'ini namenlevo nne nohokana meso nnga meso a mutu eto nohokana mulomo awonga mazu ovitukulela.

Daniyeli ohoonihiwa nimburo notonga na Mulugu

⁹ <<Miyo diing'anagave dohoonaga mipando da umwene ditandiwaga. Evale ohokalawo mundimuwa oulula bure azile agarativo. Mundimuwole jowara jaye na nsisi naye jali jotchena nnga ntondje notchena pama. Mpando wa Umwene ule ali nnga malumi a munlo eto mpandole ohokana maroda okala nnga munlo ohindetchetcha.

¹⁰ Eto dohomuona muhindje wa munlo akumaga vampandoni vafwanyeya liye vale. Eto vohokala atu matchikwi na matchikwi kamulaba. Eto atu amohiwa matchikwi na matchikwi ohokala a masika kohoimela vamentoni vaye. Mwa enne liye ohogarati ira arome tonga eto malivuru kohuliwa.

¹¹ <<Mwa enne miyo dohokalelagave ing'ana na mwasa ovwa mazu ovitukulela awongaga nnyanga nne. Dohokalelagave ing'ana fiyeda mwanainyama ule liye piwa. Eto maningo aye kohotolotchiwaga. Tchoira liye ohoveleliwaga ira atumeyiwe na munlo.

¹² Zela anavinyama amohiwa ale, dohaonaga kagawakiwe utongi wewa mbwenye tchapiwe. Eto kohowendjediwa malambo ewa ira kakalewove malambo mamohiwa.

¹³ <<Miyo dohokalelave ing'ana jaona miyo mmuruni mwaga na mahiyu. Mwa enne dohomuonaga mutu mmohi nnga Mwana wa Mutu akumelaga mmiramboni zulu. Evale liye ohodowaga pandi ya evale vafwanyeya mundimuwa oulula bure ule, liye veleliwa vamentoni va mundimuwole.

¹⁴ Eto ohovahiwaga utongi na undimuwa vamohi na umwene ira atu a malogo matene, vilambo datene, atu a viwongelo datene kamulabege. Eto utongi waye gu utongi wa mukalakala wenno wahanamala eto umwene waye kuza ubwanyuliwa.>>

Yotapulela ya yoroha yoroma ya Daniyeli

¹⁵ <<Miyo Daniyeli dagaonne jatene ejile, munemba waga ohokukumuwaga eto jejo jaonaga miyo mmuruni mwaga johodikukumulaga!

¹⁶ Evale dohomususelaga mutu mmohi muwari mwa ale kaimenlege evale, miyo nfuka yotapulela ya jatene ejile. Liye ohodiwakulaga adiiziwihaga yotapulela ya jejile jaonaga miyo jile.

¹⁷ Liye ohodiwandelaga eraga: <Anavinyama alukulu annayi waaonne we ala, ba amwene annayi anafuna za tongaga mwilamboni ya vati!

¹⁸ Mbwenye umwene wewa unomala, atu otchenihiwa a Wenno Ukwaranyile Jatene anoza kavahiwe umwene eto umwene unafuna atu vahiwa unakala wa malambwene, ku wonga kala no kala.>

¹⁹ <<Noira eno, miyo dohokanamo yofuna ira diiziwe ibaribari zela mwanainyama wanennayi, wenno ali ohiyana na anavinyama araru oromale, wenno ali owopihetchetcha wenno anna meno a momba na vinyala da mukuwa. Wenno atolotcha, agwadanyaga eto anyingalaga na manyalo aye johala jimohi jiwa jile!

²⁰ Eto dohokanamo yofuna ira diiziwe zela manyanga kumi anna liye vamuru vaye eto zela nnyanga nimohi nabwanyunle manyanga mararu ira liye awande garativo, nnyanga neno nanna meso na mulomo owonga jengo jovitukulela eto wenno aoneya nnga wa kopolo kwaranya afwaye ale.

²¹ Miyo Daniyeli eto diing'anagave dohoonaga nnyanga nne niwanaga kondo na atu otchenihiwa, liye agondjihaga

²² fiyeda za wa mundimuwa oulula bure ule. Noira enne, atu otchenihiwa a Wenno Ukwaranyile Jatene paromilege atu tongeliwa milandu diwa. Eto yohofiya tempu atu otchenihiwa aliwa vahiwa umwene.

²³ <<Maliba ditapulela ule, odiwandelaga eraga: <Mwanainyama wanennayi unakala umwene wanennayi wa mwilamboni, wenno unafuna akale ohiyana na maumwene mamohiwa kavirile mundulri mwaye. Umwene wenno unagondjiha ilambo ya vati yatene eto unoza anyingalege na manyalo aye eto unoinyenya.

²⁴ Eto zela manyanga kumi uonile we, ku wonga mwa umwene wenne munokuma amwene kumi. Eto amwene kumi ale kagaoneyile, unoza avenye eto mwene mmohiwa wenno unafuna kala ohiyana na amwene arandji kumi ale. Liye agavenyile, unoagwiha amwene araru kafwanyeya muwari mwa amwene kumi ale.

²⁵ Unerege wonga mazu abure zela Wenno Ukwaranyile Jatene eto unoazuzumiha atu a Wenno Ukwaranyile Jatene fiyeda awaheyiha. Eto liye unerege funa atchindjege matempu na malamulo matene anahara atu. Mwa enne unovahiwa utongi oairela atu otchenihiwa jabure jinafuna liye tempu imohi, na matempu menli eto na tempu ya metadi.

²⁶ <<Mbwenye era eno, anamatonga anogarati vampandoni ira katonge eto anomuwaka utongi watene wanna liye ira utongi waye utolotchiwe ufiyede dimela mudimelelo.

²⁷ Evale umwene, na utongi, na undimuwa wa amwene atene a mwilamboni unoza utukuliwe uvahiwe mmandani mwa atu otchenihiwa a Wenno Ukwaranyile Jatene. Umwene wewa unaza ukale umwene wa mukalakala, eto utongi watene unerege alaba no avwelela aliwene.>

²⁸ <<Wu ku mamalelo wa jengo jionne miyo. Miyo dagali mulombwana Daniyeli dagamanle wandeliwa jatene eji, joumbuwela jaga mmuruni mwaga johokukumuwaga eto dohokalaga lohulo. Mbwenye jatene jeji dohokoyaga mmirimani mwaga.>>