Daniyeli 3 - Mazu Otchena a Mulungu

Ikwamutu yosema ya oru ya mwene Nabukodonozore

¹ Mwene Nabukodonozore ohosakanyaga ikwamutu yosema ya oru. Lapa uwa dowa zulu ali mameturu 27 eto rambalala uwa ali mameturu 2 na masentimeturu 70. Noira enne, ohowongaga ira: <<Yosema ile idowe yaimetchiwe nimburo notandeleya na Dura, muwari mwa porovinsiya ya Babiloniya.>>

² Noira enne, mwene Nabukodonozore ohawongagana agovernadore, aministuru, asogolrelri, anamawelruza, aliba koya kobiri, anamatonga, andimuwa andimuwa na atu atene okana izo muwari mwa maporovinsiya matene ira kaze kafugulele mabasa otamalela ikwamutu yosema yaimetchile liye ile.

³ Mwa enne agovernadore, aministuru, asogolrelri, anamawelruza, aliba koya kobiri, anamatonga, andimuwa andimuwa na atu ali atene okana izo muwari mwa maporovinsiya matene kohogumanaga. Atene anna kohogumana, aliwa za imela sogolro wa ikwamutu yosema ile ira kafugulele mabasa otamalela ikwamutu yosema yenno yasakanyile mwene Nabukodonozore.

⁴ Mwa enne maliba kuwa ohowongaga na mazu okuwa eraga: <<Nyo mwindji watene na malogo matene na atu atene a viwongelo dohiyana-hiyana munorumiwa na mwene ira

⁵ mwavwa nla wa palraza, falauta, arpa, lira, sitara, salteriyu eto no nla wa yoimbana ili yatene, nyo atene inafwanela mukokore, mutamalele ikwamutu yosema ya oru yenno iimetchile mwene Nabukodonozore.

⁶ Mbwenye mutu wenne ahanafune kokorela ikwamutu yosema ila, aitamalela, tempu imohive liye unovokediwa muhofuni munafwanyeya munlo ohindetchetcha.>>

⁷ Mwa enne tempu imohive atu atene kagavwile nla wa palraza, falauta, arpa, lira, sitara, salteriyu eto no nla wa yoimbana ili yatene, mwindji watene, malogo matene na atu a viwongelo datene kohokokoraga, kaitamalelaga ikwamutu yosema yenno yaimetchile mwene Nabukodonozore.

Daniyeli afwaye tchafunne itamalela ikwamutu yosema

⁸ Mwa tempu yenne kohokalawo aBabiloniya amohiwa kazilege, aliwa roma wonga mazu abure zela aJudewu.

⁹ Aliwa muwandela mwene Nabukodonozore keraga: <<So mwene, umwene wenyu udowegeve sogolro kala no kala.

¹⁰ Nyo so mwene muhukumiha nlamulo noira mulombwana uli watene agavwile nla wa palraza, falauta, arpa, lira, sitara, salteriyu eto no nla wa yoimbana ili yatene, inafwanela akokore, atamalele ikwamutu yosema ya oru.

¹¹ Eto mohowonga ira: <Mutu uli watene ahanafune tamalela ikwamutu yosema ile, unotatileliwa muhofuni mwemo munafwanyeya munlo ohindetchetcha.>

¹² Mbwenye mwagawongile eno, kohokalawo alombwana amohiwa aJudewu anno mwahambihile nyo ira kasogolrelrege ja porovinsiya ya Babiloniya anno anafwanyeya kagali Sadaraki, Mezaki, na Abedenego. Alombwana anno, so mwene, aliwa kinaubalrani nyo! Kinaalaba amilugu enyu nne kinatamalela ikwamutu yosema ya oru yenno iimetchile nyo!>>

¹³ Mwa enne mwene Nabukodonozore ohozeliwaga takaleliwa wohokala wa masika. Motakaleliwa mule, ohaitanihaga Sadaraki, Mezaki, na Abedenego. Mobaranya alombwanale kohodowiwana vamentoni va mwene.

¹⁴ Kagazile, mwene Nabukodonozore ohafuka eraga: <<Kodi na ibaribari we mulombwana Sadaraki, Mezaki, na Abedenego, nyo kamunafuna alaba amilugu aga, nne kamunafuna tamalela ikwamutu yosema ya oru yenno iimetchile miyo?

¹⁵ Peno mbwenye eni ihifiya tempu yenyu. Eni nyo mwavwa nla wa palraza, falauta, arpa, lira, sitara, salteriyu vamohi no nla wa yoimbana ili yatene, nyo inafwanela mukokore, mutamalele ikwamutu yosema yenno isakanyile miyo. Mwairana eno, inokala pama. Mbwenye mwahafuneve irana, tempu imohive munovayela tatileliwa muhofuni mwa munlo ohindetchetcha. Jaireya eno, kodi mulugu guvi unafuna uvunelani mmandani mwaga?>>

¹⁶ Evale Sadaraki, Mezaki na Abedenego kohomuwakulaga mwene Nabukodonozore keraga: <<So mwene, hiyo kaninna mazu ovivunela anafuna hiyo wonga zela eji!

