Anamasogolrelra 5 - Mazu Otchena a Mulungu

Nyumbo ya Debora na Baraki

¹ Mwa enne Debora vamohi na Baraki mwana Abinowawu kohoimbaga nyumbo siku nimohive nenne keraga:

² Andimuwa kagavenyile ira karome asogolrelra aIzarayeli, eto na atwene kohovivelela mofuna mwewa. Nona Yehova atamaleliwe.

³ Nyo amwene kavuruwanani, nyo asogolrelri mureye mabaru enyu, miyo nnafuna dimuimbele Yehova, nnafuna dimuimbele nyumbo Yehova, Mulugu wa Izarayeli.

⁴ Nyo Yehova mwagakumile Seyire, muwendaga roma pandi ya Edomu, ilambo yatene yohotekenyeya eto zulu wohokumela muzongwe, mirambo dohomorihaga mahindje.

⁵ Mwango dohotekenyeya vamentoni va Yehova, fiyeda mwango Sinayi ohotekenyeya vamentoni va Yehova, Mulugu wa Izarayeli.

⁶ Malambo aliwo mulombwana Sangari mwana Anati, malambo aliwo mwana muhiyana Jayeli, ndila dapama dohiyiwa, kadaviriwa. Eto atu anne kakana ulrendo wewa kahara ndila ding'onong'ono dokoromana.

⁷ Tatamo da Izarayeli dohosanduwa madebe, dohosanduwa kala madebe fiyeda miyo dagali Debora, miyo venya ira dikale mma wa aIzarayeli.

⁸ AIzarayeli kagaromile asakulra amilugu axa, evale kondo yohotatamuwa. Muwari mwa atu 40.000 a aIzarayeli, kalivo akana defeza ya kondoni nari mwanango.

⁹ Miyo murima waga uli vamohi na asogolrelri a aIzarayeli, anne kavivelenle mofuna mwewa muwari mwa mulogo watene. Nona Yehova atamaleliwe!

¹⁰ Nyo munawenda na aburu otchena mwagagaratile mipando dapama, nyo munawenda vati, inafwanela muwongege jeji.

¹¹ Mmaisimeni aliba runga mahindje anawonga mazu ohagalala, mazu owonga zela gondjiha wapama wa Yehova, kawongaga ira liye ohakamiheda aIzarayeli gondjiha. Evale atu a Yehova kohodowa vamilangoni da sidadi.

¹² Karurumuwa, karurumuwa we Debora, karurumuwa, karurumuwa, urome imba nyumbo. Kavenya we Baraki, we mwana Abinowawu, waatukule atu ohindiwa anno kaumangile.

¹³ Mwa enne ale kahanle kohovenya dowa wa asogolrelri ewa, atu a Yehova kohoza wa miyo ira kawane kondo na amwidani a kopolo.

¹⁴ Wa nlogo na Efarayimi wohokuma atu anno kakala ilambo yakala akuda Amaleki wanle. Voharela kohoza atu a nlogo na Benjami vamohi na abaliwa. Nlogo na Makiri ku wewo wakumile asogolrelri a anyakondo, wa nlogo na Zebuloni wohokuma atu anno anatukula nkogozo wa asogolrelri.

¹⁵ Eto andimuwa a Isakari kohodowa vamohi na Debora. Atu a nlogo na Isakari kohoroma tamanga kamuharaga Baraki ndabo na kondo. Mbwenye atu a nlogo na Rubeni tchawandile vwanana, fiyeda aliwa hadowa vamohi na afwiwa.

¹⁶ Kodi mwasiwa gwa nni nyo hala mmakolrani mwa mabila? Kodi ali ira muvwege anamakumbuza kaitanaga mabiliwa? Atu a nlogo na Rubeni tchawandile vwanana, fiyeda aliwa hadowa vamohi na afwiwa.

