Anamasogolrelra 7 - Mazu Otchena a Mulungu

Yehova ohagondjiha akuda Midiyani muwari mwa mulombwana Jideyawu

¹ Noira enne mulombwana Jerubaali, wenno unafwanyeya agali Jideyawu, ohovenyaga na mabebehene vamohi na atu atene kafwanyeya vamohi na liye, aliwa dowa kunga misasa diwa wandamelana isime ya Harode. Nimburo nadowilege atu kala nne, misasa da akuda Midiyani daakalela pandi ya norti, mudaboni eni, sogolro wa mwango More.

² Evale Yehova ohomuwandela mulombwana Jideyawu eraga: <<Atu anafwanyeya vamohi na weyo kohotabwa indjiva. Miyo ira duvahedeni akuda Midiyani mmandani mwenyu, kannafuna ira mukale atu oindjiva eno, tawiha ira aIzarayeli anavitukulelege vamentoni vaga, kerege: <Hiyo niwandile vivunela okave na ndanda nehu na kopolo.>

³ Nona uvenye tchineneva eni, urome awandela atu atene ira: <Mutu wenne unaova eto unangurumela, akumemo mmwangoni mwa Jileyadi munafwanyeya hiyo, adowege vande.> >> Mwa enne mazwale kagafiyile wa aIzarayeli, kohowelaga aIzarayeli okwakwana 22.000, aliwa hala atu 10.000 bahi.

⁴ Noira enne Yehova ohomuwandelagave Jideyawu akoka eraga: <<Atu kahanle ayo na aliwene kohosimbwa indjiva. Waatukule, waadowena mwiko. Waafiyana wewule, nnouwandela makalelo anafuna we asakulra. Mutu wenne nnauwandele miyo ira: <Wenna adowe kondoni vamohi na weyo>, wenno gunafuna dowa. Mbwenye wenno nnauwandele miyo ira: <Ula kadowe>, wenno kanadowa vamohi na weyo kondoni.>>

⁵ Noira enne Jideyawu ohatitelana atwale mwiko. Evale Yehova ohomuwandela mulombwana Jideyawu, liye ira: <<Waawandele ira atene kang'we mahindje. Muwari mong'wa mule, atu anne unaaone we karungaga mahindje na mandiwa, kang'waga na nlumi nnga jinera mwanambwa, atu anno waahele ikukuru yewene. Eto atu anne anang'wege kagakokorile na mabodo ewa, na aliwene waahele ikukuru yewene.>>

⁶ Evale atwale kagaromile ng'wa, atu orunga mahindje na manda kadowagana wanoni kafwanyeya kagali alombwana 300 bahi. Mbwenye atu atene amohiwa ohala ale kohokokoraga na mabodo, aliwa roma ng'wa mobwiniha milomo.

⁷ Evale Yehova ohomuwandela Jideyawu liye ira: <<Miyo nnafuna didowe daavunele aIzarayeli, duvahede akuda Midiyani mmandani mwawo muwari mwa alombwana 300 anno kang'wela mahindje mmandani. Mbwenye atu amohiwa atene ohala ayo, kada mutu adowege vande vaye.>>

⁸ Evale alombwana 300 ale kohotukulaga jodja vamohi na palraza diwa. Noira eno, Jideyawu oharuma aIzarayeli amohiwa ohala ira kawelelege mmavande mwiwa. Fwanyeya ora yenno misasa da akuda Midiyani dafwanyeya mudaboni eni, pedi wa aIzarayeli.

⁹ Noira eno, siku nimohive nenne mahiyuni uwa Yehova ohomuwandela Jideyawu eraga: <<Uvenye udowe vamisasani va amwidaninyu ira wawane na aliwa, mwasiwa miyo dihimala uvaheda aliwa mmandani mwawo.

¹⁰ Mbwenye akala weyo unoova dowawo uwa, ubabihe venya vamohi na muzombwe wawo wenno unaitaniwa Pura ira udowe vamisasani vewa.

¹¹ Wadowa wewule, unovwa jatene jinafuna atu wonga. Mwa enne wagavwile, manda awo anolimba kopolo ira udowe wawane na aliwa.>> Evale Jideyawu ohovenya vamohi na muzombwe waye Pura, aliwa dowa fiya wandamelana nimburo nakala anyakondo oing'anela ndila.

¹² Fwanyeya ira mwa tempu yenne akuda Midiyani na aAmaleki vamohi na atu atene a makumelo wa nzuwa kohomalaga zala mudaboni nnga miserebo. Eto akamelo ewa kali oindjivetchetcha ohowanda kontareya nnga miseva da mutcherelani mwa bara.

