Anamasogolrelra 14 - Mazu Otchena a Mulungu

Tela wa Samisawu

¹ Siku nimohi Samisawu ohodowaga sidadi ya Timina. Agadowile wewule, ohomuona muhiyana mmohi mwana wa aFilistewu.

² Agamuonne muhiyanole, liye dowa muwandela babaye na mmaye, kwi: <<Dihimuona muhiyana mmohi muwari mwa aFilistewu, sidadi ya Timina. Nnafuna mudowe mwanitelihe, akale muhiyanaga.>>

³ Mbwenye babaye vamohi na mmaye kohonfuka, aliwa ira: <<Mwasiwa gwa nni we funaga dowa mutela muhiyana muwari mwa aFilistewu, atu ohoineliwa nnga anne? Kodi muwari mwa nlogo nehu owu hehi muwari mwa aIzarayeli atene kalimo muhiyana ofwanela ira umutele?>> Evale Samisawu ohomuwandelaga babaye eraga: <<Miyo difunne mwaditelihe na liyene, mwasiwa liye uhudiriyela.>>

⁴ Mbwenye jaireya atu enne, babaye vamohi na mmaye tchaiziwile ira jejile jazela wa Yehova. Tchoira Yehova gwairihile ira awande airela ubure aFilistewu, mwasiwa tempu yenne aFilistewu baatonga aIzarayeli.

⁵ Noira enne Samisawu ohomaruwaga na babaye vamohi na mmaye, aliwa dowa sidadi ya Timina. Evale kagafiyile minda da uva da Timina ule, ohokalawo mwana podogoma mmohi amukumelenle Samisawu, roma muombelaga turumba.

⁶ Mwa enne Munemba wa Yehova ohomuzela mulombwana Samisawu. Masiki ahannave yengo mmandani mwaye, ohomuhinda mwana podogoma ule na manda, liye nvarula, kalaga nnga mutu avarulaga mwana mbuzi. Mbwenye liye kamuwandenle babaye nne mmaye zela jejo jairile liye.

⁷ Noira eno, Samisawu ohodowaga tapanya na muhiyanole eto muhiyanole ohomuriyela.

⁸ Noira eno, vagamanle malambo, ohowelaga, liye dowa ira amutele. Adowaga mundila, agaperuwile ira adowe amuone podogoma ampilege liye ule, afwanyilege mirimani wa podogoma ule wagali nuwi dohokala da masika vamohi na mahindjiwene.

⁹ Evale liye ohokumihamo makanda a nuwi na mandaye, liye djaga na ndila adowaga. Eto agaafwanyile babaye na mmaye, ohoavahagamo, na aliwene aliwa dja. Mbwenye kaawandenlege ira nuwi dile akumihilege mirimani wa podogoma.

¹⁰ Noira eno, babaye agamaruwile, agadowile wa muhiyanole waniwa, Samisawu ohosakanyaga pwando wewule nnga jairetcha azombwe tempu yenno.

¹¹ Mwa enne aFilistewu vamuonne atu Samisawu ule, kohaitana azombwe 30 ira kaze vapwandoni vale, kamukalihevo.

Tchilrape wa Samisawu

¹² Evale aliwa kagali muwari mwa pwando, Samisawu ohowongaga na azombwe ale liye ira: <<Miyo nnafuna diwonge tchilrape eni ira mupele. Eto mwawanda pela muwari mwa malambo matanu na menli a pwando ila, miyo nnouvahani kamiza 30 vamohi na jowara jotchindja fendo 30.

¹³ Eto nyo mwahawande pela, nyo gunafuna divaha miyo kamiza 30 vamohi na jowara jotchindja fendo 30.>> Evale aliwa kohomuwakula, aliwa ira: <<Kawonga tchilrape wawo, hiyo nnafuna nivwe.>>

¹⁴ Evale liye ohawandela, liye ira: <<Muwari mwa namadja afwaye, muhukuma yengo yodja eto muwari mwa yengo ya kopolo, muhukuma yengo yotapilra.>> Evale liye agawongile, aliwa kohomala malambo mararu kahawandaga pela tchilrape ule.

¹⁵ Noira eno, nagafiyile siku nanennayi, kohomuwongana mwadi Samisawu, aliwa ira: <<Umusembeselre mamunawo ira auwandele yotapulela ya tchilrape awongile liye, amala uniwandele. Mbwenye wahairena, hiyo nnoutumeya na munlo weyo vamohi na abali atene a vande va babawo. Kodi muniitanele vano ira munibele?>>

¹⁶ Evale mwadi Samisawu ohodowaga nla vamentoni va mamunaye, liye ira: <<Weyo eni unadiida. Kunadiziveliwa. Tchoira uhuwonga tchilrape na atu a nlogo naga ira aliwa kawande pela eto nne na miyene da muhiyanawo kufunne diwandela yopeliwa.>> Evale Samisawu ohomuwakulaga, liye ira: <<Uing'ane, miyo nne babaga nne mmanga kadimuwandenle yopeliwa, kodi vogokala jowandeya ira duwandele weyo?>>

¹⁷ Evale muhiyanole ohonla vamentoni va Samisawu fiyeda mala wa pwando ile. Mbwenye nagafiyile siku nanetanu na mbinli, Samisawu ohomuwandelaga muhiyanaye ule, na mwasa oira osimbwa musanya. Mwa enne muhiyanole ohodowaga awandela atu a nlogo naye ale yopela ya tchilrape awongile Samisawu.

¹⁸ Mwa enne siku nanetanu na mbinli, tempu ya tchiguwoni nzuwa nahanavire, alombwana a sidadile kohomuwandelaga mulombwana Samisawu aliwa ira: <<Kodi ihikalawo yengo yotapilretchetcha kwaranya mahindje a nuwi? Eto kodi ihikalawo yengo ya kopolo kwaranya podogoma?>> Evale mulombwana Samisawu ohowongaga liye ira: <<Ahakala mulimiha mwana ng'ombe yaga, kamwawanda pela tchilrape dawongile miyo.>>

¹⁹ Noira enne Munemba wa Yehova ohomuzelaga, liye venyihana mobaranya, dowa sidadi ya Ajikelomi, liye apa alombwana 30, liye aungula jowara jiwa, dowa avaha alombwana anno kapenle tchilrape awongile liye ule. Agairilena enne, liye venyihana, dowaga vande va babaye agalive otakaleliwene na makalelo ohokala a masika.

²⁰ Eto mwada Samisawu vahanle liye, kohonvahaga nfwaye wenno ali mboziye tempu ya matelo, liye kala muhiyanaye.