Anamasogolrelra 13 - Mazu Otchena a Mulungu

Baliwa wa Samisawu

¹ Ana Izarayeli kohowelela sakanya jabure vamentoni va Yehova. Mwa enne Yehova ohavaheda mmandani mwa aFilistewu yaka 40.

² Mwa tempu yenno ohokalawo mulombwana mmohi eni wa nlogo na Dani, aitaniwa Manowa, wa sidadi ya Zora. Mulombwanole muhiyanaye kaanna ahima, mwasiwa ali ngomwa.

³ Evale Mungelro wa Yehova ohomutwanyuwela muhiyanole, liye muwandela eraga: <<Kaing'ana, weyo eni uli ngomwa, kunababihege kana vambani. Mbwenye miyo peno nnouwandela ira weyo unokana vambani, umbale mwanapongwe.

⁴ So mbwenye inafwanela wahang'we vinyu nari yong'wa ili yatene yolrezelriha, nne kudje yengo ili yatene yotakala.

⁵ Mwasiwa weyo eni unokana vambani, umbale mwana wa mwanapongwe. Mwanole abaliwa, kaza asata nsisi naye. Tchoira mwanole unafuna akale muNazirewu oveleliwa wa Mulugu, romela agalive mbani mwa mmaye eto liyene gunafuna roma avunela aIzarayeli mmandani mwa aFilistewu.>>

⁶ Evale muhiyanole ohodowaga muwandela mamunaye eraga: <<Ukala mutu wa Mulugu uzile wa miyo. Mutule aoneya nnga mungelro mmohi wa Mulugu, okana makalelo owopiha. Miyo eto kadinfukile ira: <Kodi nyo muli wa uvi?> eto nne liye kadiwandenle nzina naye.

⁷ So mbwenye udiwandenle kwi: <Kaing'ana, eni weyo unokana vambani eto unombala mwana wa mwanapongwe. Nona kung'we vinyu nne yong'wa imohiwa yolrezelriha eto nne kudje yengo yotakala. Tchoira mwana unafuna we mbala unafuna akale muNazirewu oveleliwa wa Mulugu romela agali mbani mwene fiyeda siku nnakwa liye.> >>

⁸ Noira enne mulombwana Manowa oholobelaga wa Yehova eraga: <<So Nabwiya waga, nnouvepani ira mutu wa Mulugu wenno mmurumile nyo, awele akoka, aze anifundjihe zela jejo jinafunege hiyo muirela mwana wenno unafuna baliwa.>>

⁹ Evale Mulugu ohovwa yovepa ya Manowa. Noira enne Mungelro wa Mulugu ohomutwanyuwelaga muhiyanole akoka agali minda, agagaratile. Mbwenye ora yenno mamunaye Manowa kafwanyeya vamohi na liye.

¹⁰ Noira eno, muhiyanole ohotamangaga mobaranya, liye dowa muwandela mamunaye eraga: <<Mulombwana aditwanyuwelege siku nne, peno uhuza akoka.>>

¹¹ Evale Manowa ohovenyaga, liye muhara muhiyanaye ule, liye dowa nfwanya mulombwanole, liye ira: <<Pepani, kodi nyo muli mulombwana wenno azile awonga na muhiyanola?>> Evale liye ohowakula kwi: <<He, gu miyene.>>

¹² Mwa enne Manowa ohowongaga eraga: <<So dera difuke. Kodi mazu muwongile nyo kaza kakwakwanela, nnga mwanoyo makalelo aye okalawo vamohi na mabasa unafunege liye laba, anakala a makalelo bavi?>>

¹³ Evale Mungelro wa Yehova ule ohomuwandelaga mulombwana Manowa, liye ira: <<Muhiyanawo inafwanela aharihe jatene nnga mwemo mumuwandenle miyo.

¹⁴ Liye kadje yengo ili yatene inakumela muratchini wa uva, nne kang'we vinyu, nne yong'wa ili yatene yolrezelriha, nne kadje yengo ili yatene yotakala. Inafwanela aharihemo jatene jimuwandenle miyo.>>

¹⁵ Evale mulombwana Manowa ohomuwandelaga Mungelro wa Yehova ule, liye ira: <<Pepani, nnauvepani ira munidedihe vang'ono ira nidowe naupeleni mwana mbuzi.>>

¹⁶ Mbwenye Mungelro wa Yehova ule ohomuwandelaga Manowa, liye ira: <<Masiki dudedihe, kannarumela dja jodja jawo. Mbwenye wafuna sakanya mukuto otumeya, uvelele wa Yehova.>> Tempu yaira atu eno, Manowa kaiziwile ira ali Mungelro wa Yehova.

¹⁷ Evale Manowa ohomuwongana Mungelro wa Yehova ule, kwi: <<Kodi nzina ninyu muli ani? Nnerela ira jatene jiwongile nyo jakwakwanela, niwande urihedani.>>

¹⁸ Evale Mungelro wa Yehova ule ohomuwakulaga, liye ira: <<Mwasiwa gwa nni we difukaga nzina naga? Nzina naga ti nzina notikiniha, nohowanda we onelramo.>>

¹⁹ Mwa enne Manowa ohotukulaga mwana mbuzi imohi vamohi na yovelela ya jodja, liye dowa musakanyela Yehova mukuto vazulu va nibwe. Noira enne Mungelro wa Yehova ule ohoiragana yengo yotikiniha Manowa na muhiyanaye kaing'anaga.

²⁰ Fwanyeya ira munlo aromaga hinda lave lave lave vaibuwani vale, Mungelro wa Yehova ule ohovolowa muwari mwa munlo wenno, liye dowaga zulu. Evale mulombwana Manowa vamohi na muhiyanaye kagaonne enne, kohokokoraga, kaoramihaga miru diwa ante fiyiha vati.

²¹ Noira eno, Mungelro wa Yehova ule kawelenle akoka za mutwanyuwela Manowa nne muhiyanaye. Mwa enne mulombwana Manowa ohowanda iziwa ira mulombwanole ali Mungelro wa Yehova.

²² Noira enne mulombwana Manowa ohowonga na muhiyanaye, liye ira: <<Na ibaribari nnagomela kwa, mwasiwa nihimuona Mulugu.>>

²³ Mbwenye muhiyanaye ohomuwandelaga eraga: <<Ahakanlege Yehova afuna jonipa, karumela mukuto otumeya vamohi na yovelela ya jodja jejo ninvahile hiyo eto nne kanioniha jatene jionile hiyo ji, nne kaniiziwiha jatene jiniiziwihile liye ji.>>

²⁴ Vagavirile tempu, muhiyanole ohombala mwanapongwe, liye nvaha nzina na Samisawu. Evale mwanole ohoulukula eto Yehova ohomureliha.

²⁵ Eto Munemba wa Yehova ohoroma musogolrelra vakala liye muwari mwa ilambo ya Mahane-Dani, vari va Zora na Estayoli.