2 Timoteyo 4 - Mazu Otchena a Mulungu

Yokokomeza ira Timoteyo alaleye

^1-2 Miyo nnouruma ira ulaleye mazu. Uruma uwa, nnouruma vamentoni va Mulugu eto vamentoni va Yesu Kiristu wenno unafuna atonga atu okalawo nari ale kakwile. Eto nnouruma ira waumbuwela za wa Yesu Kiristu na umwene waye unafuna za, inafwanela ukalele laleya mazu. Laleya wawo ukale ora datene, muwari mokozeyela eto ahali muwari mokozeyela. Muwari molaleya mule, inafwanela uwandege asumulula atu, uwandege ahiyiha jabure, uwandege alimbiha. Mbwenye jatene ejo uiregena muwari mopwaseya eto muwari mofundjiha na makalelo okwakwanela.

³ Tchoira ikala tempu inafuna za ira atu kahabalrege mafundjihelo a ibaribari. So aliwa anakayegena mabaru oavuruwanana anamafundjiha atene anno anarumeliha jofuna jiwa, aliwa atamangelaga anno.

⁴ Muwari moira eno, atu anno anohiya wene vuruwana ja ibaribari, aliwa pupuruwaga ira kaharege anatchitwa ohokana mabasa.

⁵ Weyo mbwenye kukale nnga aliwa. Inafwanela ora ili yatene weyo ukale mutu okana muru wapama, uwande vilela muwari mwa goyi, ulabege mabasa a namalaleya, ukwakwanelihede mabasa a Mulugu anno uvahiwe we.

⁶ Ira diwonge eno, miyo dihiiziwa ira ingumi yaga inafuna imale, inafuna ikutuliwe nnga yovelela ya jong'wa. Ora yaga inafuna miyo venyavo ihimala fiya.

⁷ Wana wapama, dihimala wana. Korida yaga, dihimala tamanga. Ibaribari inahara hiyo, dihimala ikoya.

⁸ Kuma peno dowa sogolro nnaing'anela tambilra tchapowa wa upama wenno Nabwiya Namatonga wapama unafuna liye divaha siku niwa nafiya. Siku neno miyo kannatambilra meka, mbwenye nnatambilra vamohi na atu atene anne kaziveliwe za waye.

Jokokomeza jogomiheda

⁹ Miyo nnafuna ira we uwande irana jatene jinawanda we ira uwande fiya wa miyo tchineneva.

¹⁰ Tchoira mulombwana Keresenti uhudowa ilambo ya Galasiya. Mulombwana Titu eto uhudowa ilambo ya Dalimasiya. Eto mulombwana Demaji na mwasa oziveliwa ja ilambo ya tchineneva ya vati, eni umala ditawa, uhudowa sidadi ya Tesalonika.

¹¹ So Lukaji bahi guhanle na miyo. Eto wazaga umulande Markuji, umuzegena wewuno. Mwasiwa liye gu mutu owanda dikamiheda pama pama mabasa a Mulugu.

¹² Miyo eto dihimala muruma mulombwana Tikiko ira adowe sidadi ya Efezo.

¹³ Eto wazaga, uzegena kapa yenno yahiyile miyo na mulombwana Karpo sidadi ya Toroyade. Uzegena eto malivuru aga dahiyile miyo wewule, makamaka anno kasakanyiwe na matembe.

¹⁴ Alexandiri wenno unafwanyeya agali namahana momba ohodiirela ubure wohokala wa masika. So unafuna mutambilriha zela jabure jaye gu Nabwiya.

¹⁵ Na wenne inafwanela ukale owendjelene zela liye. Tchoira ohokana ntindi noharahara mazu nalaleya hiyo.

¹⁶ Fendo yoroma yasumeliwe miyo, kalivo mutu mmohi azile dikalihavo, mbwenye atene kohoditawa. Zela jatene ejo, nnafuna Mulugu aakurumuwele.

¹⁷ Masiki aliwa kaditawileve, Nabwiya mbwenye ohoimela vamohi na miyo eto liye ohodilimbiha ira diwande avwiha Muselu Wapama mokwakwanela atu ohokala aJudewu atene kali evale. Evale miyo dohovuneliwa muwano mwa podogoma mwali miyo.

¹⁸ Nabwiya eto uneregeve divunela muwari mwa yoireya yabure ili yatene eto liye unodifiyana muUmweneni mwaye zulu. Undimuwa watene ukale waye kala no kala! Ame!

Malondjelo ogomiheda

¹⁹ Nnorumiha malondjelo wa Pirisila na mamunaye Akwila vamohi na akuda Oneziforo.

²⁰ Mulombwana Erastu uhanle Korinto eto mulombwana Torofimu dimuhiyile Mileto agali murenda.

²¹ Inafwanela uwande baranya za uno tempu yodidila yahanafiye. Mulombwana Yubulu, Pudenti, Linu, na Kalawudiya vamohi na abalihu atene kali eva anoulondjela.

²² Nabwiya akale na weyo mmirimani mwawo. Sayi dikale na weyo. Kukala mazu a karta nanembinli nalrembiwele Timoteyo.