Daniyeli 2 - Mazu Otchena a Mulungu

Yoroha ya mwene Nabukodonozore

¹ Yaka yanembinli yatonga mwene Nabukodonozore, mwenole ohokana joroha jaye jarohile liye. Evale liye agarohile, ohokalaga okukumuwene mmirimani mwaye eto liye kawandile gona.

² Mwa enne liye ohaitanaga ang'anga okwima, aliba visangwisangwi, aliba lowa na aBabiloniya owonga ja sogolro ira kaze kamuwandele mwene joroha jaye. Evale aliwa kohozaga, aliwa fiya vamentoni va mwene Nabukodonozore.

³ Evale mwene ule ohawandelaga eraga: <<Miyo dihikana yoroha irohile miyo, isimbwile dikukumula mmirimani mwaga. Dafuna ira diiziwe yotapulela iwa.>>

⁴ Mwa enne aBabiloniya ale kohomuwandelaga mwene ule na iwongelo ya iAramayiku keraga: <<So mwene, umwene wenyu udowegeve sogolro kala no kala. Hiyo nnafuna nyo muniwandelemo hiyo anamalaba enyu yoroha yenno irohile nyo, era eno, nnowanda tapulela uwa!>>

⁵ Evale mwene Nabukodonozore ohawakulaga aBabiloniya ale eraga: <<Iwongile miyo kalivo unafuna runiha. Tchoira miyo difunile ira nyo mudiwandelemo yenno irohile miyo amala muditapulele. Nyo mwahawande irana yenno, nyo atene munogwadiwa yano yano eto nyumba dinyu nnomala bwanyuliwa.

⁶ Mbwenye mwadiwandelamo irohile miyo, amala mudiwandelamo yotapulela iwa, miyo nnouvahani jengo jidjindji, jotambilra no teteliwa wohokala wa masika. Nona inafwanela mudiwandelemo yenno irohile miyo vamohi na yotapuleliwa.>>

⁷ Evale aliwa kohowakulaga fendo yanembinli keraga: <<So mwene hiyo anamalaba enyu nnafuna muniwandele yoroha yenyu, era eno, nnowanda tapulela!>>

⁸ Mwene Nabukodonozore ohowakulaga eraga: <<Miyo dihiiziwa ira nyo munafuna mudibeliwe ira mwahapiwe tchineneva mwasiwa nyo munoona ira iwongile miyo kalivo unafuna runiha.

⁹ Nyo mwahawande diwandela yoroha yaga, makalelo anafuna miyo utongani dihimala uwandelani. So miyo nnaona ira nyo atene muhumala panganela mazu abure, mazu onama ira muzena vamentoni vaga, fiyeda ditchindje youmbuwela yoira dupeni. Na mwasa wenno inafwanela mudiwandele yoroha yaga ira miyo dikayena ibaribari ira nyo munowanda itapulela!>>

¹⁰ ABabiloniya ale kohomuwakulaga mwene Nabukodonozore, aliwa ira: <<Mwilamboni mwatene ya vati kalimo mutu nne mmohi unawanda irana yenno inawonga nyo. Eto kaliwo mwene mmohiwa mundimuwa wa kopolo ubabihile irana jokala ha jejo, aaruma ang'anga okwima, aliba visangwisangwi, nari aBabiloniya owonga ja sogolro para kamuwandele jirohile liye.

¹¹ Yengo inafuna nyo so mwene tchi yengo irutchile eto kaliwo unafuna uwandelani yoroha yenyu, ahali amilugu, anno kahanawenda na hiyo atu!>>

¹² Evale mwene Nabukodonozore ohotakaleliwaga eto ohojamo na makalelo ohokala a masika. Liye aruma atwaye ira kadowe kaape aliba toto atene a Babiloniya.

¹³ Nagakumile nlamulo noira aliba toto atene kakwe, kohoroma nvenda mulombwana Daniyeli vamohi na afwaye ale ira na aliwene kadowe kapiwe.

Mulugu ohomuwandela Daniyeli yotapulela ya yoroha ya mwene Nabukodonozore

¹⁴ Noira enne, mulombwana Daniyeli ohowonga na mulombwana Ariyoki, mundimuwa wa agwarda a mwene wenno avenyile ira arome apa aliba toto atene a Babiloniya.

¹⁵ Aganfwanyile, ohonfukaga na makalelo apama na toto eraga: <<Kodi mwasiwa gwa nni mwene funaga eji jiireye mobaranya eni?>> Evale mulombwana Ariyoki ohomuwandelaga jatene jaireyile.

¹⁶ Noira enne, mulombwana Daniyeli ohovenyaga, liye dowa wonga na mwene, anvepaga ira arome mudediha vang'onove ira awande muhiya tempu yoira atapulele yoroha yaye.

¹⁷ Noira enne, mulombwana Daniyeli ohodowaga vande. Agadowile, ohawandelamo afwaye ale Ananiya, Mizayeli na Azariya.

