Daniyeli 10 - Mazu Otchena a Mulungu

Yoroha yaneraru ya Daniyeli

¹ Yaka yaneraru yatonga Siru mwene wa Perisiya, Daniyeli wenno unaitaniwa na nzina na Beltesazare, ohowandeliwaga mazu. Mazu awandeliwe liye ali mazu a ibaribari owonga zela kondo ilukulu. Liye ohovwaga mazu matene eto ohowanda onelramo yotapulela ya jejo jaonihiwe liye.

² Malambo anne miyo Daniyeli dohokalaga sumana taru dompumbula dikumbanyaga.

³ Kadadjile yengo yapama muwari mwa sumana taru dile, nne nyama nne vinyu, nne kadavizolihile makura fiyeda sumana taru dompumbula dile mala.

⁴ Kagakwakwanile malambo 24 a mwedi oroma, dohodowaga imela tcherela ya muhindje mundimuwa unaitaniwa Tigere.

⁵ Dagavenyihile meso aga, dagaing'anne, damuonnege mulombwana mmohi eni agawarile jowara josakanyiwa na usalru wapama eto aganna mmwinini mwaye sintu na oru ohogumanihiwa na yengo imohiwa wa ilambo ya Ufaji.

⁶ Maningo aye kali ojerimela nnga mabwe ofuneyetchetcha anaitaniwa berilu, eto koveni waye wali wohinda nnga muzongwe ajerimaga. Meso aye kakala nnga mendje dohinda, miwono daye na mendo daye jajerimela nnga jerimela wa mukuwa ojerimela wapama eto nizu naye awongaga, akala nnga mazu a mwindji wa atu.

⁷ Mbwenye miyo Daniyeli gwaonilege jejile mekave. Afwaga dannaga miyo tchaonilege. Mbwenye aliwa kohokalaga okukumuwene, aliwa tawa dowa vitala.

⁸ Mwa enne miyo dohalaga mekave diing'anaga jengo johokala ja masika jaonihiwa miyo mmuruni mwaga. Eto kopolo daga dohogomaga, miyo kala waheyo. Eto makalelo a kove yaga kohotchindjeya, miyo kala oovene.

⁹ Mwa enne miyo dohovwaga nizu na mutule awongaga. Dagavwile mazu awonga liye, dohogonelavo kove dilukulu, dagaing'anihile kove yaga vati.

¹⁰ Mwa enne nohokalawo ndanda nazilege dihinda, divenyiha, miyo kala ohidedene vati na manda aga eto dagalive okokorene, mandaga na mabodo aga aliwa ngurumelaga.

¹¹ Evale liye ohodiwandela eraga: <<Daniyeli, mutu oziveliwiwa, kavuruwana yenno inafuna miyo uwandela veva. Kavenya uimele na manyalo awo. Tchoira miyo eni dire rumiwa ira dize wa weyo.>> Vawongaga liye mazu enne, miyo dohoimelaga dingurumelaga.

¹² Eto liye ohodiwandelaga eraga: <<Daniyeli kuove. Mwasiwa romela siku naromile we funa onelramo jionihiwe we no viyeviha vamentoni va Mulugu wawo, mazu awo kohovweya. Pa evo varumiwe miyo ira dize na mwasa wa mazu awo!

¹³ Mbwenye dodoma waga, dawana na musogolrelri wa Umwene wa Perisiya, wenno adihiyiha za, fiyeda malambo 21. Noira enne, Migeli, wenno uli muwari mwa asogolrelri andimuwa, ohozaga ira adikamihede mwasiwa miyo dawana meka na amwene a Perisiya ale.

¹⁴ Eni miyo dizele ira dutapulelemo jatene jinafuna aireyela mulogo wawo malambo ogomiheda. Mwasiwa jejo jinaonihiwa we ti jengo jinafuna ireya musogolro vagamanle malambo madjindjene.>>

¹⁵ Mwa enne liye agadiwandenle mazu anne, miyo dohooramihaga kove yaga, miyo roma ing'anaga vati, miyo hawanda wonga.

¹⁶ Mwa enne ohokalawo azilege annaga makalelo olingana na hiyo atu, liye disakwinya mulomo waga. Agadisakwinyile, dohogudubulraga mulomo, miyo wonga na wenne aimenle vevale vafwanyeya miyo vale, miyo ira: <<Dihikwa mbwiyeni, miyo eni dili murenda eto eni dili lohulo na mwasa wa jejo jaona miyo!

¹⁷ Kodi jinawandeya avi miyo namalaba wenyu diwongege na mbwiyaga? Miyo eni kadinna kopolo. Eto no vuma wene kannawanda.>>

¹⁸ Evale wenne anna makalelo olingana na mutule ohowelela adihindaga akoka, liye dilimbiha

¹⁹ awongaga eraga: <<We uli mulombwana oziveliwiwa. Kuove, murendele akale na weyo. Ukale wa kopolo eto ukale olimba murima.>> Evale awongaga na miyo mazu anne, doholimbiheyaga eto dohowongaga diiraga: <<Nyo mbwiyeni muhudilimbiha! Nona nyo podi wonga yenno inafuna nyo wonga.>>

^20-21 Liye ohowongaga eraga: <<Kodi uhuiziwa mwasiwa uzele miyo wa weyo? Miyo dizele uwandela jejo jalrembiwe muwari mwa Livuru na Ibaribari. Damala uwandela, nnowelela wana na musogolrelri wa Perisiya. Dakumaga wewo, unafuna za wana na miyo gu musogolrelri wa Geresiya. Eto dawanaga na aliwa kalivo mmohiwa unafuna dikamiheda ahali Migeli wenno unafwanyeya agali musogolrelri wenyu!>>