Anamasogolrelra 2 - Mazu Otchena a Mulungu

Yehova ohasumulula aIzarayeli

¹ Noira eno, Mungelro wa Yehova ohokumaga Jiligali dowa Bokimi, liye wonga na aIzarayeli eraga: <<Miyo duhukumihani ilambo ya Ijipitu, miyo uzanani ilambo yenno yalumbenle miyo na ababinyu ira: <Miyo kadiza ditwa yopangana yaga na nyo.

² Nyo mbwenye kamusakanye yopangana yowandana na atu anakala mwilamboni muno. Mofutukula mubwanyule vibuwa dewa da mukuto.> Nyo mbwenye kamufunne vwelela nizu naga. Kodi muirele nni jokala ha jejo?

³ Nona miyo peno nnouwandelani ira kannaatamangihavo akuda Kana vari venyu. Aliwa anokala nnga minga doulatani mbaru dinyu eto amilugu ewa anokala ratuwero unafuna umangani.>>

⁴ Mungelro wa Yehova ule agawongile mazu matene anne na aIzarayeli atene, aliwa kohotomola kuto, aliwa nlaga.

⁵ Na mwasa wenne, kohovaha nimburo nenne nzina na Bokimi [ku wonga nla] eto kohovelela mikuto da Yehova evale.

Jozuwe na andimuwa a aIzarayeli kagakwile, aIzarayeli kohomuhiya Mulugu

⁶ Fwanyeya wanle viwa vo, Jozuwe agamanle agawela aIzarayeli ilambwiwa, liye ohagunya, kada nlogo nohodowa ira natukule ilambo yagaweliwe atu.

⁷ AIzarayeli kohomuhara Yehova malambo matene aliwo mulombwana Jozuwe vamohi na malambo matene a andimuwa atene anno kaliwove Jozuwe agakwile, anno kaonne mabasa matene mandimuwa alabile Yehova muwari mwa aIzarayeli.

⁸ Evale mulombwana Jozuwe mwana Numi, namalaba wa Yehova, ohokwa aganna yaka 110.

⁹ Evale kohomukoya muwari mwa ilambo yagaweliwe liye sidadi ya Timinati-Hereji pandi ya mwango didjindji da Efarayimi, norti wa mwango Gaji.

¹⁰ Noira enne atu atene a tempu yenne kohomala kwa, aliwa dowa gumana na makolo ewa. Evale kahanlewo ali ahimiwene. Ahimiwa anno kazilewo makolo ewa kagakwile kali atu ohomuiziwa Yehova eto tchaiziwile jatene Yehova jaairele liye aIzarayeli.

¹¹ Mwa enne Ana Izarayeli kohosakanya jabure vamentoni va Yehova. Aliwa kohoroma atamalela amilugu kaitaniwa aBaali.

¹² Eto kohomuhiya Yehova Mulugu wa makolo ewa wenno aakumihile ilambo ya Ijipitu, aliwa dowa roma ahara amilugu amohiwa anno kaahara atu a vilambo dawandamannena atu. Evale kohoroma akokorela, aliwa tatamulaga uwali wa Yehova.

¹³ Tchoira aliwa komuhiya Yehova, aliwa roma aharaga amilugu kaitaniwa aBaali na aAxitaroti.

¹⁴ Na mwasa wenne, Yehova ohotakaleliwa na makalelo ohokala a masika zela aIzarayeli, evale ohavaheda mmandani mwa amadjuba, aliwa za roma abelaga jengo jiwa. Yehova eto ohavaheda mmandani mwa amwidaniwa kafwanyeya vilambo dowandamelana. Mwa enne aIzarayeli tchawanda wana na amwidaniwa.

¹⁵ Fendo datene aIzarayeli kadowa atu kondoni, Yehova ovenyiha ndanda naye na kopolo, liye roma aoniha ubure nnga mwemo mwawongele liye eto nnga mwemo Yehova mwalumbenle liye. Mwa enne kohokala mmakatamihoni mohokala mwa masika.

¹⁶ Noira eno, Yehova ohavenyiha anamasogolrelra, aliwa za avunela aIzarayeli mmandani mwa atu anne kaabela jengo jiwa.

¹⁷ Mbwenye aliwa tchafunne avwelela anamasogolrelra ale. Mofutukula kohoroma muhiya Yehova, aliwa aharaga amilugu amohiwa, aliwa roma akokorelaga. Agali ababiwa kali atu ovwelela malamulo a Yehova, aliwa mbwenye mohodibeliwa kohiya ndila yenno.

¹⁸ Eto fendo datene Yehova anvenyiha liye namasogolrelra, Yehova okala na namasogolrelra ule eto oavunela aIzarayeli muwari mwa amwidaniwa malambo matene akalawo namasogolrelra ule. Mwasiwa Yehova oawendela tangaranga na mwasa onla wewa zela atu anne kaazuzumiha kaaonihaga goyi.

¹⁹ So mbwenye namasogolrelra ule akwa, aliwa kowelela viringana akoka akwaranya ababiwa makalelo kaviringanile atu, aliwa roma aharaga amilugu amohiwa, kaalabaga eto kaakokorelaga aliwene. Aliwa tchawanda hiya mabasiwa matene nne ndila diwa da uvuruvuru dile.

²⁰ Na mwasa wenne, Yehova ohotakaleliwa na makalelo ohokala a masika zela aIzarayeli, liye wonga eraga: <<Atwala kohoviringaniha yopangana yaga yenno yaawandenle miyo ababiwa. Aliwa kifunile vwa nizu naga.

²¹ Nona miyo kadiza daatamangiha malogo anafwanyeya vari vewa, malogo anno Jozuwe aahiyile liye akwaga.

²² Nnafuna diirena eno ira daawombeze aIzarayeli ira dione akala aliwa anokala oharihamo ndila ya miyo Yehova na makalelo nnga kaharihamo ababiwa.>>

²³ Mwasiwa ali wenno Yehova ahiyaga malogo ale, ahabaranyedaga atamangihamo eto ahaavahedaga mmandani mwa Jozuwe ira aagondjihe.