Anamasogolrelra 1 - Mazu Otchena a Mulungu

Akuda Juda kohagondjiha akuda Kana amohiwa ohala

¹ Mulombwana Jozuwe agakwile, Ana Izarayeli kohonfuka Yehova aliwa ira: <<Kodi muwari mwa hiyo, nlogo tivi nnafuna kala noroma ira nidowe nawane na akuda Kana?>>

² Evale Yehova ohowakula liye ira: <<Nnafuna dowa ti nlogo na Juda. Muing'ane, miyo dihimala avaheda ilambo yatene yenna mmandani mwewa.>>

³ Mwa enne atu a nlogo na Juda kohovenyaga, dowa wonga na abaliwa a nlogo na Simeyawu, aliwa ira: <<Ndoweni vamohi ilambo ivahiwe hiyo muwari mwa ngari, mwanikamihede wana na akuda Kana, era eno, na hiyene nnodowa naukamihedeni nyo ira nawane na atu a ilambo yenno ivahiwe nyo mwa ngari.>> Mwa enne atu a nlogo na Simeyawu kohodowaga vamohi na abaliwa ale.

⁴ Evale atu a nlogo na Juda kohodowaga wana eto Yehova ohavaheda akuda Kana vamohi na aFerizi mmandani mwewa. Mwa enne aliwa kohapaga amwidani okwakwana 10.000 ilambo ya Bezeki.

⁵ Eto kagali Bezeki, kohonfwanya mulombwana Adoni-Bezeki mwene wa sidadi yenne, aliwa roma wana na liye eto kohagondjiha akuda Kana vamohi na aFerizi.

⁶ Mbwenye Adoni-Bezeki ohoromaga tawa. Evale kohomutamangihaga, aliwa muhinda eto kohomugwadaga vigonondo dambinli dene da manda vamohi na da manyalo.

⁷ Noira enne Adoni-Bezeki ohowongaga eraga: <<Kohokalawo amwene 70 anno kagwadiwile vigonondo diwa da manda vamohi na da manyalo kakaletcha vande vaga kadodelaga jinyenyeri jamorela vati va meza yaga. Peno Mulugu unaditambilriha zela jejo jaairele miyo.>> Noira enne kohomutukula mulombwana Adoni-Bezeki, aliwa mudowana Jeruzalemu. Evale ohokwa wewule.

⁸ Akuda Juda kohowana na akuda Jeruzalemu, aliwa fiyeda agondjiha, aliwa mala atolotcha na masupadiwa atu kafwanyeya musidadi mule eto sidadile kohoitumeya na munlo.

⁹ Noira eno, aJuda ale kohodowaga wana na akuda Kana anno kakala mmwangoni, na Negebi vamohi na atu kakala ilambo ya mikuma ding'onong'ono.

¹⁰ Eto kohodowaga wana na akuda Kana amohiwa kakala Eboroni. Fwanyeya sidadi ya Eboroni wanle yaitaniwetcha na nzina na Kiriyati-Araba. Kagadowile wana Eboroni, kohompa mulombwana Sezayi na mulombwana Hayimani na mulombwana Talimayi.

¹¹ Nokuma evale, kohodowaga wana na atu kakala Debiri. Fwanyeya sidadi ya Debiri wanle yaitaniwetcha na nzina na Kiriyati-Seferi.

¹² Evale mulombwana Kalebi ohowongaga, liye ira: <<Mutu wenne unadowe awana na sidadi ya Kiriyati-Seferi afiyeda igondjiha, miyo nnonvaha mwanaga Akisa ira akale muhiyanaye.>>

¹³ Kalebi mbalaye wa ng'onong'ono aitaniwa Kenazi ohokana mwanaye aitaniwa Otoniyeli. Otoniyeli ule ohodowa gondjiha sidadile. Mwa enne Kalebi ohonvaha mwanaye Akisa, kala muhiyanaye.

¹⁴ Evale Akisa agadowile wa mamunaye Otoniyeli, ohomukanyiheda mamunaye ule ira adowe wa moyaye, anvepe munda. Eto agomenle wonga na Kalebi ali mwanaye Akisa ule. Akisa atitaga vaburuni vaye, Kalebi ohonfuka ira: <<Katchiye! Kodi unafuna nni?>>

¹⁵ Evale liye ohowakula, liye ira: <<Miyo nnavepa ira mudivahe mareliho, tchoira ilambo ya Negebi mudivahile nyo teyiwa inafwanyeya yagali youmma. Nnafuna ira mudivahe eto mamburo okuma mahindje okave.>> Mwa eno, Kalebi ohonvaha mamburo okuma mahindje okave a nkumani vamohi na mamburo okuma mahindje okave a pedi.

¹⁶ Eto akuda Keni anno kali atu a nlogo na Mozeji moyaye, kohokumaga Jeriko, Sidadi ya Minazi vamohi na atu a nlogo na Juda, aliwa dowa isalesale ya Juda yenno inafwanyeya pandi ya suli wa Aradi, aliwa dowa kalaga wewule vamohi na aJuda kafwanyeya wewule.

¹⁷ Noira eno, atu a nlogo na Juda kohomaruwaga vamohi na abaliwa a nlogo na Simeyawu, aliwa dowa agondjiha akuda Kana kakaletcha sidadi ya Zefati eto kohatolotchaga atene, nne tchahiyile yengo. Mwa enne kohovaha sidadile nzina na Horima.

