Daniyeli 11 - Mazu Otchena a Mulungu

Mazu awandeliwe Daniyeli zela amwene a Siriya na amwene a Ijipitu

¹ Mungelrole ohowongagave eraga: <<Yaka yoroma yatonga mwene Dariyo nkuda Mediya, miyo dohovenya dowa mulimbiha eto miyo mukamiheda.

² <<Mbwenye peno miyo nnouwandela ibaribari. Eni kohokalawo amwene amohiwa araru anafuna kaze katonge mwilamboni mwa Perisiya. Eto mwene wanennayi gunafuna kala orayeletchetcha akwaranya amwene araru ale. Eto agali olimba na mwasa wa jorayela jaye, unoza aakukuse afwaye atene ira kadowe kawane na Umwene wa Geresiya.

³ Eto jagaireyile eno, unovenya mwene mmohiwa mundimuwa, wenno unafuna tongaga na kopolo eto unerege irana yenno inafunege liye.

⁴ Mbwenye liye agavenyile, mohodibeliwa umwene waye unoza ubwanyuliwe eto unogaweliwa pandi dannayi dene da mwilamboni. Eto amwene anafuna kala vamalroni vaye kinakala ahimaye, nne kiza kakana utongi umohive wanna liye. Tchoira umwene waye unoza uduliwe, ugaweliwe atu amohiwa hiya ahima aye.

⁵ <<Jaireya eno, mwene wa suli unoza akale wa kopolo. Mbwenye eto musogolrelri mmohi wa muumweneni mwaye gunaza akale wa kopolo kwaranya, arome tonga eto utongi unafuna liye kana unaza ukale utongi undimuwa.

⁶ <<Vagamanle yaka dingasi dingasi, mwene wa suli na mwene wa norti anoza kasakanye yopangana yowandana. Mwene wa suli mwanaye wa muhiyana unodowa ateliwe na mwene wa norti ira vwanana wewa ukale wolimba wene. Mbwenye kavinawandeya mwasiwa mwana muhiyanole kopolo daye nnomala eto unoza agulihiwe ira apiwe. Eto mwene wa suli kopolo daye kannasusa. Roma muhiyanole, dowa ale kanvelela nari muhiyanole babaye nari wenno amulimbihetcha malambo anne, atene anagomela piwa.

⁷ <<Mbwenye jaireya ejile, vagavirile malambo a vang'ono, mutu mmohi wa muibalini mwa muhiyanole unoza akale mwene vamalroni va mwene wa suli. Evale liye unoagumaniha anyakondo aye ira kadowe kawane na nikuru na anyakondo a mwene wa norti. Unoza avolowe mamburo olimba a akuda norti adowe aagondjihe.

⁸ Mwa enne agamanle agondjiha, unotukula vikwamutu josema ja amilugu ewa josakanyiwa na momba vamohi na fwaramento diwa da peresu yokwima dosakanyiwa na oru na parata, adowena Ijipitu. Era eno eto unoza amalihevo yaka dingasi dingasi ahawanaga na mwene wa norti ule.

⁹ <<Eto mwene wa norti ule unodowa ilambo ya mwene wa suli ira awane, mbwenye muwari mohowanda gondjiha unoza awelele mwilamboni mwaye.

¹⁰ Mbwenye ahima a mwene wa norti anoza kakozeye ira kadowe kawane kondo. Anoza kagumanihe nikuru na anyakondo ohokala a masika. Evale anyakondo ale anodowa kavire ilambo ya suli. Eto kagadowile wewule anobwanyula jatene nnga jinaireya na mahindje kabwanyulaga, kavire fiyeda nimburo nolimba notawelamo na mwene wa suli.

¹¹ Mwa enne mwene wa suli ule pinafuna liye takaleliwa na makalelo ohokala a masika, akume nimburo nolimba niwa ira adowe awane na akuda norti. Evale mwene wa norti unoagumaniha anamwindji a anyakondo pwi. Mbwenye agadowile wana, akuda norti anovahediwa mmandani mwa mwene wa akuda suli.

¹² Anamwindji ale kagagondjihiwe, mwene wa suli unoza avitukulelege eto unoapa anyakondo adjindji a norti. Mbwenye agaapile amwidani pwi, kopolo daye eto kannasusa.

¹³ Tchoira mwene wa norti unoagumaniha akoka anamwindji a anyakondo oindjiva kwaranya oroma ale. Evale agamanle yaka dingasi dingasi, unoza awele na nikuru naye nindimuwa na anyakondo na jowanana jiwa, kagali ovikungene ira kawane na akuda suli.

¹⁴ <<Mwa ora yenno atu adjindji anoza kawanege na mwene wa suli. Mwa alombwana anafuna wanaga na mwene wa suli ale, munoza mufwanyeyege atwinyu amohiwa a Izarayeli, oziveliwa jopanana. Aliwa anoza kawanege kondo mofuna kwakwaneliheda joumbuwela ja mmuruni mwewa, mbwenye anoza kagondjihiwe!

