Anamasogolrelra 6 - Mazu Otchena a Mulungu

Ana Izarayeli kohogondjihiwa na akuda Midiyani

¹ Mbwenye Ana Izarayeli kohosakanya jabure vamentoni va Yehova. Na mwasa wenno Yehova ohavaheda mmandani mwa akuda Midiyani fiyeda yaka tanu na mbinli.

² Akuda Midiyani kali a kopolo na owopiha akwaranya aIzarayeli. Mwa enne aIzarayeli ale na mwasa ozuzumihiwa bure na akuda Midiyani ale, kohodowa timba miliha mmwangoni vamohi na mmafukweni vamohi na mamburo olimba ira kawandege tawelamo.

³ Tchoira tempu yavenya aIzarayeli kazalaga jozala jiwa, yafiya tempu yohanda, akuda Midiyani na akuda Amaleki vamohi na atu amohiwa a makumelo wa nzuwa kovenya aliwa za roma wanaga na aIzarayeli.

⁴ Mwa enne koza, aliwa kunga misasa diwa, roma nongaga johanda jiwa fiyeda ilambo ya Gaza. Mwa enne aliwa tchaahiyeda aIzarayeli ale jodja ja vang'ono, nne mabila nne ng'ombe nne aburu.

⁵ Mwasiwa kazaga ira kawane na aIzarayeli ale, kafiya vamohi na anavinyamiwene vamohi na misasa diwa dene. Aliwa kaza nnga miserebo didjindji dohowanda kontareya. Aliwa indjiva wewa tchawanda kontareya nne akamelo ewa indjiva uwa tchawanda kontareya. Mwa enne aliwa kafiya, kovolowa mwilamboni mwa Izarayeli mule ira katolotche jatene.

⁶ Mwa enne aIzarayeli kohofiyeda simela valukulu na mwasa wa akuda Midiyani. Noira eno, aliwa koholobela wa Yehova monla ira aakamihede.

⁷ Evale aIzarayeli kagalobenle wa Yehova monla na mwasa wa akuda Midiyani ale,

⁸ Yehova ohomuruma namafiyiheda mmohi wa aIzarayeli. Namafiyiheda ule ohodowaga wonga na aIzarayeli eraga: <<Yehova Mulugu wa Izarayeli unawonga ira: <Miyo duhusogolrelani kuma ilambo ya Ijipitu eto duhukumihani muuzarini mwafwanyeya nyo

⁹ eto duhuvunelani mmandani mwa akuda Ijipitu vamohi na mmandani mwa amwidaninyu atene anno kauzuzumihani. Eto dihiatamangiha vasogolro venyu, miyo tukula ilambo yewa uvahani nyo.

¹⁰ Evale miyo dohouwandelani ira: Miyo dili Yehova Mulugu wenyu. Kamwaahare amilugu a aAmore anafwanyeya ilambo yenno ili nyo. Mbwenye dagauwandenleni enne, kamwafunne divwa.> >>

Mungelro wa Yehova ohoza wonga na mulombwana Jideyawu

¹¹ Siku nimohi Mungelro wa Yehova ohozaga liye garati vati va mutengo wa karvaliyo unafwanyeya ilambo ya Ofara, wenno ali mutengo wa mulombwana Jowasi nkuda Abiyezeri. Eto tempu yenno mwanaye Jideyawu afwanyeya abubudaga tirigu nimburo nonyingalela uva. Liye airana mozemba tawiha ira akuda Midiyani ananfwanye, kamuwake.

¹² Evale Mungelro wa Yehova ohomutwanyuwelaga, liye wonga eraga: <<Yehova uli na weyo, we mulombwana wa kopolo owanda wana kondo!>>

¹³ Mbwenye Jideyawu ohowakulaga eraga: <<Pepani andimuwa! Akala Yehova uli vamohi na hiyo, nnga mwasiwa gwa nni ubure watene wenna akala na hiyo? Nnga kodi jigomenle waani jotikiniha jatene janiwandeletcha ababihu keraga: <Yehova ohonikumiha ilambo ya Ijipitu.>? Mbwenye peno Yehova uhuninyanyala eto uhunivaheda mmandani mwa akuda Midiyani.>>

¹⁴ Evale Yehova ohomuing'ana mulombwana Jideyawu, liye muwandela eraga: <<Kavenya na kopolo dinna we, udowe waavunele aIzarayeli mmandani mwa akuda Midiyani. Unauruma gu miyo Yehova.>>

