Daniyeli 6 - Mazu Otchena a Mulungu

Daniyeli ohovokediwa mmulihani mwa apodogoma

¹ Mwene Dariyo agagwenle vampandoni, ohasakulraga agovernadore 120 ira kawandege sogolrelra umwene waye watene.

² Noira enne, ohasakulraga aministuru araru ira kawandege aing'anela agovernadore 120 a maporovinsiya ale ira jaye jimuwendelege pama. Muwari mwa aministuru araru ale, mmohi ali mulombwana Daniyeli.

³ Evale mulombwana Daniyeli ohooneyiha kala ministuru owandetchetcha hiyanihana na aministuru afwaye ambinli ale, vamohi na agovernadore ale. Tchoira liye ohokana makalelo apama kwaranya. Mwa enne mwenole agaonne makalelo anna liye, ohelavo zelru ira amuhambihe Daniyeli ule akale mundimuwa wa andimuwa atene a umwene waye.

⁴ Na mwasa wenne, aministuru afwaye ale na agovernadore ale kohoromaga sakasaka muselu oira Daniyeli aoneye nnga ministuru wabure, mbwenye tchawanda fwanya muselu ira kamusumele nne kamuwongele ubure. Tchoira mulombwana Daniyeli ali mutu ororomeleya eto mutu ohokana yoviringaniha nne kaanna yabure yafwanyeyana liye.

⁵ Mwa enne afwaye ale kohowongaga keraga: <<Mulombwana Daniyeli kannanfwanyana yabure ili yatene ira nnodowa namusumele wa mwene. Para niwande nfwanyana ubure, so ikale yengo inazela muwari mwa makalelo anahara liye malamulo a Mulugu waye.>>

⁶ Evale aministuru ale na asogolrelri ale kagamanle vwanana, kohomaruwaga, aliwa dowa nfwanya mwene keraga: <<So mwene Dariyo, umwene wenyu udowegeve sogolro kala no kala.

⁷ Tchoira hiyo andimuwa atene a umwene wenyu, aministuru atene, agovernadore, anamawelruza, na asogolrelri nnaonamo ira yali yofwanela nyo so mwene mukumihe nlamulo noira atu kamale malambo 30 kalobelaga na nzina nenyu bahi. Muwari mwa malambo anno, mutu uli watene unavenye, adowa alobelaga wa mulugu uli watene, nari mutu uli watene ahali nyo so mwene bahi, mutu wenno avokediwe mmulihani mwa apodogoma!

⁸ Hiyo nnafuna ira nyo so mwene mukumihe nlamulo neno, amala muasinari dugumento niwa ira yahawande tchindjiwa, molingana na nlamulo na akuda Mediya na akuda Perisiya. Ku wonga mwagaasinarile, kalivo unawanda tchindja.>>

⁹ Mwa enne mwene Dariyo ohorumela, liye kumiha nlamulo nenne, nomala liye asinari dugumento niwa.

¹⁰ Evale mulombwana Daniyeli agaiziwile ira mwene uhumala asinari dugumento nne, liye ovenyaga, dowa kwartu yaye ya muzulu yenno yanna majanela ohulene kaing'anne pandi ya Jeruzalemu, liye dowa kokora na mabodo aye, liye lobelaga, amutamalelaga Mulugu waye va kada siku fendo taru nnga jeretchave liye malambo a mundulri.

¹¹ Mwa enne alombwanale kohomaruwaga nnga mwapanganne atu, aliwa dowa vande va mulombwana Daniyeli. Kagadowile, kanfwanyile liye unnana lobela, anvepaga Mulugu waye.

¹² Noira enne, kohovenyaga, aliwa dowa nfwanya mwene, aliwa nfuka zela nlamulo nakumihile liye, aliwa ira: <<Kodi nyo so mwene kamwaasinarile nlamulo ira muwari mwa malambo 30 mutu uli watene unalobela wa mulugu uli watene nari mutu mmohiwa hiya nyo so mwene, atukuliwe, adowe, atatileliwe mmulihani mwa apodogoma?>> Evale mwenole ohowakulaga eraga: <<Na ibaribari pu mwemo nnga munawongela nyo, molingana na nlamulo na akuda Mediya na akuda Perisiya, nlamulo neni kalivo unafuna tchindja!>>

¹³ Evale aliwa kohomuwakulaga mwenole keraga: <<Mbwenye Daniyeli wenno uli muwari mwa atu katukuliwe ilambo ya Juda, kanaubalrani nyo so mwene, nne kanabalra nlamulo neno niasinarile nyo. Liye eniva kada siku unomutamalela Mulugu waye fendo taru.>>

¹⁴ Evale mwenole agavwile mazu anne, ohokalaga okukumuwene, liye funaga jonvunela Daniyeli. Roma ora yenne fiyeda nzuwa vira mwenole oholaba na makalelo oira amukamihede mulombwana Daniyeli ahakwe. Mbwenye kawandile.

