2 Timoteyo 3 - Mazu Otchena a Mulungu

Makalelo abure a malambo ogomiheda

¹ So mbwenye inafwanela uiziwe ira malambo ogomiheda anafuna kakale malambo orutcha.

² Tchoira malambo ogomiheda atu anokala oviziveliwa oka, oziveliwa kobiri, ovitukulela, ovitetela, oaluluviha afwiwa, ohavwelela ababiwa, ohowanda tamalela kaireliwa upama, otakala,

³ ohokana tangaranga, ohowanda ziveliwa jinera afwiwa, oanukeda afwiwa, ohowanda viwendiha pama, oabubuda afwiwa, ohoziveliwa upama,

⁴ oaguliha afwiwa na malrango, atu ohovwelela, ohaona afwiwa nnga yengo. Anokala eto atu oziveliwa jengo joziva jiwa bahi hiyaniha no kala atu omuziveliwa Mulugu.

⁵ Anokala nnga anairana ja Mulugu eto aliwa runihaga kopolo daye. Atu anno inafwanela waarambele.

⁶ Muwari mwa atu anno, kohokalawo anazemba, kafiyaga mmavande roma anyengaga ahiyana ovuta, okana jotega, opupuruwa muwari mwa jofuna jiwa ja maningo.

⁷ Ahiyana anno anakalela fundja eto muwari mofundja, kinawanda fiyeda kana ibaribari.

⁸ Alombwana oviringaniha anno anafuna joruniha ibaribari, anafwalrafwana na mulombwana Janeji na Jambereji anno kafuna jomuruniha Mozeji. Sawasawa alombwana a tchineneva ba atu okana joumbuwela joviringana eto kinna pandi zela ibaribari inahara hiyo.

⁹ Aliwa eto jolaba jiwa kajinasusa. Tchoira uzimora wewa unoza uoneye vamentoni va atu atene nnga jaireyile na Janeji vamohi na Jambereji ale.

Mazu matene kakumile wa Mulugu

¹⁰ Weyo mbwenye unowendetcha na mafundjihelo nnga anna miyo, na mawendelo nnga anna miyo, na yofuna imohive nnga inna miyo, na nroromelo nnga ninna miyo, no vilela nnga unna miyo, no zivela nnga unna miyo, na ntindi nnga ninna miyo,

¹¹ no harahariwa nnga unna miyo eto unowendetcha no zuzumihiwa nnga wanna miyo sidadi ya Antiyokiya nari Ikoniyo nari Listira, miyo eto vilelaga. Eto fwanyeya ira Nabwiya ohowanda divunela muwari mwa goyi datene danna miyo.

¹² Na ibaribari atu atene anafuna wenda na makalelo anafuna Mulugu muwari mwa Yesu Kiristu, anerege harahariwa.

¹³ Mbwenye atu abure na anamanyenga anerege simbwa kana makalelo abure, aliwa anyengaga afwiwa eto ora imohive kanyengiwaga.

¹⁴ Weyo mbwenye uimeleve mwemo nnga mufundjihiwe we, nngave mwemo muroromenle we na mmirimani mwawo mwatene. Tchoira weyo umala aiziwa atu kaufundjihile.

¹⁵ Weyo eto romave uhimani wawo, uhuwanda iziwa Mazu otchena a Mulugu. Mazu a Mulugu anno anowanda uiziwiha makalelo ovulusiwa muwari momuroromela Yesu Kiristu.

¹⁶ Mazu matene ali mBibiliyani ba mazu awongile Mulugu eto ba mazu apama para nfundjiha mutu, nari musumulula mutu nari muwongoliha mutu ndila nari mulimbiha mutu ira awendege ndila yapama.

¹⁷ Jatene eji jinalaba ira mutu wenno uli wa Mulugu akale okwakwanela, owanda irana jatene japama.