2 Timoteyo 1 - Mazu Otchena a Mulungu

Pawulo unamulondjela Timoteyo

¹ Unalremba gu miyo Pawulo, namarumiwa wa Yesu Kiristu, mofuna mwa Mulugu ira daawandele atu nipangano noavaha ingumi yenno inafwanyeya muwari mwa Yesu Kiristu.

² Nnoulrembela we Timoteyo, mwanaga unamuziveliwa miyo. Malondjelo anaurumiheda miyo ba ala. Difunne ira sayi, na tangaranga, na murendele unna Mulugu Babihu na Nabwiya wehu Yesu Kiristu, jatene ejo jikale na we.

Pawulo ohomulimbiha Timoteyo

³ Miyo nnomutamalela Mulugu wenno unamulaba miyo na mmirimani mwaga mwatene eto wenno makolo aga kamulabetcha atu. Muwari momutamalela, miyo nnoutulela, dulobelelaga ora datene ntana na mahiyu.

⁴ Datulela nla wanla we, miyo nnokana usauwela nnga duone akoka ira miyo diwande hagalala pama.

⁵ Miyo eto nnowanda umbuwela nroromelo na ibaribari ninna we. Nroromelo neno ti nimohive niromile kana mbwiyawo wa muhiyana wenno unafwanyeya agali Loyide vamohi na mmawo Yunise. Peno eto dihikana ibaribari ira nroromelo neno ti nimohive ninna we.

⁶ Na mwasa wenno, nnafuna dukokomeze ira uvuzelelege yolemelela yenno Mulugu yuvahile liye ora dauhindile miyo na mandaga.

⁷ Tchoira Mulugu kanivahile munemba ira niovege, mbwenye liye anivahile Munemba ira nikayena kopolo no zivela eto niviwendihege pama.

⁸ Nona kunyaswege zela muhidedela umboni Nabwiya wehu nne kunyaswege zela miyo nnafwanyeya dagali munyakadeya na mwasa wa Yesu. So mbwenye ukayena zuzuma umohive wewo unna miyo na mwasa olaleya Muselu Wapama muwari mwa kopolo da Mulugu.

⁹ Mulugu univulusa eto uniitana ira niwendege na makalelo otchena. Jatene ejo Mulugu kaniirele na mwasa wa joira jehu japama, nari. So mbwenye ali yofuna yaye na sayi daye dedo Mulugu univahile liye muwari mwa Yesu Kiristu nnga mwemo mwaumbuwenle liye, zulu na ilambo ya vati jahanapandutchiwe.

¹⁰ Yofuna yaye na sayi daye jioneyile tchineneva muwari mwa Nvulusi wehu Yesu Kiristu. Liye uhuwanda gondjiha ukwa anizelagana ingumi na makalelo ohowanda kwa muwari mwa Muselu Wapama,

¹¹ wenno divahiwe miyo ira dikale namalaleya eto namarumiwa eto namafundjiha.

¹² Nona miyo zuzumaga nnga vini miyo eni. Mbwenye kannanyaswa, mwasiwa miyo dihimuiziwa wenno dimuroromenle miyo eto dihikana ibaribari ira liye unowanda hideda yenno imukoyihile miyo fiyeda siku neno.

¹³ Inafwanela uharege mazu a ibaribari anno wavwile we na miyo. Muwari mohara mule, ukayenave nroromelo nawo no ziveliwa wawo muwari mwa Yesu Kiristu.

¹⁴ Muwari mwa Munemba Otchena wenno uli muwari mwa hiyo, inafwanela ukoye yengo ya ibaribari ivahediwe we.

¹⁵ Weyo umala iziwa ira atene kakumile Aziya kohomala ditawa. Muwari mwa aliba ditawa ale, mmohi ali Fijelo. Mmohiwa ali Eremojeneji.

¹⁶ Mbwenye Nabwiya aawendele tangaranga akuda Oneziforo mwasiwa liye gwadilimbihile miyo fendo didjindji dene eto kanyaswile zela miyo kala omangiwene na makurenti.

¹⁷ Fwanyeya ira agazile Roma, ohodivenda na ntindi fiyeda liye difwanya.

¹⁸ Nabwiya asakanye ira siku neno, mulombwana Oneziforo awendeliwe tangaranga. Weyo eto umala iziwa mabasa matene alabile liye agali Efezo.