¹⁵ <<Evale mwene wa norti unoza avenye na nikuru naye na anyakondo, kasakanyege makalelo obwanyula muru mulukulu olimba owerewerihiwa sidadile eto anogomela igondjiha. Nne anyakondo a kopolo a suli, nne anyakondo olimba a mwene kiza kawanda wana na akuda norti. Tchoira aliwa kinakana kopolo.

¹⁶ Evale mwene wa norti unoairela akuda suli ale jejo jinaafunana liye. Mwasiwa kalivo unafuna za wanda muhiyiha. Liye unodowa ilambo yotitimihiwa ya Izarayeli ira abwanyulege na kopolo daye.

¹⁷ Eto mwene wa norti unokana yofuna ira aze aaimelihe anyakondo atene a umwene waye ira kawane na akuda suli. Evale unosakanya yopangana na mwene wa suli, anvahe mwanaye ira amutele muwari mofuna gondjiha umwene wewa. Mbwenye yopangana ile kinadibeliwa eto kinamulabela yengo.

¹⁸ <<Amala eno mwene wa norti unorungunuwiha kove yaye ira adowe agondjihe vilambo nnafwanyeya tcherela ya Mediteraniyo eto unogondjiha vilambo pwi. Mbwenye ukala mundimuwa mmohi wa anyakondo unafuna za amalihe vitukulela wa mwene ule, ante afiyede munyaswiha.

¹⁹ Era eno mwene wa norti ule unowela ira adowe mamburo olimba a mwilamboni mwaye, mbwenye unoza agwagwaduwe, agwe, agomele kwa wene.

²⁰ <<Liye agakwile enne, vamalroni vaye unoza avolowevo mwene mmohiwa. Mwene unafuna volowa vamalroni vaye ule, unomuruma mundimuwaye mmohi wa muumweneni mwaye ira adowe asokege misoko ira awande rayelihana umwene waye. Eto vamala malambo a vang'ono, mwenole unoza atolotchiwe. Eto tolotchiwa waye kunaireya muwari mwa uwali, nne kondoni.

²¹ <<Vamalroni vaye, unozavo mwene mmohiwa wabure, agali mutu ohofwanela vahiwa umwene. Mbwenye unoza atukule umwene morurumutcha eto muwari monyenga.

²² Liye agatukunle umwene, unerege atamangiha vamohi no agondjiha makuru a anyakondo anno anafwanyeya kagali amwidanaye eto unomugondjiha musogolrelri wa yopangana.

²³ Liye unerege sakanya yopangana na afwaye. Mbwenye agasakanyile yopangana ile, unerege laba ja ungongomwa. Masiki agannave atu a vang'ono, kopolo daye nneregeve dowa sogolro.

²⁴ Morurumutcha liye unerege venya adowe awanege na maporovinsiya orayela. Eto unerege irana jejo ababaye nari makolo aye kahababihile atu irana. Jengo jiwa ti ji: unerege tukula jorayela jile, jengo japama vamohi na jengo ja peresu yokwima jejo jinapate liye kondoni aganege na anyakondo aye. Eto unogarati ahelevo zelru yoira awande gondjiha mamburo olimba a mwilamboni mule. Mbwenye jejo kajinasusa.

^25-26 <<Evale liye unoza avenye na anyakondo ohokala a masika movilimbiha, amaruwe ira adowe awane na mwene wa suli. Eto fwanyeya ira mwene wa suli adowaga kondoni unoakana anyakondo adjindji eto a kopolo. Mbwenye mwene wa suli kaza agondjiha, mwasiwa ale anadjetcha jodja jaye anoza kampanganele ira akwe. Nikuru naye na anyakondo nnoza nidimele eto anyakondo aye adjindji anoza kapiwe, halaga mwenole na atwaye a vang'ono.

²⁷ <<Jagaireyile enne amwene ambinlene anogumana kada mutu aganna joumbuwela jabure ira amuirele nfwaye. Era enne anogarati vameza vamohive kadjaga, kada mutu arome wonga mazu aye onama. Mbwenye muwari mwa aliwa, jofuna jewa kajinakwakwanela, mwasiwa tempu ya makutulo yabalrile Mulugu inaza ikale yahanakwakwane.

²⁸ Jagaireyile enne, mwene wa norti unowelela mwilamboni mwaye agatukunle jorayela jatene japatile liye kondoni. Era eno unohela zelru ira aagondjihe atu anne anawenda na yopangana yotchena. Eto unovenya, adowe arome irana yenno inaafunena liye. Amala eno unowelela mwilamboni mwaye.

²⁹ <<Tempuwa yakwakwana, mwene wa norti unoza avenye akoka na anyakondo aye ira adowe awane na akuda suli, mbwenye fendo yenna kaza agondjiha nnga mwagondjihele liye fendo yoroma.

