Daniyeli 12 - Mazu Otchena a Mulungu

Tempu ya makutulo

¹ Mungelrole ohowongagave eraga: <<Mwa tempu yenne musogolrelri mundimuwa unaitaniwa Migeli, wenno unaaing'anela atwinyu unoza avenye ira aavunele. Eto unoza ukale tempu ya goyi, goyi yenno ili yahanababihege oneya romela tempu yaromile kalawo malogo matene fiyeda tempu yenno. Mbwenye mwa tempu yenne atwinyu atene anne anafwanyeya kagalrembiwe mulivuruni anoza kavuneliwe.

² Eto adjindji anno anagona teyani, anoza karurumuwe, amohiwa kadowaga ira kavahiwe ingumi yohomala, amohiwa kadowaga ira kanyaswihiwe no lramwisiwa wa mukalakala.

³ Eto fwanyeya ira atu a zelru anoza kamoneyege nnga wareya wa zulu. Anne kaatwarutchile atu adjindji ira kasakanyege upama, aliwa anoza kamoneyege nnga nyenyedi da zulu kala no kala.

⁴ <<Mbwenye weyo Daniyeli kumuwandele mutu zela mazwala. Inafwanela ulrembe mulivuruni, amala ufungihe ira jikale jofungeya jene ante mamalelo wa tempu. Adjindji anerege tamanga kadowaga wu na wu eto onelramo unoza uwendjedeye.>>

⁵ Noira enne, miyo Daniyeli dohoing'ana. Dagaing'anne, daaonnege angelro amohiwa ambinli kagaimenle, mmohi aligi tcherela ya muhindje ya wu, mmohiwa tcherela ya muhindje mmohive wenne pandi ya wu.

⁶ Noira enne, muwari mwa angelro ambinli ale, mmohi ohonfuka mulombwana wenno awarilege jowara josakanyiwa na usalru wapama ule, wenno ali vazulu va mahindje a muhindje ule ira: <<Kodi jotikiniha jatene jeji jaroma, ira jimale, vinamala tempu nngasi?>>

⁷ Mwa enne pavwile miyo mulombwana wenno awarile jowara josakanyiwa na usalru wapama ule, wenno afwanyeyaga vazulu va mahindje a muhindje ule. Liye ohovenyihaga muwono waye odjana na oromana liye ing'aniha zulu, liye lumbela ira: <<Miyo nnolumbela na nzina na wenno unakalawo malambo a mukalakala ira jeji jinaireya muwari mwa tempu imohi, na matempu menli eto na tempu ya metadi, atu otchenihiwa tempu yewa yoharahariwa yamala. Era eno pa evo vanafuna kwakwanela jatene jeji!>>

⁸ Miyo dagali mulombwana Daniyeli dohovwaga jejo jadiwandenle liye, mbwenye kadawandile onelramo. Na mwasa wenno dohofuka miyo ira: <<Mbwiyeni, kodi jatene jeji jinaza jimale na makalelo bavi?>>

⁹ Evale liye ohodiwakulaga eraga: <<Daniyeli kamaruwa udowe. Mwasiwa mazwala ba mazu okoyeya eto kohofungeliwa ira ahakalevo mutu mmohiwa unafuna iziwa fiyeda malambo ogomiheda.

¹⁰ Atu adjindji anerege visakanyeda no vitcheniha no sakanyedeya. Mbwenye atu abure anawendegeve na ubure wewa. Mwa aliwa kalivo nne mmohi unafuna onelramo. Mbwenye atu a zelru anoza kaonelregemo.

¹¹ Eto romela tempu inafuna hiyihiwa jovelela jotumeya jejo javeleliwetcha malambo matene fiyeda tempu inafuna imetchiwa yabure yohokala ya masika, yengo yotakaliha Nyumba ya Yehova, vinavira malambo 1.290.

¹² Orelihiwa ba atu anne anakaleve ororomeleya fiyeda malambo 1.335.

¹³ Mbwenye weyo Daniyeli ukaleve ororomeleya ante makutulo. Weyo unovuma vuma wa ukwa, mbwenye mamalelo wa malambo unoza uvenye, uwatchele yotambilra yawo.>> Kukala mazu a livuru na Daniyeli.