Anamasogolrelra 10 - Mazu Otchena a Mulungu

Anamasogolrelra amohiwa a aIzarayeli

¹ Abimeleki agakwile, azile ira aavunele aIzarayeli ali mulombwana mmohi aitaniwa Tola mwana Puwa, muzula wa Dodo, wa nlogo na Isakari. Liye akaletcha sidadi ya Samiri, ilambo ya mmwangoni ya Efarayimi.

² Liye aasogolrenlre aIzarayeli yaka 23, noira eno ohokwa, liye koyiwa sidadi ya Samiri.

³ Liye agakwile, aromile sogolrelra ali mulombwana mmohiwa aitaniwa Jayire, nkuda Jileyadi. Evale liye ohasogolrelra aIzarayeli yaka 22.

⁴ Mulombwana Jayire anna ahima a anapongwe 30 eto kada mwana ohokana buru waye agwela liye. Eto aliwa kohokana sidadi 30, dedo daitaniwa na nzina na Sidadi da Jaire fiyeda siku na peno. Sidadi dile nnafwanyeya mwilamboni mwa Jileyadi.

⁵ Noira eno, Jayire ohokwa, liye koyiwa sidadi ya Kamoni.

AFilistewu vamohi na akuda Amoni kohagondjiha aIzarayeli na mwasa omutegela Mulugu.

⁶ Noira eno, Ana Izarayeli kohowelela akoka sakanya jabure vamentoni va Yehova, aliwa roma atamalelaga amilugu a Baali na aAxitaroti vamohi na amilugu a Siriya, na amilugu a Sidoni, na amilugu a akuda Mowabe, na amilugu a akuda Amoni vamohi na amilugu a aFilistewu. Evale kohomuhiya Yehova, nne tchafunne mulaba.

⁷ Evale Yehova ohotakaleliwa na makalelo ohokala a masika zela aIzarayeli. Mwa enne ohavaheda mmandani mwa aFilistewu vamohi na mmandani mwa akuda Amoni.

⁸ Yaka imohive yenne, aliwa kohoroma agondjiha Ana Izarayeli vamohi no azuzumiha na makalelo ohokala a masika. Kohomala yaka 18 kaazuzumihaga Ana Izarayeli atene kafwanyeya kombela ya muhindje Jordawu, mwilamboni mwa aAmore, inafwanyeya Jileyadi.

⁹ Eto akuda Amoni koholambuwa muhindje Jordawu ira kadowe kawane na akuda Juda vamohi na akuda Benjami vamohi na atu a nlogo na Efarayimi. Mwa enne aIzarayeli kohokala muwari mwa makatamiho ohokala a masika.

¹⁰ Mwa enne Ana Izarayeli koholobela wa Yehova monla, keraga: <<Hiyo nuhutegelani, mwasiwa nuhuhiyani nyo Mulugu wehu, hiyo atamalelaga aBaali.>>

¹¹ Mbwenye Yehova ohawandelaga Ana Izarayeli eraga: <<Kodi tempu yauzuzumihetchani akuda Ijipitu, na aAmore, na akuda Amoni, na aFilistewu,

¹² na akuda Sidoni, na akuda Amaleki, na akuda Mayoni, tempu yenno nyo mwagadivepile, kadauvunenleni mmandani mwewa?

¹³ Mbwenye mwa jatene ejo nyo mohodihiya, nyo dowa atamalelaga amilugu amohiwene. Nona miyo kannawelela uvunelani akoka.

¹⁴ Mudowe mwalobele monla wa amilugu anno mwaasakunlre nyo. Aliwene kakale anafuna uvunelagani makatamiho enyu.>>

¹⁵ Mbwenye Ana Izarayeli kohomuwakulaga Yehova keraga: <<Yehova hiyo nihitega. Nyo podi niirana yengo ili yatene inaone nyo kala yofwanelela niirela. So mbwenye nnauvepani ira munivunele siku na peno ni.>>

¹⁶ Eto kohakumihagavo amilugu kaahara atu kagali anno kahariwa na atu a unde, aliwa roma mulabaga Yehova. Mwa enne Yehova ohakumbanya aIzarayeli na mmirimani mwaye mwatene na mwasa ozuzuma wanna atu.

¹⁷ Noira enne akuda Amoni kohoitanana ira kawane, aliwa dowa kunga misasa diwa Jileyadi muwari mwa ilambo ya aIzarayeli. Eto aIzarayeli na aliwene kohogumanaga, aliwa dowa kunga misasa diwa Mizipa.

¹⁸ Evale akuda Jileyadi vamohi na asogolrelri ewa atene kohowongaga kada mutu na nfwaye keraga: <<Kodi muwari mwa hiyo, mutu guvi unafuna nisogolrelra ira nidowe nawane na akuda Amoni? Mutu wenno unanisogolrelre, unokala mundimuwa wa akuda Jileyadi atene.>>