¹⁸ Eto ohawandelaga afwaye ale ira: <<Inafwanela mulobelege wa Mulugu wa zulu munvepaga ira aniwendele tangaranga hiyo vano eto anionihe yotapulela ya yoroha yokoyeya ile ira hiyo nahakwe vamohi na aliba toto amohiwa a ilambwela ya Babiloniya!>>

¹⁹ Mahiyu a siku nenne Daniyeli ohoonihiwa jengo mmuruni mwaye, liye wandeliwaga yoroha yokoyeya ya mwene ule. Agawandeliwe, ohomutamalelaga Mulugu wa zulu.

²⁰ Liye ohomutamalelaga awongaga eraga: <<Nzina na Mulugu nitamaleliwe malambo matene a mukalakala. Mwasiwa toto na kopolo nnakumela wa liye.

²¹ Liye unowanda tchindja matempu eto unowanda tchindja makalelo a ilambo. Unowanda abwanyula amwene, liye agweliha vampandoni atu amohiwa ira kakale amwene. Liyene gunawanda avaha toto atu a toto eto unowanda avaha onelramo atu anne anaonelramo.

²² Liye unowanda oneyiha jengo jorutcha na jengo jokoyeya. Liye uhumala iziwa jatene jinafwanyeya muisini eto liye tempu yatene unawenda no wareya!

²³ Nyo Mulugu wa makolo aga, nnoutamalelani eto miyo nnoutetelani mwasiwa nyo gudivahile toto na kopolo! Eto peno muhuwanda diiziwiha yenno yuvepileni hiyo. Tchoira muhuwanda niiziwiha muselu wa mwene!>>

²⁴ Noira enne, mulombwana Daniyeli ohovenyaga, liye dowa wa Ariyoki wenno mwene amusakunlre liye ira aape alombwana a toto atene a Babiloniya. Ohodowaga, liye nfwanya amuwandelaga eraga: <<Kubaranyede apa aliba toto a Babiloniya. Miyo nnafuna uditukule, udidowena vamentoni va mwene ira miyo damuwandelemo yotapulela ya yoroha yaye.>>

²⁵ Mwa enne mulombwana Ariyoki ohomutukulaga Daniyeli mobaranya, liye dowa nfiyana vamentoni va mwene, liye kwi: <<Miyo dihinfwanya muwari mwa azombwe katukuliwe Juda mulombwana mmohi wenno unawanda uiziwihani yotapulela ya yoroha yenyu.>>

Nlandaniho na mutu narohile mwene Nabukodonozore

²⁶ Evale mwene Nabukodonozore ohonfukaga Daniyeli wenno aitaniwa na nzina na Beltesazare eraga: <<Kodi weyo unowanda diwandela yoroha yanna miyo vamohi na yotapulela iwa?>>

²⁷ Daniyeli ohowakulaga, liye ira: <<Kalivo unawanda wonga yengo yokoyeya nnga munafuna nyo so mwene. Nne atu okana toto, nne aliba visangwisangwi, nne ang'anga okwima nne aliba ing'ana jomoneya ja zulu!

²⁸ Mbwenye ukalawo Mulugu mmohive bahi uli zulu, wenno unawanda iziwiha jengo jokoyeya. Mulugu wenno guuiziwihileni nyo so mwene Nabukodonozore jatene jinafuna za ireya malambo ogomiheda! Yoroha yenyu vakamani venyu na jengo jionne nyo mmuruni mwenyu ti ji.

²⁹ So mwene nyo mwagali vakamani venyu ogonantene, mohoumbuwela jengo jinafuna za ireya sogolro. Va mbwenye Mulugu wenno unamuoniha mutu jengo jokoyeya gwenno uuonihileni jinafuna ireya.

³⁰ Miyo dihiwandeliwa jengo jokoyeya ji. Mbwenye ira diwandeliwe kahi ira miyo dire kala mutu wa zelru kwaranya atu atene okalawo, nari. So diwandeliwe ira nyo so mwene muwande iziwa tapulela wa joroha jenyu na joumbuwela jenyu.

³¹ <<Nyo so mwene mwagaing'anne, mohoonaga nlandaniho na mutu nohokala na masika. Nlandaniho nne nali na kopolo eto nowareya, naligi noimela nene vasogolro venyu. Eto nlandaniho nne nohokana makalelo owopiha!

³² Muru wa nlandaniho nne ali wa oru wapama ohogumanihiwa na yengo. Vamirimani vaye na miwono daye jali ja parata. Ingulu yaye na tambala daye jali ja mukuwa.

³³ Mendo daye dali da momba, manyalo aye ali a momba ogumanihiwa na ulongo.

³⁴ Nyo muonaga eno, wohokala nibwe nagwadiwe eto gwadiwa uwa nibwe nne kanagwadiwe na manda a mutu. Nibwe nne nagagwadiwe, nohovokiwa, aliwa dowa bubuda manyalo a nlandaniho nne anno kali a momba ogumanihiwa na ulongo. Evale manyalo ale kohobwanyuwa, aliwa tchileya.