¹⁵ Evale liye ohowakula eraga: <<Pepani andimuwa, kodi miyo nnafuna didowe daavunele aIzarayeli na makalelo bavi? Kaing'anani, tchoira miyo abalaga ba atu osimbwetchetcha simela muwari mwa nlogo na Manasesi eto miyo nnafwanyeya dagali mwana ogomiheda vande va babaga.>>

¹⁶ Mbwenye Yehova ohomuwakulaga eraga: <<Miyo mbwenye nnokala na weyo. Weyo wadowa, unoaporotcha akuda Midiyani kalaga nnga atene gu mutu mmohi bahi.>>

¹⁷ Evale Jideyawu ohowongaga na Yehova eraga: <<Akala munodifwewela murima, nnavepa ira mudivahe ionihedo yooniha ira nyo munawonga na miyo muli Yehova.

¹⁸ Nnouvepani ira mwahakumevo veva vinafwanyeya nyo, miyo nnafuna dibabihe dowa vande ira dizena yovelela wa nyo, dihiye vamentoni venyu.>> Evale Yehova ohomuwakulaga eraga: <<Miyo nnerege udediha eva ante weyo ufiyede welawo.>>

¹⁹ Mwa enne Jideyawu ohodowaga vande, liye pa mwana mbuzi imohi, mala sakanyeda pama eto ohotukulaga kilu kumi da utu, liye wotcha mabolu ohosakanyiwana leverina. Ohotukulaga nyama ya mbuzi ile, liye hela mmutangani, musuzuwa liye hela mpanelani. Liye tukula jatene ejile, dowana ante vamutengoni wa karvaliyo vevo vafwanyeya mungelro ule, liye za hiya vamentoni vaye.

²⁰ Mbwenye mungelro wa Mulugu ule ohomuwandelaga eraga: <<Katukula nyameyo vamohi na mabolu ohoheliwa leverina ayo, uhele vazulu va nibwe ni, amala ukutulele musuzuwa vazulu viwa.>> Evale Jideyawu ohoirana.

²¹ Evale Mungelro wa Yehova ule ohovenyihaga imiri yafwanyeya mmandani mwaye, magomo wa imirile liye sakwinyana nyama na mabolu ohosakanyiwana leverina jafwanyeya vanibweni vale. Agairile enne, ohokuma munlo vanibweni vale, mala jiha nyamele vamohi na mabolu ohoheliwa leverina ale. Noira enne Mungelro wa Yehova ule ohodimelagavo vamentoni va Jideyawu.

²² Evale Jideyawu ohoona ira na ibaribari ali Mungelro wa Yehova azile awongaga na liye. Mwa enne Jideyawu ohowongaga eraga: <<Dihikwa miyo, so Nabwiya Yehova! Mwasiwa dihimuona Mungelro wa Yehova kove na kove!>>

²³ Mbwenye Yehova ohomuwandelaga eraga: <<Murendele akale na weyo! Kuove! Weyo kunakwa.>>

²⁴ Noira enne Jideyawu ohommangelaga Yehova ibuwa nimburo nenne. Ohovaha ibuwele nzina noira Yehova gu Murendele. Ante fiyeda siku na peno ibuwele inafwanyeya Ofara wewule sidadi ya akuda Abiyezeri.

²⁵ Siku nimohive nenne mahiyuni uwa, Yehova ohomuwandelaga Jideyawu eraga: <<Utukule ng'ombe ya mulombwana ya babawo, yenno inafwanyeya yagali ng'ombe yanembinli inna yaka tanu na mbinli, udowe wabwanyule ibuwa ya Baali, yenno inafwanyeya yagali ibuwa ya babawo eto ugwade nimbozo na mulugu Azera neno nnafwanyeya wandamelana vaibuwani vale.

²⁶ Eto uze ummangele ibuwa Yehova Mulugu wawo vazulu va mwango va. Ibuwiwa ikale yomangiwa na mabwe otandiwa pama. Wamala eno, utukule ng'ombe yanembinli ile, uvelele mukuto otumeya, utumeye na kuni nnafuna kuma nimbozo na mulugu Azera neno nnafuna we gwada.>>

²⁷ Evale mulombwana Jideyawu ohatukulaga alombwana kumi muwari mwa anamalabaye, liye dowa irana jatene nnga mwemo mwawongele Yehova. Mbwenye na mwasa oaova atu a vande va babaye vamohi na atu a sidadile, jatene ejo liye airilena na mahiyu, hiya irana na ntana.