¹³ Tempu yazemba Jideyawu afiyaga va amwidanaye vale, anfwanyilege mutu mmohi amuwandelaga nfwaye yoroha yaye eraga: <<Miyo dihiroha. Yoroha yaga daonne pawu ya sevada ipingiriyaga izaga vamisasani va akuda Midiyani. Yagafiyile vamisasani vale, yohodowaga bubuda musasa wa asogolrelri ehu, nfutukula musasa ule fiyeda gwela vati gwembelre.>>

¹⁴ Agamanle wonga yoroha yaye, nfwaye ule ohomuwakulaga eraga: <<Yoroha irohile we, kahi yengo imohiwa nari. Yoroha yawo inafwanyeya agali supada na Jideyawu mwana Jowasi, wenno unafwanyeya agali mulombwana wa Izarayeli. Tchoira Mulugu uhumala nvaheda mmandani mwaye hiyo akuda Midiyani atene vamohi na atu atene kali eva.>>

¹⁵ Mwa enne Jideyawu agavwile yowonga ya maliba roha ule vamohi na yotapuleliwa, ohomutamalelaga Mulugu. Noira enne, ohovenyaga, liye welela vamisasani va aIzarayeli. Agafiyile ohawandelaga aIzarayeli eraga: <<Kavenyani nidoweni, mwasiwa Yehova uhumala uvahedani mmandani mwenyu akuda Midiyani atene.>>

¹⁶ Mwa enne ohagawaga alombwana 300 ale makuru mararu. Eto kada mutu ohonvaha palraza na yombwe mohokala yengo. Evale kohotukula mendje dohinda, aliwa volotchiha muwari mwa jombwe jiwa.

¹⁷ Evale ohawandelaga, liye ira: <<Nyo mwatene mudiing'anege miyo eto inaira miyo, na nyenne musazihege yenno. Eto dafiya magomelo wa misasa da akuda Midiyani, inairena miyo na nyenne muirena imohive yenno.

¹⁸ Miyo vamohi na atu atene ali na miyo naimba palraza unde wa tatamo da misasa dewa, na nyenne muli nyo morungunuwa misasa dewa datene, muimbe palraza denyu eto mukuwe ira: <Yehova vamohi na Jideyawu!> >>

¹⁹ Evale ifunanga fiya vari na vari va mahiyu, agwarda oing'anela kagatchindjanne, Jideyawu vamohi na alombwana 100 kafwanyeyaga vamohi na liye kohofiyaga magomelo wa misasa da akuda Midiyani. Evale aliwa kohoimbaga palraza diwa eto kohotwaga jombwe janna atu mmandani mwiwa.

²⁰ Mwa enne makuru amararwene kohoimbaga palraza diwa eto kohotwaga jombwe jiwa. Evale mmandani mwiwa muwononi oromana kafwanyeya kagahidedile mendje dohinda da munlo dile eto ndanda na muwononi odjana kafwanyeya kagahidedile palraza diwa dedo daimba atu. Evale kokuwaga keraga: <<Supada na Yehova vamohi na Jideyawu!>>

²¹ Evale kada mutu ohokalaga nimburo neno vaimenlege liye, aliwa werewera vamisasani va akuda Midiyani vale. Mwa enne anyakondo atene a akuda Midiyani kohoromaga tamanga kakuwaga, aliwa tawaga.

²² Evale alombwana 300 ale kagaimbile palraza diwa, Yehova ohaviringaniha akuda Midiyani zelru diwa, kada mutu rungunuwaga mulataga nfwaye na supada naye vamisasani vatene evale. Evale kohoromaga tawa kadowaga Zerera ante aliwa fiya Bete-Sita, ante aliwa fiya mmadilreni mwa Abeli-Meyola nkumani wa Tabate.

²³ Noira enne kohokalawo kaaitana alombwana a Izarayeli okumela nlogo na Nafitali, na a Azeri vamohi na atu a nlogo natene na Manasesi. Evale kohoza, aliwa roma ahara akuda Midiyani.

²⁴ Eto mulombwana Jideyawu ohorumihaga milanyo wa atu atene kakala vilambo da mmwangoni mwa Efarayimi, liye wonga eraga: <<Mutite mudowe mwawane na akuda Midiyani eto mudowe mwaagwadele sogolro wewa mamburo olambuwela muhindje wa Jordawu fiyeda sidadi ya Bete-Bara.>> Mwa enne alombwana atene a Efarayimi kagamanle gumanela, kohodowaga agwadela akuda Midiyani, aliwa mala funga molambuwela muhindje wa Jordawu fiyeda sidadi ya Bete-Bara.

²⁵ Evale kohahinda asogolrelri ambinli a akuda Midiyani, mulombwana Orebe na Zebe. Evale kohompa mulombwana Orebe va nibweni eni kaitana atu nibwe na Orebe eto mulombwana Zebe kohompa va nimburo nonyingalelamo uva eni kaitana atu nimburo nonyingalelamo uva na Zebe. Evale kohaharave akuda Midiyani. Eto kohotukulaga miru da asogolrelri ambinli anno kaapile atu Orebe na Zebe, aliwa dowana wa mulombwana Jideyawu kombela ya muhindje Jordawu.