¹⁸ Noira eno, atu a nlogo na Juda kohodowaga aliwa gondjiha sidadi ya Gaza vamohi na tatamo dowandamelana, aliwa gondjiha eto sidadi ya Ajikelomi vamohi na tatamo dowandamelana eto kohogondjiha sidadi ya Ekoromi vamohi na tatamo dowandamelana.

¹⁹ Mwa enne Yehova ohokala na nlogo na Juda aakamihedaga. Evale aliwa kohowanda gondjiha ilambo ya mmwangoni. Mbwenye zela atu kakaletcha ilambo yotandeleya, aliwa tchaatamangihilemo mwasiwa aliwa kohokana aaterelado a kondoni a momba.

²⁰ Evale aJuda kohonvaha Kalebi sidadi ya Eboroni, nnga mwemo mwawongele Mozeji. Evale Kalebi ohatamangihamo atu a muibalini mwa ahima araru a Anaki.

Malogo madjindji a aIzarayeli tchaatamangihile anamurala a Kana

²¹ Mbwenye atu a nlogo na Benjami aliwa tchaatamangihile aJebuzi anno kakala Jeruzalemu. AJebuzi ale anakalave vamohi na atu a nlogo na Benjami muJeruzalemu emule fiyeda siku na peno.

²² Eto atu a muibalini mwa Joze kohodowa wana na sidadi ya Beteli eto Yehova ohakamiheda.

²³ Tchoira atu a muibalini mwa Joze koharuma alombwana angasi angasi ira kadowe kawendelele sidadi ya Beteli. Sidadi ya Beteli wanle yaitaniwetcha na nzina na Luji.

²⁴ Evale anamawendelela ale kohomuonaga mulombwana mmohi eni akumaga musidadi mule, evale kohomuwongana ira: <<Nnavepa ira unitonyihede makalelo ovolowela sidadila mozemba, era eno, hiyo nnouwendela upama.>>

²⁵ Evale agaatonyihedile makalelo ovolowela sidadile mozemba, aliwa kohovolowaga, aliwa mala apa atu atene a mwemule na masupadiwa. Mbwenye mulombwanole vamohi na abalaye atene kohahiya, tchaapile.

²⁶ Evale mulombwanole ohodowa ilambo ya akuda Eti, liye manga sidadi wewule, liye vaha sidadile nzina na Luji. Sidadile inaitaniwa na nzina neno fiyeda siku na peno.

²⁷ Mbwenye atu a nlogo na Manasesi tchaatamangihile atu kakala Bete-Seya na tatamo dowandamelana, nne sidadi ya Tanaki na tatamo dowandamelana, nne sidadi ya Dori na tatamo dowandamelana, nne sidadi ya Ibeleyawu na tatamo dowandamelana, nne Mejido na tatamo dowandamelana. Tchoira akuda Kana kohokalela ntindi garati vamohi na aliwa mwilamboni mwemule.

²⁸ Mbwenye aIzarayeli kagaromile kala a kopolo, kohatonga akuda Kana ale ira kaalabelege mabasa okanyihediwa. Mbwenye tchaatamangihilemo atene.

²⁹ Atu a nlogo na Efarayimi na aliwene tchaatamangihile akuda Kana amohiwa kakaletcha Jezeri. Akuda Kana ale kakalave vamohi na aliwa vari vewa sidadi ya Jezeri ile.

³⁰ Eto atu a nlogo na Zebuloni na aliwene tchaatamangihile akuda Kana kakala sidadi ya Kitoromi nne atu kakala sidadi ya Nahaloli. Akuda Kana kafwanyeya wewule kakalave vamohi vari vewa, mbwenye aZebuloni kaalabiha mabasa okanyihediwa.

³¹ Eto atu a nlogo na Azeri na aliwene tchaatamangihile atu kakaletcha Ako, nne atu kakala sidadi da Sidoni, Alabe, Akizibe, Heliba, Afeki, nne Reyobi.

³² Mbwenye akuda Azeri ale kakala vamohi na akuda Kana ale. Tchoira aliwa tchaatamangihile.

³³ Eto atu a nlogo na Nafitali na aliwene tchaatamangihile atu kakala sidadi ya Bete-Semeji, nne atu kakala sidadi ya Bete-Anati. Mbwenye akuda Nafitali ale kakala vamohi na akuda Kana kafwanyeya sidadi dedile. So mbwenye aNafitali kaalabiha atu a Bete-Semeji vamohi na atu a Bete-Anati ale mabasa okanyihediwa.

³⁴ Mbwenye atu a nlogo na Dani kohotamangihiwa na aAmore, aliwa kuma ilambo yakaletcha atu, aliwa dowa mmwangoni. Eto aAmore ale tchaarumeliha atu a nlogo na Dani ira kadowege pandi yafwanyeyana ilambo yotandeleya.

³⁵ Eto aAmore aliwa kohokalela ntindi garati mmwangoni mwa Here, sidadi ya Ayijaloni vamohi na sidadi ya Salabimi. Mbwenye atu a muibalini mwa Joze kagali a kopolo, kohoroma alabihaga aAmore mabasa okanyihediwa.

³⁶ Madilre a aAmore karomile nkuma wa Akarabimi dowaga Sela ante dowagave nkumani.