Daniyeli 1 - Mazu Otchena a Mulungu

Daniyeli na afwaye

¹ Yaka yaneraru yatonga Jeyowaki mwene wa Juda, Nabukodonozore mwene wa Babiloniya ohovenyaga na anyakondo aye, aliwa dowa Jeruzalemu, irindja sidadi yatene yenne ira kagondjihe.

² Evale Nabwiya ohosakanya ira Nabukodonozore awande mugondjiha Jeyowaki mwene wa Juda ule eto amuwake pandi imohi ya fwaramento dalabetchana atu Nyumba ya Mulugu. Mwa enne Nabukodonozore ule agamanle mugondjiha, ohotukulaga fwaramento dile, liye dowana nyumbani wa mulugu waye mwilamboni mwa Sinari, liye volotchiha nyumba mwakoya atu fwaramento da mulugu waye.

³ Mwa enne mwene Nabukodonozore ohomuwandelaga mulombwana Aspenaji, wenno ali mundimuwa wa anamalabaye, liye ira: <<Miyo nnafuna ira udowe waasake muwari mwa Ana Izarayeli, atu a muibalini mwa mwene, nari a muibalini mwa atu oiziweya,

⁴ azombwe ohokana yotakala ili yatene, maningo ewa matene, azombwe oriya, ofundjetchetcha, oiziwetchetcha, oonelramo na a toto, ofwanela kala na miyo palasiyoni waga. Aliwa kafundjihiwe wonga no lremba uwa wene iwongelo ya aBabiloniya.>>

⁵ Evale mundimuwa Aspenaji ohadowelaga azombwale, aliwa za. Kagazile, mwenole ohotonga ira aliwa kadjege jodja jejo jadja mwene malambo matene eto ira kang'wege vinyu wenno ang'wa liye. Aliwa eto kohovahiwa ira kafundjihiwe yaka taru ira magomelo wa yaka dedile kadowe kalabege mabasa vamentoni va mwene Nabukodonozore.

⁶ Mwa azombwe kasakulriwe ale, kohokalamo azombwe annayi ala: Daniyeli, Ananiya, Mizayeli, na Azariya. Aliwa kakumile nlogo na Juda.

⁷ Mbwenye mundimuwa wa anamalaba atene a mwene Nabukodonozore ule ohavahaga mazina mamohiwa. Daniyeli ohonvaha nzina na Beltesazare, Ananiya liye nvaha nzina na Sadaraki, Mizayeli liye nvaha nzina na Mezaki eto Azariya liye nvaha nzina na Abedenego.

⁸ Mbwenye muzombwe Daniyeli ohela mmirimani mwaye ira ahavitakalihe na jodja jejo javahiwe atu ira kadjege jokumela meza ya mwene, nne zela vinyu wenno wang'wetcha mwene. Mwa enne liye ohonvepaga mundimuwa wa anamalaba ule ira: <<Nnauvepani ira murumelihe ira dahavitakalihe na jodja ji.>>

⁹ Mulugu ohosakanya ira mulombwana Daniyeli awande fwanya upama na tangaranga vamentoni va mundimuwa wa anamalaba ule.

¹⁰ Evale mundimuwa wa anamalaba ule ohomuwandelaga Daniyeli eraga: <<So inaova miyo, miyo nnamuova mbwiyaga, mwene wenno ukumihile utongi zela jodja jinafuna nyo djaga eto zela jong'wa jinafuna nyo ng'waga. Tchoira nyo mwahadje jinadja azombwe afwinyu eto mwenole aza, aona ira nyo muhumala wonda eto yavweya ira kamunadja juvahileni liye, liye podi funa jodigwada muru waga na mwasa wenyu.>>

¹¹ Evale Daniyeli ohodowa wa mundimuwa ahambihiwe na mundimuwa wa anamalaba ule ira liye amuing'anelege Daniyeli na Ananiya na Mizayeli na Azariya. Aganfwanyile ohomuwandelaga eraga:

¹² <<Miyo nnouvepani ira munixixe hiyo anamalaba enyu malambo kumi, munivahaga jalo ja mmindani ira nidjege eto mahindje ira ning'wege!

¹³ Hiyo nnafuna munixixe muone makalelo anafuna hiyo kana, vamohi na makalelo anafuna kana azombwe anadja jodja ja mwene. Mwagahiyanihilevo, munoirana yenno inafune nyo na hiyo vano anamalaba enyu.>>

¹⁴ Mwa enne liye ohovwaga yovepa yewa, liye axixa malambo kumi, kadjaga jalo ja mmindani eto kang'waga mahindje.

¹⁵ Mwa enne magomelo wa malambo kumi ale, fwanyeya ira maningo ewa kohofwanyeyagana makalelo apama, aliwa kohomalaga ruva hiyaniha na azombwe atene kadjetcha jodja ja mwene.

¹⁶ Mwa enne mundimuwa wenne aaing'aneletcha ule, ohotonga ira kahavahiweve akoka jodja jakuma vameza va mwene na vinyu wavahiwe atu ira kang'wege, mbwenye kavahiwege jalo ve bahi.

¹⁷ Fwanyeya ira va azombwe annayi ala, Mulugu ohavaha zelru no iziwetchetcha zela yolremba ili yatene no nonelamo watene. Eto Mulugu ohonvaha mulombwana Daniyeli iwandelo yotapulela joona na joroha jatene.

¹⁸ Magomelo wa yaka taru dofundja dile, mwene Nabukodonozore oharuma atwaye ira kaazegena azombwale vamentoni vaye. Evale mundimuwa wa anamalaba ule ohatukulaga azombwe atene, liye adowana vamentoni va mwene.

¹⁹ Evale mwene ohotapanyaga na aliwa eto kavafwanyeyaga muzombwe okwakwanela na Daniyeli, Ananiya, Mizayeli na Azariya. Na mwasa wenne, azombwe annayi ale kohalaga, aliwa labaga vamentoni vaye.

²⁰ Fendo datene mwene afuka liye zela yengo ili yatene yafuneya ira ilabiwena zelru nari iziwetchetcha, mwenole ofiyeda ona ira atu annayi ale kohokana toto didjindji akwaranya ang'anga okwima atene na aliba visangwisangwi atene kafwanyeya muumweneni mwaye.

²¹ Mulombwana Daniyeli ohokalagave palasiyoni wa mwene wewule fiyeda yaka yaromile tonga mwene Siru.