Anamasogolrelra 19 - Mazu Otchena a Mulungu

Muselu wa muLevi mmohi na mwendaye

¹ Muwari mwa malambo anne, mwilamboni mwa Izarayeli kamwali mwene. Tempu yenno ohokalawo mulombwana mmohi wa nlogo na Levi adowile kala ilambo ya mmwangoni ya Efarayimi wewo wali mavande a vang'ono. Liye ohomusaka mwendaye wenno ali nnga muhiyanaye wang'ono. Muhiyanole waniwa ali Beleme, mwilamboni mwa Juda.

² Mbwenye tempu imohi mwendaye ule ohotakaleliwa na joira ja mamunayele, liye ndundumaza, dowa vande va babaye sidadi ya Beleme muwari mwa ilambo ya Juda, liye mala medi minnayi wewule.

³ Noira enne mamunayele ohovenyaga, liye muhara ira adowe ampepese, amuwelihede vande akoka. Adowaga wewule ohomutukulaga muzombwe mmohi ali namalabaye vamohi na aburu ambinli. Agafiyile wewule, muhiyanole ohomuwatchela, liye mudowana vande va babaye. Evale babaye agamuonne mulombwanole, ohomuwatchela mohagalala.

⁴ Noira enne moyaye ule, ohomuwongana ira arome kala evale. Mwa enne liye ohokala vande vale malambo mararu, aliwa djaga, ng'waga, gonaga evale.

⁵ Mbwenye siku nanennayi kohovenyaga na mabebehene, mulombwanole ohokozeyaga ira kadowege. Mwa enne muhiyanole babaye ohowongaga na nkamwenaye ule, liye ira: <<Dedihani mubabihe dja yengo ya vang'ono ira mukayena kopolo, amala eno muvenyihane, mudowege.>>

⁶ Evale nkamwene ule na moyaye ule kohogaratigi, aliwa dja vamohi eto kohong'waga vamohi. Noira eno, muhiyanole babaye ohowongaga na mulombwanole, liye ira: <<Pepani, nnauvepa ira uvireliwe mahiyu anna evano eto uhagalalihe murimawo.>>

⁷ Mbwenye mulombwanole ohovenyaga ira amaruwe. Evale moyaye ule ohomukanyihedagave ira ahadowe. Mwa enne liye ohogonaga siku nenne evale.

⁸ Noira enne siku nanetanu na mabebehene liye agavenyile ira amaruwe adowege, muhiyanole babaye ohowongaga eraga: <<Kadediha nibabihe dja! Udedihe ante ntana vano!>> Mwa enne liye ohogaratigi, siku nenne aliwa dja vamohi.

⁹ Noira eno, mulombwanole ohovenyihanaga ira amaruwe, liye vamohi na mwendaye ule vamohi na muzombwe amuzilena liye. Evale moyaye ule ohowongagave, liye ira: <<Kaing'ana nzuwa nihiroma senguma eni, eto tchineneva nzuwa nnoroma vira. Nnauvepa ira ugone mahiyu anna eto uhagalalihe murimawo. Metchelo na mabebehene munovenyihana ulrendo wenyu, mudowege vande venyu.>>

¹⁰ Mbwenye mulombwanole fendo yenne kafunne ira agone akoka evale. Mwa enne ohomaruwaga, liye dowaga ante liye fiya wandamelana sidadi ya Jebuzi, yenno inaitaniwa malambwala Jeruzalemu. Liye ohodowaga vamohi na mwendaye ule vamohi na aburu aye ambinli ale agamanle helavo jogaratela vazulu viwa.

¹¹ Tempu yafiyaga atu sidadi ya Jebuzi ule, ali nzuwa nifunaga vira. Mwa enne muzombwe ule ohomuwongana patarawaye ule, liye ira: <<Ndoweni nivolowe sidadi ya akuda Jebuzi ila, nagone mwemu.>>

¹² Mbwenye patarawaye ule ohomuwandelaga eraga: <<Hiyo kannadowa volowa sidadi ili yatene ya nlogo nimohi niwa nene ahali sidadi ya nlogo na Ana Izarayeli. So mbwenye inafwanela nidowegenive ante Jibeya.>>

¹³ Ohowongagave na muzombwe waye ule, liye ira: <<Kavilimbihede ante niwande dowa nagone Jibeya owu hehi sidadi ya Rama.>>

¹⁴ Evale kohowendagave, aliwa dowaga musogolrove. Mwa enne nzuwa nabidelragamo atu, aliwa kafwanyeya sidadi ya Jibeya yenno inafwanyeya yagali sidadi ya nlogo na Benjami.

