2 Timoteyo 2 - Mazu Otchena a Mulungu

Munyakondo wa Yesu Kiristu

¹ Mbwenye zela weyo mwanaga, inafwanela ulimbihiwe muwari mwa sayi nnafwanyeya muwari mwa Yesu Kiristu.

² Yeniyo eto ivwile we na miyo vano diwongaga vamentoni va amboni adjindji, nnafuna ira utukule yowonga yenno imohive, waavahede alombwana ororomeleya ira na aliwene kaafundjihege atu amohiwa.

³ Inafwanela eto urumele zuzumihiwa nnga munyakondo wapama wa Yesu Kiristu.

⁴ Kavali eto munyakondo unakukumuwa na jolaba ja mwilamboni. So kukumuwa waye, unakukumuwa ira amuziveliwihe wenno umulrembile.

⁵ Nari maliba korida kaza awarihiwa tchapowa ahakwakwanihile malamulo a korida ile.

⁶ Inafwanela namalima wenno unalaba na kopolo daye datene akale murandji dja japama jikumile muwari mwa jolima jaye jile.

⁷ Uumbuwele jatene jinawonga miyo, tchoira waumbuwela, Nabwiya unouvaha onelramo muwari mwa jatene.

⁸ Umuumbuwele Yesu Kiristu wenno uvenyile mokwani, wenno abaliwe muzizani mwa Davi, wenno nnamulaleya miyo dalaleyaga Muselu Wapama.

⁹ Miyo eni dili omangiwene na makurenti nnga dili mutu wabure na mwasa olaleya Muselu Wapama wenno. Mbwenye masiki miyo dikale omangiwene, mazu a Mulugu mbwenye kinamangiwa!

¹⁰ Nona miyo zela jatene jinadiireyela, nnowanda vilela ira atu osakulriwa na Mulugu kafiyede watchela vulusiwa wewo unazana undimuwa wohomala muwari mwa Yesu Kiristu.

¹¹ Inafwanela nagarati niwande iziwa ibaribari ira akala nihikwa vamohi na Yesu, nnoza nikalewo vamohi na liye.

¹² Navilela, nnoza nitonge vamohi na Yesu muUmweneni mwaye. Namuruna, na liyene eto unoza anirune.

¹³ Eto hiyo nahakayena nroromelo, liye mbwenye unokalave ororomeleyene. Mwasiwa liye eka kanawanda viruna.

Namalaba ofwanela vamentoni va Mulugu

¹⁴ Inafwanela utukule jatene eji jinawonga miyo, waawumbutchede afwihu eto waarume vamentoni va Mulugu ira kahakanganele miselu dohokana mpindu. Tchoira kangana wewo kunna inalaba atu so mbwenye unaanonga anno anavwa.

¹⁵ Inafwanela uvisakanyede na makalelo nnga unawanda we ira uwande vivelela mmandani mwa Mulugu wagali mutu ofwanela, wagali namalaba ohokana mwasa onyaswana, wagali mutu ofundjiha mokwakwanela mazu a ibaribari.

¹⁶ Mbwenye inafwanela urambele jowonga jomululuviha Mulugu, tchoira jowonga jejo jinatatamula ira atu kadowegeve sogolro na makalelo ahanafuna Mulugu.

¹⁷ Jowonga jiwa jile jinaulukula nnga ilonda yohowanda vola. Muwari mwa atu owonga jabure jile, mmohi gu Imenewu, mmohiwa gu Fileto.

¹⁸ Aliwa kohomala peruwa, kahiyaga ibaribari mundulri, ani: <<Kuli venya mokwani umohiwa unadediha hiyo. Venya mokwani umala ireya.>> Muwari mwa mazu ewa ale, ananonga nroromelo na atu amohiwa.

¹⁹ Mulugu mbwenye vaimenle liye ulive olimbene nnga aliserisi. Ibaribari zela vaimenle Mulugu inafwanyeya muwari mwa mazu oira: <<Mulugu umala aiziwa ali aye.>> vamohi na mazu oira: <<Mutu uli watene unaromola nzina na Nabwiya ahiye joviringana.>>

²⁰ Fwanyeya ira muwari mwa palasiyo kahi ira jatene jinakalamo ti jengo josakanyiwa na oru owu parata ve bahi, nari. Jinokalamo eto ja imiri na ja ulongo. Jimohi jiwa ira jilabe mabasa oteteliwa, jimohi jiwa ira jilabe mabasa ohoteteliwa.

²¹ Nona mutu wenno unavihuwa, arambelaga johoteteliwa, liye mbwenye unowanda kala yengo yolaba mabasa oteteliwa. Unokala osakulreyene eto otchena, owanda laba mabasa a mundimuwa wa vande vale, eto unokala okozeyene ira alabege yengo ili yatene yapama.

²² Nona inafwanela utawege jofuna ja maningo jejo jinakanetcha azombwe. So mbwenye uvendege irana ja upama, ja nroromelo, jozivelana, ja murendele. Jatene ejo uiregena vamohi na atu atene anamuitana Nabwiya na murima otchena.

²³ Kuvolowe muwari mwa jorunihana ja uzimora, johokana sogolro. Mwasiwa jorunihana ejo jinatatamula madugudugu bahi.

²⁴ Inafwanela muzari wa Nabwiya ahakayena makalelo otatamula madugudugu. So mbwenye akayena makalelo oairela atu upama, awande afundjiha afwaye eto aireliwa ubure, awandege vilela.

²⁵ Inafwanela eto muzari wa Nabwiya awande asumulula mopwaseya ale anamuruniha. Afwase Mulugu unoavaha aliba runiha ale makalelo ira kawande twaruwa ira kafiyede mwezo oiziwa ibaribari,

²⁶ kawande vuluwa mmungohini mwa Diyabo mwali atu ohindiwene kairagana jofuna ja Diyabo.