¹⁷ Hiyo navokediwa muhofuni mwa munlo ohindetchetcha, nihikana ibaribari ira Mulugu wehu wenno unamulaba hiyo unowanda nivunela. Liye eto gunafuna nivunela mmandani mwenyu, so mwene!

¹⁸ Mbwenye masiki Mulugu wehu ahanivunele, inafwanela muiziwe so mwene ira hiyo kannaalaba amilugu enyu nne kannatamalela ikwamutu yosema ya oru yenno iimetchile nyo.>>

Tatileliwa wa Daniyeli afwaye mmunloni

¹⁹ Mwa enne mwene Nabukodonozore ohotakaleliwaga na makalelo ohokala a masika na mazu kawongilege atu ale, evale ohopotaga makwizi vakoveni vaye zela Sadaraki, Mezaki na Abedenego. Eto oharuma atwaye eraga: <<Kadowani mwakahihe muhofuni mwa munlo mule fendo tanu na mbinli kwaranya makalelo anakahetcha atu!>>

²⁰ Eto noira enne, oharumaga anyakondo aye a kopolo eraga: <<Kaahindeni alombwana araru ala Sadaraki, Mezaki na Abedenego, mwamange, mudowe mwaatatilele muhofuni mwa munlo ohindetchetcha mule!>>

²¹ Evale alombwanale kohomangiwaga kagalive owarene jowara jiwa, na kapa diwa, na atchapowa ewa, na jowara jimohi jiwa jawarilege atu kaligive eno owarene. Evale kohotatileliwa muhofuni mwa munlo ohindetchetcha.

²² Fwanyeya ira mwene ule aarumile atwale mobaranya eto muhofuni mule mohokahaga na makalelo ohokala a masika. Na mwasa wenne, alombwana kadowa kaatatilelaga Sadaraki, Mezaki na Abedenego mmunloni, kohovulreyaga na malumi a munlo kakumelaga muhofuni mule, aliwa fiyeda kwa.

²³ Eto alombwana araru ale Sadaraki, Mezaki, na Abedenego kohomorelaga muhofuni mwa munlo ohindetchetcha mule kagalive omangiwene.

²⁴ Mwa enne mwene Nabukodonozore againg'anne muhofuni, ohokukumuwaga valukulu, mobaranya liye venya dowa wonga na anamawelruza aye atene eraga: <<Kodi hiyo mmunloni mule kanaavokedilemo alombwana araru kagali omangiwene?!>> Aliwa kohowakulaga keraga: <<Na ibaribari so mwene, pu mwemo.>>

²⁵ Evale liye ohowongaga eraga: <<Miyo mbwenye daing'anamo, nnaonamo atu annayi kagali ohomangiwene kawendawendaga mmunloni mwemule eto nne kilivo yabure inaafwanya. Eto makalelo a mutu wanennayi nnamuona miyo unakala nnga mwana mmohi wa amilugu!>>

²⁶ Mwa enne mwene Nabukodonozore ohozaga va mulango va hofu wa munlo ohindetchetcha vale, liye wonga eraga: <<Sadaraki, Mezaki, na Abedenego, nyo anamalaba a Mulugu Okwaranya Jatene, kakumani, muze uno.>> Evale mulombwana Sadaraki, Mezaki na Abedenego kohokumagamo mmunloni mule.

²⁷ Eto agovernadore, aministuru, asogolrelri na anamawelruza a mwene, kohogumana ira kaze kaaone alombwanale eto kohoonaga ira aliwa maningo ewa tchajile na munlo ule nne vang'ono. Aliwa nne nsisi niwa nimohi kanajile, nne jowara jiwa kajatchindjeyile, nne maningo ewa tchanukaga utchi.

²⁸ Evale mwene Nabukodonozore ohowongaga eraga: <<Atamaleliwe Mulugu wa Sadaraki, Mezaki na Abedenego wenno umurumile mungelro waye, aza aawombola anamalaba aye anno kamuroromenle liye. Tchoira kohofiyeda konda yenno yawongile mwene, aliwa fiyedaga vivelela maningo ewa, hiyaniha no tamalela mulugu mmohiwene ahali Mulugu wewa!

²⁹ Na miyene eto nnafuna dikumihe nlamulo. Nlamulo niwa ti ni: Mwindji watene, malogo matene, atu a viwongelo datene, mutu wenno unawonge mazu abure wa Mulugu wa mulombwana Sadaraki, Mezaki na Abedenego, inafwanela agwadanyiwe yano yano eto nyumba yaye inomala bwanyuliwa. Mwasiwa kaliwo mulugu mmohiwa unawanda nvunela mutu na makalelo anna!>>

³⁰ Noira enne, mwene Nabukodonozore ohagwelihagave alombwana araru ale izo yanna atu muwari mwa porovinsiya ya Babiloniya.