¹⁵ Mwa enne kohoperuwaga Jibeya ira kavolowe kagone emule mahiyu anne. Mbwenye kagafiyile musidadi mule, kadowilege garati varampani va sidadile mwasiwa kalivo mutu aaitanenle vande vaye ira kadowe kahaye.

¹⁶ Fwanyeya ira mahiyu anne ohokala mundimuwa mmohi eni oulula akumaga mabasani waye minda. Mundimuwole ali wa ilambo ya mmwangoni ya Efarayimi, mbwenye akaletcha sidadi ya Jibeya. Mbwenye anamurala a sidadi ya Jibeya ile kali akuda Benjami.

¹⁷ Evale mundimuwole agavenyihile meso aye, ohaonaga alendo ale varampani va sidadile. Mwa enne ohafukaga liye ira: <<Kodi munakuma waani? Eto munaya uvi?>>

¹⁸ Evale mulombwanole ohowakulaga, liye ira: <<Nnakuma Beleme mwilamboni mwa Juda, nnadowa wanihu ilambo ya mmwangoni ya Efarayimi wewo uli mavande a vang'ono. Tchoira dadowile Beleme wa Juda, eni nnadowa Nyumba ya Yehova. Mbwenye uno kalivo mutu uniwatchenle ira niwande haya vande vaye.

¹⁹ Eto hiyo nagali anamalaba enyu nihimala kana jodja para aburu ehu ala eto nihikana pawu vamohi na vinyu para miyo vamohi na muhiyanagola na muzombwe unafwanyeyana hiyo. Kaninna yonihalela ili yatene.>>

²⁰ Mwa enne mundimuwole ohowongaga, liye ira: <<Murendele akale na weyo, mwasiwa jatene jinauhalele miyo nnouvaha. So mbwenye kavikale jowandeya ira ugone varampani va mahiyu vano.>>

²¹ Evale ohatukula alendwale, liye adowana vande vaye eto ohavaha jodja aburu ale. Eto aliwa kohovihuwa manyalo ewa, aliwa dja eto aliwa ng'wa vamohi.

²² Evale aliwa kahagalalaga, kohokalawo alombwana a sidadile kavenyilege, alombwana otakala mirima, aliwa za rindja nyumbele. Mwa enne kohoromaga gogoda musuwo kamukuwelaga mundimuwole mwinnya wa vande vale, keraga: <<Kamukumihede unde uno mulombwana uzile vande vawo vano ira hiyo nimugonena.>>

²³ Evale mundimuwole mwinnya wa vande vale ohokumaga, liye wonga na aliwa eraga: <<Nari abalaga! Kamuirena ubure okala nnga wenno! Voira mutula uhufiya vande vaga, kamuirena yotakaletchetcha nnga yenno!

²⁴ Muing'ane, miyo nnomukumiha mwanaga wa muhiyana uli ahanagone na mulombwana vamohi na mulombwanola mwendaye ula, duvahedeni aliwene ira mwaairena inafuna nyo. Mbwenye mulombwanola kammuirena yotakaletchetcha yokala nnga yenno.>>

²⁵ Mbwenye alombwanale tchafunne vwa. Evale liye ohomutukulaga mwendaye ule, liye avaheda alombwanale, aliwa roma mugoniha eto komuirelaga ja manyazo umahiyu watene wenne ante unde ufunaga tcha. Mwa enne unde ufunaga tcha, kohomuhiya.

²⁶ Evale unde utchaga muhiyanole ohoza gwela vamulangoni va mundimuwole vande vafwanyeya mamunaye vale, liye kala evale ante unde aliwa tcha.

²⁷ Mwa enne mamunaye ule agavenyile na mabebehi, agahunle misuwo da nyumbele, afunaga kumela unde ira agundeye ulrendo waye adowege, againg'anne unanfwanya mwendaye ule uli va mulango, manda aye kagali vati vasogolro va musuwo.

²⁸ Evale liye ohomuwongana mwendaye ule, liye ira: <<Kavenya nidowege.>> Mbwenye liye kawakunle mwasiwa ali okwene. Evale mulombwanole ohomugwagwanyihaga vaburuni vaye, liye maruwa, dowaga waniwa.

²⁹ Agafiyile vande vaye, ohotukulaga mbene, liye roma nvarula mwendaye ule yano yano fiyeda kana jano kumi na mbinli. Nomala eno ohorumihaga jano jile muwari mwa malogo kumi na menli a Izarayeli.

³⁰ Evale atu atene kaona jejile, kowonga keraga: <<Kajinababihege ireya jokala ha jeji nne kajinababihege oniwa jeji romela siku nikumile aIzarayeli ilambo ya Ijipitu fiyeda siku na peno. Inafwanela niumbuwele pama zela jeji, kodi nnafuna niireni avi?>>