¹⁷ Atu a Jileyadi kohala kombela ya muhindje Jordawu. Nnga nlogo na Dani mwasiwa gwa nni aliwa hala muwari mwa mwadeya dewa? Nlogo na Azeri nohogarati mwiko mutcherelani mwemo munaimela mwadeya.

¹⁸ Mbwenye atu a nlogo na Zebuloni kohovelela ingumi yewa fiyeda makwelo. Sawasawa atu a nlogo na Nafitali kohovelela ingumi yewa nimburo na kondo.

¹⁹ Mwa enne kohoza amwene, aliwa roma wana na hiyo. Amwene a Kana kohowana pandi ya Tanaki, wandamelana mahindje a Mejido. Mbwenye aliwa kitukunle yengo ili yatene ya parata, kipatile yengo ili yatene yowakiwa.

²⁰ Ante fiyeda ira na nyenyedi dene zulu dowana. Nyenyedi da zulu dohowana na mulombwana Sizera zulu wewo unafwanyeya atu.

²¹ Mwana muhindje wa Kizomi ohozala mahindje fiyeda alrowiha, mwana muhindje wa wanle wa Kizomi. We murima waga ukale wa kopolo, udowege sogolro mohoova.

²² Evale dodobwa da kavalo dohoroma vweya mokuwa muwari mowenda na mwasa osimbwetchetcha tamanga wa anyakondo kawendiha.

²³ Mungelro wa Yehova unawonga ira sidadi ya Meroji itembelrelriwe. Mwaatembelrelre atu anakala wewo mwasiwa aliwa kifunile za mukamiheda Yehova, kifunile za mukamiheda Yehova muwari mwa kondo yanna atwaye, kawanaga na atu a kopolo.

²⁴ Muwari mwa ahiyana atene, orelihiwa akale Jayeli, akale Jayeli mwadi Eberi nkuda Keni. Liye akale orelihiwa muwari mwa ahiyana atene anakala mmisasani.

²⁵ Sizera agavepile mahindje, liye anvahile mukaka. Ohonvaha mukaka osakanyediwa eto ahenle muwari mwa mwana tijela napama nomufwanela mwene.

²⁶ Liye ohotapula muwono waye oromana, liye tukulana peregu ya musasa eto muwono waye odjana ohotukulana martelo wa maliba hana. Evale ohombubuda Sizera, liye mudurumula muru waye, liye mpovola muru waye na peregu ya musasa.

²⁷ Evale mulombwana Sizera ohokokora na mabodo, liye gwa vamanyaloni vaye. Sizera ohokokora na mabodo, liye gwa. Vagwenle liye vale, ohokalave evo, liye fiyeda kwa.

²⁸ Evale mulombwana Sizera mmaye ohoing'anelaga vajanelani, liye roma patamelaga muwari mwa magaradi a janela eraga: <<Kodi mwasiwa gwa nni mwanaga Sizera aterelado waye wa kondoni dibeliwaga welawo? Kodi mwasiwa gwa nni hawandaga vweya tamanga wa kavalo na aaterelado aye?>>

²⁹ Mwa enne ahiyana afwaye a zelru kohomuwakula. Eto masiki liye mwinnya ohoviwakula ekave eraga:

³⁰ <<Afwase para dibeliwaga eni mwasiwa anagana jengo jaawakile atu amwidaniwa. Kada mulombwana unaatukula anamwali ambinli owu hehi namwali mmohi. Mwa jowakiwa, Sizera unatukula nguwo dokana kore dohiyana-hiyana, nguwo dokana kore dohiyana-hiyana dolrembeya, nguwo mbinli dokana kore dohiyana-hiyana dolrembeya ira diheliwege nkohini mwa muhiyanaye.

³¹ <<Yehova amwidaninyu atene katolowe na makalelo amohive anno! Mbwenye atu anne anauziveliwani, kakale nnga nzuwa nakumaga mwa kopolo diwa.>> Mwa enne ilambo yohokana murendele fiyeda yaka 40.