³⁵ Eto noira enne, nlandaniho natene nenne nohobwanyuwaga roma momba ule, na ulongo ule, mukuwa, parata, vamohi na oru. Jatene jejo johotchileyaga nnga makata a mamburo obubudavo jalo tempu ya ilimwe, mutu avetaga tirigu. Mwa enne nipevo nohotukulaga jatene, aliwa dowagana fiyeda hahalavo yengo. Mbwenye nibwe nabubudile nlandaniho nne nohoulukulaga, aliwa fiyeda kala mwango mulukulu, aliwa fiyeda zala ilambo yatene ya vati agali ulukula.

³⁶ Ila ali yoroha yenyu. <<Va nnafuna duwandeleni so mwene yotapulela iwa!

³⁷ Nyo so mwene munafwanyeya mwagali mwene wa amwene, tchoira Mulugu wa zulu uhuvahani umwene, kopolo na utongi vamohi na undimuwa!

³⁸ Liye uhuwanda uvahani ira muwandege atonga atu a vilambo datene, na anavinyama anawenda mukokolani na mbalrame dovava zulu. Muru wa oru wa nlandaniho mwaona nyo, gu nyo so mwene.

³⁹ Vasogolro ukalawo umwene umohiwa unafuna hambihiwa. Umwene wenno mbwenye kunakala wa kopolo nnga nyo. Eto umwene wanembinli wagamanle, unozawo umwene waneraru unafuna hambihiwa, wenno unafwanyeya wagali umwene wa mukuwa, wenno unafuna kana utongi ilambo yatene ya vati!

⁴⁰ Eto unoza akalewo umwene umohiwa wanennayi, wenno unafuna za kala olimba nnga momba. Tchoira nnga momba unotchila eto unokotola jatene na umwene wenno unaza akayena makalelo mamohive! Umwene wenno unoza ubwanyulege eto utchilege maumwene a wanle.

⁴¹ Nlandaniho nionile nyo, manyaluwa na jibuno jiwa jagali ja momba ogumaniha na ulongo wenno unalabana anamaomba, tapulela ira umwene wenno kunakala umwene okana vwanana. Mbwenye unokana kopolo da vang'ono mozela momba ogumanihiwa na ulongo ohovanda uonne we.

⁴² Sawasawa nnga jibuno jafwanyeya manyaloni ule jafwanyeya jagali ja momba ogumanihiwa na ulongo, umwene uyo pandi imohiwa unakala olimba, pandi imohiwa unakala ohorutcha bwanyuwa.

⁴³ Eto zela jionne nyo momba agagumanihiwe na ulongo ohovanda, ku wonga ira kohokalawo amwene anafunege jogumaniha umwene wewa muwari motelana. Mbwenye voira ulongo na momba kinahindana, maumwene ayo na aliwene kiza kagumanela.

^44-45 <<Mbwenye malambo a amwene ale, Mulugu wa zulu unoza akunge umwene wenno wahanaza bwanyuliwa. Eto umwene wenno kuza utongiwaga na atu amohiwa. Nyo muhuona ira nibwe nagwadiwe mwangoni kanagwadiwe na manda a mutu, eto nibwe nne nohowanda tchila momba, mukuwa, ulongo, parata vamohi na oru. Ku wonga umwene wenno unafuna kungiwa na Mulugu wa zulu unoza ubwanyulege eto utchilege maumwene matene anna. Eto unoza ukalewove malambo a mukalakala. Jatene eji ku wonga Mulugu Mundimuwa unauonihani nyo so mwene jengo jinafuna za ireya sogolro. Yoroha yenyu kahi yokayikela eto yotapuleliwa tcha ibaribari!>>

⁴⁶ Mwa enne mwene Nabukodonozore agavwile enne ohoworamaga, liye fiyiha murwaye vati, mutamalela mulombwana Daniyeli, liye awandela anamalabaye ira kanvahe mulombwana Daniyeli mivaho da jodja na maperefume onukela pama.

⁴⁷ Evale mwene ule ohowongaga na mulombwana Daniyeli eraga: <<Na ibaribari Mulugu wenyu gu Mulugu wa amilugu atene eto gu Nabwiya wa amwene atene. Liye eto unowanda awandela atu jengo jokoyeya! Mwasiwa peno weyo uhuwanda diwandela yengo yohowanda iziweya!>>

⁴⁸ Noira enne, mwene ohomuulukulihaga Daniyeli na makalelo ohokala a masika, anvahaga mivaho didjindji dene. Eto ohomuhambiha liye kala governadore wa porovinsiya yatene ya Babiloniya eto ira akale musogolrelri wa aliba toto atene a Babiloniya.

⁴⁹ Noira enne, mulombwana Daniyeli onvepaga mwene Nabukodonozore ule ira awande ahambiha afwaye araru ale Sadaraki, Mezaki na Abedenego ira kakale anamasogolrelra a jatene ja porovinsiya yatene ya Babiloniya. Evale mwene ohahambiha. Mbwenye Daniyeli ohokalagave palasiyoni wa mwene.