Anamasogolrelra 3 - Mazu Otchena a Mulungu

AIzarayeli kohotongiwa na mwene wa Mezopotamiya

¹ Yehova ohahiya malogo amohiwa mwilamboni mwa Kana ira aawombeze aIzarayeli anno kali kahanababihege ona kondo dawaniwa ilambo ya Kana.

² Jatene eji Yehova airelena ira ahima a Ana Izarayeli anno kali kahanaiziwe kondo, kawande iziwa ja kondo, ku wonga ira kawande fundjihiwa ja kondo.

³ Malogo Yehova aahiyile liye ba ala: Amwene atanu a aFilistewu na akuda Kana atene, na aSidoni, na aEvi kakaletcha vilambo da mmwangoni da Libano, roma mwango Bali-Erimomi ante dowa fiya vovolowela va sidadi ya Lebo-Hamate.

⁴ Atu anna kahanle ira Yehova awande alabana nnga yengo yoawombezana aIzarayeli ira aone akala kogokala atu oharihamo malamulo aye anno aawandenle liye ababiwa muwari mwa Mozeji.

⁵ Mwa enne Ana Izarayeli kakala vari va akuda Kana, aEti, aAmore, aFerizi, aEvi, aJebuzi.

⁶ Kohatukula anamwali a malogo anne, aliwa atela kala ahiyaniwa eto na aliwene kohatukula ahima ewa a ahiyana, aliwa ateliha na ahima a alombwana a malogo anne. Eto aliwa kohoroma ahara amilugu ewa.

⁷ Ana Izarayeli kohosakanya jabure vamentoni va Yehova eto kohomudiwala Yehova Mulugu wewa, aliwa roma hara vikwamutu josema ja aBaali na aAzera.

⁸ Mwa enne Yehova ohotakaleliwa na makalelo ohokala a masika zela aIzarayeli. Evale liye ohavaheda mmandani mwa mwene wa Mezopotamiya aitaniwa Kuza-Rizatayimi. Mwa enne Ana Izarayeli kohoroma mulaba mwene Kuza-Rizatayimi ule fiyeda yaka tanu na taru.

Yehova ohomuvenyiha musogolrelri Otoniyeli ira aavunele aIzarayeli

⁹ Noira eno, Ana Izarayeli koholobela wa Yehova monla. Evale Yehova ohonvenyiha namaavunela ira aavunele. Nzina naye ali Otoniyeli mwana Kenazi, Kalebi mbalaye wa ng'onong'onuwa.

¹⁰ Evale Munemba wa Yehova ohoza mwa liye, evale liye ohoroma asogolrelra aIzarayeli, liye roma dowaga kondoni. Mwa enne Yehova ohonvaheda mulombwana Kuza-Rizatayimi mwene wa Mezopotamiya mmandani mwaye. Evale Otoniyeli ohomugondjiha.

¹¹ Mwa enne ilambo yohokana murendele fiyeda yaka 40. Noira eno, Otoniyeli mwana Kenazi ule ohokwa.

AIzarayeli kohotongiwa na mwidani wewa mwene Egiloni

¹² Ana Izarayeli kohowelela sakanya jabure vamentoni va Yehova. Mwa enne Yehova ohonvaha kopolo mulombwana Egiloni mwene wa akuda Mowabe, liye za roma wana na aIzarayeli, tchoira aliwa kohosakanya jabure vamentoni va Yehova.

¹³ Liye ohagumaniha aAmoni na aAmaleki, aliwa gundeya dowa agondjiha aIzarayeli, aliwa itukula Jeriko, Sidadi ya Minazi.

¹⁴ Mwa enne Ana Izarayeli kohoroma mulaba Egiloni mwene wa akuda Mowabe fiyeda yaka 18.

Yehova ohomuvenyiha Ewudi ira aavunele aIzarayeli

¹⁵ Noira eno, Ana Izarayeli koholobelaga wa Yehova monla akoka. Evale Yehova ohavenyiheda namaavunela mmohi. Nzina naye ali Ewudi mwana Jera wa nlogo na Benjami. Liye ali mulombwana olabana muwono oromana. Ana Izarayeli kohomurumana mulombwana Ewudi ule misoko diwa ira adowena wa mulombwana Egiloni mwene wa akuda Mowabe.

