Anamasogolrelra 8 - Mazu Otchena a Mulungu

Gondjihiwa wa amwene ambinli a akuda Midiyani

¹ Evale atu a nlogo na Efarayimi kohomuwongagana mulombwana Jideyawu keraga: <<Kodi muirele nni jokala ha jejo? Mwasiwa gwa nni muza mwahaniitanaga mudowaga wana na akuda Midiyani?>> Mwa enne kohomuruwanaga na makalelo ohokala a masika.

² Mbwenye liye ohawakulaga eraga: <<Kodi yengo tchivi indimuwa isakanyile miyo ukwaranyani nyo? Imala iziweya ira uva ovuruliwa wa Efarayimi gwapama kwaranya uva oroma handiwa wa Abiyezeri.

³ Tchoira Mulugu uhuuvahani mmandani mwenyu asogolrelri a akuda Midiyani, Orebe na Zebe. Nnga evo kodi yengo tchivi ilukulu isakanyile miyo yolingana na jairile nyo?>> Evale Jideyawu agawongile mazu anne, mirima dewa dohokurumuwaga.

⁴ Mwa enne mulombwana Jideyawu ohozaga lambuwa muhindje Jordawu vamohi na alombwana 300 anno kafwanyeya vamohi na liye. Atene anne kafwanyeyaga kagamanle waheya, mbwenye masiki kagawaheyileve, kohokalelagave ahara amwidaniwa.

⁵ Evale mulombwana Jideyawu agafiyile tatamo imohi yaitaniwa Sukoti, ohowongaga na atu a wewule eraga: <<Pepani nnouvepani ira mwaavahe alombwana anafwanyeya na miyo ala mwana pawu da vang'ono, mwasiwa aliwa kohotabwa waheya bure. Eto miyo nnatamangela musogolro ante difiyede afwanya amwene a akuda Midiyani, anno anafwanyeya kagali mulombwana Zeba na Salimuna.>>

⁶ Mbwenye asogolrelri a ilambo ya Sukoti ule, kohowongaga keraga: <<Kodi vihikala wandeya ira hiyo naavahe pawu anyakondo awo agali Zeba na Salimuna kinakale mmandani mwawo?>>

⁷ Mwa enne mulombwana Jideyawu ohowongaga liye ira: <<Miyo nnawonga ibaribari ira Yehova adivaheda Zeba na Salimuna mmandani mwaga, nnouwaxulani na minga da mukokolani na makaruwe!>>

⁸ Evale Jideyawu na afwaye kohovenyihana kadowaga sidadi ya Penuweli. Kagafiyile wewule, Jideyawu ohavepaga pawu atu a sidadi ya Penuweli ule na makalelo amohive nnga mwavepele liye akuda Sukoti. Mbwenye na aliwene kohowakulaga na makalelo mamohive nnga kawakunle akuda Sukoti.

⁹ Na mwasa wenne, Jideyawu ohowongaga na akuda Penuweli ale, liye ira: <<Miyo difiyeda welawo mwa murendele, nnoza dibwanyule nyumba yolapa ya gwarda ila!>>

¹⁰ Mwa tempu yenne, mwene Zeba na mwene Salimuna kafwanyeya sidadi ya Karikori kagali vamohi na anyakondo ewa wandamelana alombwana 15.000. Anyakondo ale kali alombwana atene ohala a anyakondo a pandi ya makumelo wa nzuwa, tchoira alombwana amohiwa okwakwana 120.000 owana na supada kohomala piwa.

¹¹ Evale mulombwana Jideyawu ohodowaga wewule aharaga ndila ya atu anno kakaletcha mmisasani pandi ya makumelo wa nzuwa wa sidadi ya Noba na Jogibeya. Mwa enne ohakumelelaga moarurumutcha, liye roma wana na aliwa, mwasiwa aliwa tempu yenne kafwanyeyaga opwaseyene.

¹² Mwa enne amwenale Zeba na Salimuna kohotawaga. Evale Jideyawu ohoromaga ahara, liye afwanya. Mwa enne ohamangaga amwene ambinlene a akuda Midiyani ale, Zeba na Salimuna. Eto na mwasa wa jejo jaira Jideyawu, nikuru na anyakondo ewa atene nohoroma wenda zagi zagi moova.

¹³ Evale Jideyawu mwana Jowasi ohowelagawo kondoni azelaga pandi ya nkuma wa Hereji.

¹⁴ Eto ohomuhinda muzombwe mmohi wa Sukoti, liye roma nfukeda zela andimuwa na asogolrelri a Sukoti. Mwa enne muzombole oholremba mazina a asogolrelri atene na andimuwa ewa atene, liye nvaha Jideyawu. Fwanyeya ira indjiva uwa kali alombwana 77.

¹⁵ Noira enne mulombwana Jideyawu ohodowaga afwanya alombwana a sidadi ya Sukoti, liye wonga eraga: <<Kaing'anani, Zeba na Salimuna ala! Vale kamwadilramwisa mwiraga: <Kodi vihikala wandeya ira hiyo naavahe pawu anyakondo awo anno kagomile agali Zeba na Salimuna kinakale mmandani mwawo?> >>

¹⁶ Evale Jideyawu ohotukulaga minga da mukokolani, liye ahinda andimuwa a sidadile, roma awaxulana, aalangaga alombwana atene a Sukoti.