¹⁵ Mwa enne alombwanale kohomaruwaga vamohi nnga mwavwananne atu, aliwa dowa wa mwene ule. Kaganfwanyile, kohowongaga keraga: <<Nyo so mwene muhumala iziwa ira nlamulo neni, ti nlamulo na akuda Mediya na akuda Perisiya. Ku wonga nlamulo nenyu mwakumiha, muasinari, kannatchindjeya!>>

¹⁶ Mwa enne mwenole oharumaga atu, aliwa mudowela mulombwana Daniyeli. Agazile, kohomuhindaga, aliwa dowa nvokeda mmulihani mwali apodogoma. Noira eno, mwenole ohomuwandelaga Daniyeli eraga: <<Mulugu wawo wenno unamulaba we malambo matene, akale wenno unauvunele!>>

¹⁷ Noira enne, kohozagana nibwe, aliwa fungana wanoni wa muliha mwali apodogoma mule. Eto mwenole ohotukulaga aneli waye vamohi na aneli wa andimuwaye atene, liye dowa dindiha vanibweni vale ira jejo jamuirilena atu mulombwana Daniyeli jahawande tchindjiwa.

¹⁸ Noira enne, mwenole ohodowaga palasiyoni waye. Eto agadowile wewule, ohovireliwaga mahiyu matene anne ahadjile yengo. Nne tchazilegena joimbana, aroma walreda nnga jeretcha liye. Eto kawandile gona.

Daniyeli ohokumamo mmulihani mwa apodogoma agali wapamene

¹⁹ Evale unde uromaga tcha mwenole ohovenyaga, mobaranya ohodowaga wewule wafwanyeya muliha wa apodogoma ule.

²⁰ Agafiyile wewule, ohomuitanaga mulombwana Daniyeli na nizu nokumbanya eraga: <<Daniyeli namalaba wa Mulugu Okalawo, kodi Mulugu wawo wenno unamulaba we malambo matene uhuwanda uvunela muwari mwa apodogoma?>>

²¹ Evale mulombwana Daniyeli ohomuwakulaga mwenole eraga: <<So mwene, umwene wenyu udowegeve sogolro kala no kala.

²² Mulugu waga ohomuruma mungelro waye, liye za funga wanoni wa apodogoma. Aliwa kidiirele yabure ili yatene mwasiwa Mulugu kadifwannyena yabure vamentoni vaye. Eto nne vamentoni venyu, so mwene miyo kadisakanyile yabure ili yatene.>>

²³ Evale mwenole agavwile enne, ohoziveliwaga valukulu, liye aruma atu ira kadowe kankumihemo mulombwana Daniyeli mmulihani mwa apodogoma mule. Evale aliwa kagankumihilemo, funa muing'ana Daniyeli, fwanyeya ira liye kaporeyilege nne vang'ono, mwasiwa liye ohomuroromela Mulugu waye.

²⁴ Noira enne, mwenole eto ohowongaga eraga: <<Kadowani mwaahinde alombwana anne kamugwihilena mulandu nfwiwa ira akwe vasayi ale, mwaatukule aliwa vamohi na ahiyaniwene na ahimiwene, mudowe mwaavokede mmulihani muli apodogoma mule.>> Fwanyeya ira tempu yaavokeda atu atene anne mmulihani mule, kahanafiyeve vati, apodogoma kohagapa muzulu muzulu, aliwa mala agwadanya makuva ewa matene.

²⁵ Noira enne, mwene Dariyo oholrembaga makarta arumihedaga muwari mwa malogo matene na vilambo datene na atu a viwongelo datene anafwanyeya mwilamboni yatene eraga: <<Murendele uwendjediwe muwari mwa nyo!

²⁶ Miyo nnasakanya nlamulo naga ira mwatene munavira utongi wa umwene waga, atu kawande ngurumela eto kawandege muova Mulugu wa Daniyeli. Mwasiwa Mulugu wa Daniyeli gu Mulugu okalawo eto gwa mukalakala. Eto umwene waye kuza ubwanyuliwa eto utongi waye uneregeve dowa sogolro malambo a mukalakala!

²⁷ Liye unowombola eto unovulusa. Eto unowanda irana jitonyihedo na matikiniho zulu na ilambo ya vati. Gu liyene uwandile muwombola mulombwana Daniyeli mmandani mwa kopolo da apodogoma!>>

²⁸ Kuma evale Daniyeli jaye jomuwendela pama tempu yatonga Dariyo vamohi na tempu yatonga Siru wenno ali nkuda Perisiya.