²⁸ Mwa enne alombwana a sidadile kagavenyile na mabebehene, kafwanyilege ibuwa ya Baali yagabwanyuwile eto nimbozo na mulugu wewa Azera neno nafwanyeya wandamelana vaibuwani vale nagagwadiwile eto ng'ombe yanembinli ile yagaveleliwe mukuto vazulu va ibuwa ixa yenno yamangiwe.

²⁹ Evale aliwa kagaonne enne, kohoromaga wonga mmohi na nfwaye keraga: <<Kodi bani uirilena jeji?>> Mwa enne aliwa kagafuketchetche pama, kohowandeliwaga ira: <<Uirilena eji gu Jideyawu mwana Jowasi.>>

³⁰ Evale alombwana a sidadile kohowongaga na mulombwana Jowasi keraga: <<Kamukumihede unde mwanawo ira nimpe, mwasiwa uhubwanyula ibuwa ya Baali eto uhugwada nimbozo na mulugu wehu Azera neno nafwanyeya wandamelana vaibuwani vale.>>

³¹ Mbwenye Jowasi ohawandelaga atu atene kazile kawongaga mazwale, liye ira: <<Kodi nyo munafuna muwane vamalroni va Baali? Nyo munafuna ira munvunele? Miyo nnafuna duwandeleni ira mutu wenne unafune jokangana vamalroni va Baali, mabebehi a peno eva eni unagomela piwa. Akala Baali gu mulugu, avivunele liyene mwinnya. Mwasiwa kohobwanyula ibuwa yaye.>>

³² Na mwasa wenno siku nenne kohoroma muitana Jideyawu na nzina na Jerubaali, ku wonga ira: <<Baali akangane na liye.>> Kawongela eno mwasiwa Jideyawu ohobwanyula ibuwa ya Baali.

³³ Eto akuda Midiyani atene na akuda Amaleki vamohi na atu a makumelo wa nzuwa owanda wana kohogumanelaga vamohi, aliwa lambuwa muhindje Jordawu, dowa manga misasa diwa ndabo na Jezereli.

³⁴ Mwa enne Munemba wa Yehova ohomuzelaga mulombwana Jideyawu. Evale liye ohoimbaga palraza ira atu kagumane. Evale akuda Abiyezeri atene kohogumanela, aliwa roma muhara liye.

³⁵ Eto liye oharumagana atu milanyo muwari mwa nlogo natene na Manasesi, na aliwene kogumanela, roma muhara Jideyawu. Eto ohorumihaga milanyo wa nlogo na Azeri, Zebuloni, vamohi na Nafitali, atene aliwa dowa gumana na liye.

³⁶ Mwa enne Jideyawu ohowongaga wa Mulugu eraga: <<Akala na ibaribari munafuna mwaavunele aIzarayeli muwari mwa ndanda naga nnga muwongele nyo, nnafuna jiireye eni.

³⁷ Miyo nnafuna ditukule mawoya a nibila, dihele nimburo nobubudavo jalo. Mwa enne dagamanle irana eno, ningame nakala vamawoyani bahi, mbwenye mmambalo mwa mawoya ala, teya yatene ikala yoummene, era eno, miyo nnowanda kana ibaribari ira nyo munafuna mwaavunele aIzarayeli muwari mwa miyo nnga muwongele nyo.>>

³⁸ Mwa enne johoireya. Mmetcheloni muwa Jideyawu agavenyile na mabebehene ohodowaga, liye kamulra mawoyale. Evale agakamulrile, mahindjiwa kohozalaga mwana tijela.

³⁹ Evale mulombwana Jideyawu ohowongaga na Mulugu eraga: <<Pepani, Yehova kamutakaleliwe na makalelo ohokala a masika zela miyo, mwasiwa nnafuna diwongeve akoka fendo yenna bahi. Nnauvepani fendo yenna bahi ira mudikanihe ibaribari muwari mwa mawoyala. Nnauvepani ira fendo ila vamawoyani vikale voumma, mbwenye mmambalo mwa mawoyala teya yatene ikayena ningame.>>

⁴⁰ Evale mahiyu anne Mulugu ohoirana nnga mwemo mwavepile Jideyawu. Unde wagatchile ningame nafwanyeya mmambalo mwa mawoyale. Mbwenye vamawoyani vale, mawoya matene kafwanyeyaga oummene.