¹⁶ Mwa enne Ewudi ohosakanyaga supada noirwa wu na wu, lapa uwa ali meyu meturu, liye soleda muwari mwa jowara jaye, pandi ya tambalani waye muwononi odjana.

¹⁷ Mwa enne ohomaruwaga, liye tukula misoko kamurumilena atu dile, dowagana wa Egiloni mwene wa akuda Mowabe. Fwanyeya ira mwene Egiloni ali mulombwana oruvetchetcha.

¹⁸ Evale Ewudi agamanle velela misoko darumiwena liye dile, ohagunya aliba tukula afwaye anno kazilena misoko dile, aliwa dowaga.

¹⁹ Noira enne Ewudi agamaruwile adowaga, agafiyile nimburo vafwanyeya jolandaniha ja amilugu jagali josemiwa, wandamelana Jiligali, ohowelelaga wa mwene, liye ira: <<So mwene, dihikana mazu nnafuna miyo uwandelani mokoyeya.>> Mwa enne mwene ule ohowongaga, liye ira: <<Urome miyala.>> Noira eno, ohavenyihagavo anamalabaye atene vamentoni vaye.

²⁰ Fwanyeya mwenole afwanyeya sala yodidilela pama ya muzulu mwemo mwagaratilege liye ekave. Agafiyile vakwikwi na mwene ule, Ewudi ohowongaga eraga: <<So mwene, dihikana mazu okumela wa Mulugu nnafuna miyo uwandelani!>> Mwa enne mwene ule ohovenyaga vampandoni vaye.

²¹ Evale mulombwana Ewudi ohotapulaga ndanda naye na muwononi oromana, liye pululana supada naye nne tambalani waye pandi ya muwononi odjana, liye muwambana mwene ule vambani fendo imohive,

²² fiyeda supada nne volowa natene na kwibi yenne eto makura kohomalaga vuhelela kwibi yatene yenne tchoira Ewudi kapulunlevo supada nne vambani va mwene vale. Eto supada nne nohokumelelaga unduli wa mwenole.

²³ Noira enne mulombwana Ewudi ohokumaga kwartuni ule, liye dowa vasala, liye funga misuwo da kwartu ya muzulu ile na xavi, liye dowaga.

²⁴ Mwa enne liye agadowile, funa anamalaba a mwenole za, kafwanyilege misuwo da sala ile dagali dofunga dene. Mwa enne aliwa kohowongaga, aliwa ira: <<Afwase mwene udowile aoze kwartu inafwanyeya muwari emu, mwemo munaozetcha liye.>>

²⁵ Mwa enne aliwa kohokalelagave dediha ira amala unohula milango dile. Mbwenye kohofiyeda waheya ing'anela ante aliwa fiyeda tukula xavi, aliwa hulana. Evale funa hula, kanfwannye mweniwa uli vati okwene!

²⁶ Eto mulombwana Ewudi tempu yenne yadibeliwa atu kadedihaga huliwa wa milango dile, liye ohowanda tawa. Tchoira liye avirile vari va jolandaniha ja amilugu jagali josemiwa, liye dowaga Seyira.

²⁷ Evale liye agafiyile, ohoimbaga palraza mmwangoni mwa Efarayimi ira Ana Izarayeli kadowe kondoni. Evale kohotitela mmwangoni mule, aliwa maruwa vamohi na Ewudi ule, liye kala musogolrelri wewa.

²⁸ Evale liye ohowongaga eraga: <<Kadiharegeni! Tchoira Yehova uhumala uvahedani mmandani mwenyu amwidaninyu akuda Mowabe.>> Evale aliwa kohomuharaga, aliwa dowa funga vevo akuda Mowabe valambuweletcha atu muhindje Jordawu. Mwa enne tchamuhiyile nne mutu mmohi ira avire.

²⁹ Tempu yenne kohapaga akuda Mowabe okwakwana wandamelana alombwana 10.000, atene kagali alombwana owanda wana eto a kopolo. Kalivo avuluwilege.

³⁰ Evale siku nenne akuda Mowabe kohogondjihiwa na aIzarayeli. Mwa enne ilambo yohokana murendele fiyeda yaka 80.

³¹ Ewudi agakwile, musogolrelri amuharele ali mulombwana Sangari mwana Anati. Liye ohapa aFilistewu 600 na imiri imohi yokumbuzana ng'ombe. Mwa eno, na liyene eto ohavunela aIzarayeli.