³⁰ Tchoira dihikalawo mwadeya da anyakondo nnafuna za kumela ilambo ya Kitimi ira kaze kawane na liye. Muwari moova, liye unoza atawe kondoni ule awelelaga mundulri. Era enne muwari motakaleliwa, unodowa awanege na atu a yopangana yotchena. So mbwenye liye unawandanege na atu anne anahiya yopangana yotchenele.

³¹ Anyakondo aye anoza katakalihe nimburo naye notchena na nyumba yolimba eto anomaliha jovelela jotumeya jinaveleletcha atu malambo matene. Tchi tempu inafuna venyihiwa yabure yohokala ya masika, yengo yotakaliha Nyumba ya Yehova.

³² <<Na mwasa wa mazu otapilra anafuna mwene wa norti wongaga, unowanda akana atu anno anaviringaniha yopangana ya Mulugu. Mbwenye atu anne anamuiziwa Mulugu wewa anoza kakale oimelene eto anoza kawane na liye.

³³ Atu okana zelru anoza kaaonelrihedemo afwiwa ibaribari, mbwenye mwa malambo mangasi mangasi anoza kapiwe na supada nari katatileliwe mmunloni, owu hehi kahindiwe kadowiwena ilambo imohi, owu hehi anoza kabeliwe jengo jiwa jatene.

³⁴ Atu a Mulugu ale muwari moharahariwa mule, kohokalawo atu amohiwa anafuna akamihedaga vang'ono. Eto muwari mwa aliba akamiheda mule, amohiwa anaakamihedege mokana yolringa yewa.

³⁵ Eto muwari mwa atu a zelru ale, amohiwa anoza kaharahariwe ira kagomele kala osakanyedeyene no huwiwa no tchenihiwa fiyeda makutulo, tchoira ihanle tchi tempu ya makutulo yenno Mulugu ibanlre liye.

³⁶ <<Mwene wa norti ule unoza airena yenno inafunege liye. Liye unerege wonga movitukulela ira: <Eni miyo dili vazulu va amilugu atene.> Eto unerege wonga mazu abure zela Mulugu wa amilugu atene. Jatene jaye jinerege muwendela pama fiyeda Mulugu amutonge na uwali waye. Tchoira yenno ibalrile Mulugu inoireya.

³⁷ Mwene wenna kaza aabalraga amilugu anno kakokoreletcha makolo aye nne mulugu wenno unaziveliwa ahiyana, nne mulugu uli watene. Mwasiwa liye yobalra yaye mmirimani mwaye inakala yoira: <Miyo dili vazulu va amilugu atene!>

³⁸ Mbwenye liye unaza amurihedege mulugu wa mamburo olimba otawelamo. Liye unerege velela oru, parata, mabwe ofuneyetchetcha na jengo jimohi jiwa ja peresu yokwima wa mulugu wenno makolo aye kahamuiziwile atu.

³⁹ Liye unerege wanda barela mamburo aye olimba otawelamo mokamihediwa na mulugu wa ilambo imohiwene. Eto atu atene anne anamurumele ira akale mwene wewa anotambilra upama, anovahiwa undimuwa wotonga eto anovahiwa teya ira ikale yotambilra yewa zela mabasiwa.

⁴⁰ <<Mbwenye yafiya tempu yogomiheda, mwene wa suli unovenya ira adowe awane na mwene wa norti. Evale mwene wa norti unoza amaruwe nnga nalripembezu na aaterelado a kondoni, atu owendiha kavalo vamohi na mwadeya doindjiva dene, kamugondjihe mwene wa suli ule eto kabwanyule vilambo dohiyana-hiyana nnga jinaira mahindje kabwanyulaga jengo.

⁴¹ Eto unoza avolowe ilambo yotitimihiwa ya Izarayeli, aapemo matchikwi na matchikwi a atu. Mbwenye anafuna za vuluwa ba akuda Edomu na akuda Mowabe vamohi na akuda Amoni oindjiva.

⁴² <<Mwene wa norti unowongola ndanda naye ira agondjihe vilambo didjindji dene. Ilambo ya Ijipitu kinakana makalelo ovuneya.

⁴³ Mwenole unoza akale mwinnya wa jatene ja oru na parata jakoyile atu na jengo jatene jofuneya ja Ijipitu. Akuda Libiya na Etiyopiya anoza kamuhare mwene wa norti ule.

⁴⁴ Mbwenye mwene wa norti ule avwa jowonga jokumela ikukuru ya norti na makumelo wa nzuwa, unoza arendjeye. Mwa enne liye unoza avenye na anyakondo aye muwari mwa uwali wohokala wa masika ira kadowe kaatolotchege atu adjindji.

⁴⁵ Kapamento yaye ya umwene unadowa akunge wu bara Mediteraniyo, wu mwango Otchena okana undimuwa, vari viwa. Mbwenye goma waye unoza unfiyele eto kanakalavo mutu unafuna za mukamiheda!>>