Anamasogolrelra 16 - Mazu Otchena a Mulungu

Samisawu ohomuwandela Dalila wewo wakumela kopolo daye

¹ Noira eno, mulombwana Samisawu ohodowa Gaza. Agadowile wewule ohomuona muhiyana mmohi eni ali puta, evale ohomugonana.

² Mwa enne akuda Gaza kohowandeliwa ira: <<Samisawu uhuvolowa musidadi mu.>> Evale kohomurindjaga muwari mowerewera sidadile eto kohahela atu va mulango va sidadile. Mwa enne aliwa kohokalaga opwaseyene jiwa, aliwa umbuwelaga ira: <<Hiyo nneregeve muing'anela fiyeda metchelo, unde watchaga. Era eno nnompa.>>

³ Mbwenye Samisawu agonilege ante vari va mahiyu. Mwa enne vari va mahiyu ohovenyaga, liye dowa hideda musuwo wa sidadile vamohi na kaxilu dambinli dene wu na wu, vamohi na kunya dafungilena atu, liye tchikula jatene ejile, liye kapatcha. Evale ohogwelana nkuma ante liye dowa tatilela vazulu va mwango unafwanyeya sogolro wa Eboroni.

⁴ Jejile jagaireyile, Samisawu ohomuziveliwa muhiyana mmohi aitaniwa Dalila, wa ndabo na Soreki.

⁵ Noira enne amwene a aFilistewu kohomaruwaga, aliwa dowa nfwanya muhiyanole, muwandela keraga: <<Umusembeselre Samisawu ira auwandele unazela kopolo dilukulu dinna liye dile eto awonge kodi makalelo bavi anafuna hiyo mugondjiha ira nimmange, nimuonihe goyi. Wairana eno, muwari mwa hiyo, kada mutu unouvaha kobiri da parata 1.100.>>

⁶ Noira enne Dalila ohomuwongana Samisawu, liye ira: <<Pepani, nnauvepa ira udiwandele unazela kopolo dindimuwa dinna we eto yengo nni inawanda we mangiwana ira wahakayena kopolo para mutu uwanda.>>

⁷ Evale Samisawu ohomuwandelaga eraga: <<Mutu adimanga na mingohi mitanu na minli da nifumo dititi dene, miyo kopolo daga nnofoka difiyede kala nnga mutu uli watene.>>

⁸ Noira eno, amwene a aFilistewu ale kohozagana mingohi mitanu na minli da nifumo dititi dene, dedo dahaummile. Evale Dalila ohommangana Samisawu.

⁹ Tempu yenne Dalila ohakana alombwana kavitanle mmba mule kwartu imohiwa. Mwa enne liye ohokuwa eraga: <<Kaing'ana Samisawu, aFilistewu anauzela!>> Evale Samisawu ohopazaga mingohi dile kalaga nnga usalru apazeyaga na munlo. Mwa enne tchawandile iziwa wewo wazela kopolo daye.

¹⁰ Noira eno, Dalila ohowonga na Samisawu, liye ira: <<Kaing'ana, weyo uhufiyeda dipeta eni, we wongaga jonama. Pepani, nnavepa ira udiwandele, kodi yengo nni inawanda we mangiwana para wahakayena kopolo?>>

¹¹ Evale Samisawu ohowakulaga liye ira: <<Mutu adimanga mwa kopolo na mingohi dixa, dedo dili dahanalabiwena mabasa ali matene, era eno, miyo kopolo daga nnofoka difiyede kala nnga mutu uli watene.>>

¹² Mwa enne Dalila ohotukulaga mingohi dixa dali dahanababihe labiwana yengo ili yatene, liye mmangana. Noira eno, ohoira: <<Kaing'ana Samisawu, aFilistewu anauzela!>> Fwanyeya mwa tempu yenne kohokalawo kavitanle kwartu imohiwa. Evale mulombwana Samisawu ohopazaga mingohi dile mmiwononi mwaye kalaga nnga usalru.

¹³ Noira enne Dalila ohowongaga na Samisawu, liye ira: <<Ante peno eni unave dipeta, we wongagave jonama. Nnavepa ira udiwandele, kodi yengo nni inawanda we mangiwana para wahakayena kopolo?>> Evale liye ohowonga eraga: <<Wafunaga dimanga, utukule mataransa aga matanu na menli a nsisi naga, uluwe muwari mwa nguwo inafwanyeya muwari mwa makina osakanyana nguwo ayo. Wamala, ufunge makina na kunya. Waira eno miyo kopolo daga nnofoka difiyede kala nnga mutu uli watene.>>

¹⁴ Evale Samisawu agagonelevo, Dalila oholanda mataransa matanu na menli a nsisi naye, liye roma luwana muwari mwa nguwo yafwanyeya muwari mwa makina osakanyana nguwo. Agamanle luwamo nsisi nne, ohofunga makina na kunya ndiri. Noira eno, ohowongaga na Samisawu, liye ira: <<Kaing'ana Samisawu, aFilistewu anauzela!>> Evale Samisawu ohorurumuwaga, liye dula kunya ile, na kopolo daye liye kumihamo nsisi naye mwali atu muwari mwa nguwo eto muwari mwa makina.

¹⁵ Noira enne muhiyanole ohomuwongagana eraga: <<Nnga unawanda avi wonga na miyo ira: <Miyo nnouziveliwa!>, agali murimawo kali na miyo!? Eni fendo ila tchi fendo yaneraru udipetaga, wahafunaga diwandela ibaribari zela unakumela kopolo dohokala da masika unna we.>>

¹⁶ Mwa enne voira muhiyanole omusanyetchave na mazu awonga liye eto omukukumuletcha siku na siku, evale Samisawu ohowaheya, liye fiyeda gomihiwa.