¹⁷ Agairile eno, Jideyawu ohodowaga sidadi ya Penuweli, liye bwanyula nyumba yolapa ya gwarda yafwanyeya wewo. Nomala eno, liye mala apa alombwana a sidadile.

¹⁸ Noira eno, ohomuwandelaga mwene Zeba na mwene Salimuna, liye ira: <<Kodi alombwana mwaapile nyo sidadi ya Tabori kali a makalelo bavi?>> Aliwa kohowakulaga keraga: <<Kali olingana na weyo. Kada mutu ali olingana na mwana mwene.>>

¹⁹ Mwa enne liye ohowongaga eraga: <<Anno mwaapile nyo kali abalaga, ahima a mmaga. Miyo peno nnawonga vamentoni va Yehova okalawo ira ahakanlege nyo mwaahiya aliwa kakalawo, na miyene peno kadaupani, dagomela uhiyani.>>

²⁰ Noira enne ohomuwongana mwanaye murandji aitaniwa Jeteri, liye ira: <<Kavenya, waape atwala.>> Mbwenye muzombole kawandilege pulula supada naye ira aapena, mwasiwa eraga ova tchoira liye afwanyeya agali mwana muzombwe.

²¹ Mwa enne Zeba na Salimuna kohowongaga keraga: <<Venya wenne wa mwinnya unipe. Tchoira mabasala ba a alombwana.>> Evale Jideyawu ohovenyaga, liye mpa mulombwana Zeba na Salimuna. Eto ohotukulaga akolare kafwanyeya mmakohini mwa akamelo ewa.

Jideyawu ohokonda umwene

²² Noira enne alombwana a Izarayeli kohomuwongana Jideyawu keraga: <<Hiyo nnafuna weyo unitongege, roma weyo, nari mwanawo, nari muzuliyo. Tchoira weyo uhuwanda nivunela mmandani mwa akuda Midiyani.>>

²³ Mbwenye mulombwana Jideyawu ohawandelaga eraga: <<Miyo kannarumela ira dutongegeni nyo, nne masiki mwanaga kanautongegeni! So mbwenye unafuna utongagani gu Yehova bahi.>>

²⁴ Eto Jideyawu ohawandelagave eraga: <<Miyo so nnafuna duvepeni yengo imohi bahi. Nnavepa ira kada mutu adivahe birinku dedo daawakile nyo amwidaninyu.>> Tchoira atu anne kaapile atu kohokana birinku da oru voira kali aJomayili.

²⁵ Evale alombwana a Izarayeli ale kohowakulaga keraga: <<Hiyo kaninna makani, nnorumela uvaha na mmirimani mwehu mwatene.>> Noira enne kohotandelaga kapa, kada mutu, liye tatilelaga evale birinku dedo daawakile atu amwidaniwa.

²⁶ Mwa enne kagagumanihile birinku datene da oru dedo davepile mulombwana Jideyawu, fwanyeya ira nyemela uwa ali kilu 20. Hiya yennove, Jideyawu ohovahiwa eto akolare vamohi na makurenti, vamohi na jowara ja kore ya musuzu wa bwanda, jejo jafwanyeyana amwene a akuda Midiyani ale eto ohovahiwa akolare anno kawarihile atu akamelo ale mmakohini.

²⁷ Evale Jideyawu ohotukulaga oru ule, liye sakanyana kuleti ya unamakuta, liye dowa hiya sidadi ya waniwa, sidadi ya Ofara. Mwa enne aIzarayeli atene kohoroma raruwa muwari momuhiya Mulugu, aliwa zaga kokorelaga kuleti ya unamakuta ya oru ile. Evale yowara yasakanyile liye ile, yafwanyeya yagali ratuwero ommanga Jideyawu vamohi na atu atene a vande vaye.

²⁸ Mwa enne akuda Midiyani kohogondjihiwa na aIzarayeli. Noira enne vohomala tempu ilukulu akuda Midiyani kahaatutchaga aIzarayeli. Mwa enne tempu yaliwo Jideyawu, ilambo yohokana murendele fiyeda yaka 40.

²⁹ Eto mulombwana Jideyawu, mwana Jowasi, wenno aitaniwa eto Jerubaali ohodowa, liye kalaga vande vaye.

³⁰ Jideyawu anna ahima a anapongwe 70 aabanle liye, mwasiwa ohakana ahiyana adjindji.

³¹ Eto mwendaye afwanyeya Sikemu ohombalana mwana mmohi wa mwanapongwe, liye nvaha nzina na Abimeleki.

Kwa wa mulombwana Jideyawu no peruwa wa aIzarayeli

³² Mulombwana Jideyawu mwana Jowasi ohokwa agaulunle pama. Evale ohokoyiwa nifukweni wakoyiwe babaye Jowasi sidadi ya Ofara mwilamboni mwa akuda Abiyezeri.

³³ Mwa enne Jideyawu agakwile, tempu imohive Ana Izarayeli kohowelela raruwa kaaharaga amilugu a Baali. Kohomutukula mulugu mmohi aitaniwa Baali-Berite ira akale mulugu wewa.

³⁴ AIzarayeli tchawandile muumbuwela Yehova Mulugu wewa wenno aawombonle mmandani mwa amwidaniwa atene anno kaawerewerile.

³⁵ Nne tchawandile aoniha upama atu a muibalini mwa Jerubaali wenno aitaniwa eto Jideyawu molingana na upama watene aairele liye aIzarayeli.