¹⁷ Mwa enne ohomuwandela jokoyeya jatene ja mmirimani mwaye, liye ira: <<Miyo roma vibaliwe miyo ante peno nsisi naga kannababihe satiwa, tchoira dili muNazirewu oveleliwa wa Mulugu, romelave dagali mbani mwa mmaga. Mutu adisata nsisi naga, miyo kopolo daga nnofoka difiyede kala nnga mutu uli watene.>>

¹⁸ Mwa enne Dalila agaonne ira Samisawu ohomala muwandelamo jengo jokoyeya jatene ja mmirimani mwaye, ohaitaniha amwene a aFilistewu, liye awandela ira: <<Fendo ila mbwenye muze akoka, mwasiwa peno liye uhumala diwandela jokoyeya jatene ja mmirimani mwaye.>> Noira enne amwene a aFilistewu ale kohodowaga wa liye eto kada mwene ohozana kobiri yaye yaye ira kanvahe muhiyanole.

¹⁹ Mwa enne liye ohomugonihaga Samisawu vamendoni vaye, noira eno ohomuitanaga mulombwana mmohi, liye za mala musata mataransa matanu na menli kafwanyeya mmuruni mwaye. Evale Dalila ohoroma muzuzumiha, mbwenye kopolo daye dohokumamo.

²⁰ Liye ira: <<Kaing'ana Samisawu, aFilistewu anauzela!>> Mwa enne liye ohorurumuwaga, aumbuwelaga ira nnotawa nnga nnatawetcha miyo eto nnovuluwa. Mwasiwa tempu yenne liye kaiziwile ira Yehova ohomuhiya.

²¹ Evale aFilistewu kohomuhinda, aliwa mudula meso aye, aliwa mutukula, mudowana Gaza. Kagamudowilena wewule, kohommangaga na makurenti menli a mukuwa, aliwa mutatilela mukadeya ira atchilege vatchiloni.

²² Mbwenye agasatiwe vale, agali mukadeya emule, nsisi naye nohoroma ulukula akoka.

Kwa wa Samisawu

²³ Noira eno, amwene a aFilistewu ale kohogumanelaga ira kavelele mukuto mundimuwa wa mulugu wewa Dagomi eto ira kahagalale, aliwa roma wonga keraga: <<Dagomi mulugu wehu uhunivaheda mwidanihu Samisawu mmandani mwihu.>>

²⁴ Eto na atwene a wewule kagamuonne Samisawu, kohoroma mutamalela mulugu wewa, aliwa wongaga keraga: <<Dagomi mulugu wehu uhunivaheda mwidanihu mmandani mwihu, wenno agudjuletcha ilambo yehu eto aapetcha atwihu ohokala a masika.>>

²⁵ Mwa enne, mirima diwa dagali dohagalala dene na makalelo ohokala a masika, kohoiraga: <<Kaarumeni atu kamudowele Samisawu ira aze airegena joniteyiha vari vehu.>> Evale kohomudowelaga Samisawu mukadeya mwafwanyeya liye, aliwa muzana vari vewa, liye iragana joateyiha. Nomala eno kohodowaga muimeliha vari va mambozo menli a nyumbele.

²⁶ Evale Samisawu ohomuwongagana muzombwe wenno amuhideda ndanda, liye ira: <<Kadimeze, udidowena ira dawambaselre mambozo analimbiha nyumbela ira didowe daasamele.>>

²⁷ Fwanyeya ira mwa tempu yenne nyumbele yofwanyeyagana atu ohokala a masika, alombwana vamohi na ahiyana. Eto amwene atene a aFilistewu kafwanyeya emule eto vazulu va nyumba ile vohokala atu adjindji ohokala a masika okwakwana 3.000 alombwana vamohi na ahiyana kamuing'anaga Samisawu airagana joateyiha.

²⁸ Mwa enne Samisawu oholobelaga wa Yehova monla, liye ira: <<Nabwiya Yehova, nnouvepani ira mudiumbuwele miyo vano eto Mulugu mudivahe kopolo akoka fendo yenna bahi ira diwande aweliheda kunyakunya aFilistewu ala zela meswaga menli kaadunle atu.>>

²⁹ Mwa enne mulombwana Samisawu ohidedaga mambozo menli a vari, anno kahideda nyumbele, liye gogomeza mambozo ale na manda aye, nimbozo nimohi gogomeza na muwono odjana, nimbozo nimohi niwa liye gogomeza na muwono oromana.

³⁰ Evale Samisawu ohowongaga eraga: <<Dikwe vamohi na aFilistewu!>> Noira eno, ohondunyaga mambozo ale na kopolo daye datene, evale nyumbele yohobwanyuwaga za amorela amwene ale, vamohi na atu atene kafwanyeyaga emule. Fwanyeya ira atu aapile liye siku nakwaga liye, kali atu adjindji kwaranya atu atene aapile liye kalawo waye watene.

³¹ Mwa enne abalaye vamohi na atu atene a vande va babaye kohomaruwaga, aliwa dowa tukula maningo aye, mudowagana. Evale kohomukoya vari va Zora na Estayoli masiyeni wa babaye wenno aitaniwa Manowa. Samisawu aasogolrenlre aIzarayeli yaka makumenli.