2 Samuweli 9 - Mazu Otchena a Mulungu

Muselu wa Davi na mulombwana Mefibozeti

¹ Siku nimohi mwene Davi ohafukaga atwaye eraga: <<Kodi vande va mwene Sawuli vihikala mulombwana uhanle ira miyo dimuirele upama na mwasa wa nfwaga Jonata?>>

² Fwanyeya ira mwa tempu yenne ohokala namalaba mmohi wa Sawuli, wenno aitaniwa Ziba. Kagamuitanne, agafiyile wa mwene Davi, Davi ohonfukaga eraga: <<Weyo uli mulombwana Ziba?>> Liye ohowakulaga eraga: <<He gu miyene namalaba wenyu!>>

³ Noira enne, Davi ohomuwandelaga eraga: <<Miyo dauitanela ira dufuke. Kodi muibalini mwa Sawuli kahanlewo nne mutu mmohi ofuna ira miyo dimuirele upama wa Mulugu?>> Evale Ziba ohowakulaga eraga: <<Uhukalawo Mefibozeti, mwana mmohi wa Jonata uhanle, wenno uranganle manyalo amenlene.>>

⁴ Noira enne, Davi ohonfukaga eraga: <<Nnga liye unafwanyeya waani?>> Ziba ohowakulaga eraga: <<Liye unafwanyeya vande va mulombwana Makiri mwana Amiyeli mwilamboni mwa Lo-Debari.>>

⁵ Noira enne, mwene Davi oharumaga atu ira kamudowele mwana Jonata ule vande va mulombwana Makiri mwana Amiyeli sidadi ya Lo-Debari.

⁶ Evale mulombwana Mefibozeti, mwana Jonata, Sawuli muzuliye, ohozaga wa Davi. Afiyaga ohoworama afiyihaga kove yaye vati, muwari momuriheda. Noira enne, Davi ohomuitanaga eraga: <<Mefibozeti!>> Liye ohowakulaga eraga: <<Gu miyene namalaba wenyu!>>

⁷ Noira enne, Davi ohomuwandelaga eraga: <<We mulombwana Mefibozeti kuove mwasiwa miyo nnafuna duirele upama na mwasa wa babawo Jonata wenno ali nfwaga. Miyo nnafuna duwelihede vilambo datene dedo dali da mbwiyawo Sawuli. Weyo eni roma peno dowa sogolro unakalege vamohi na miyo eto unadjege meza imohive na miyo.>>

⁸ Davi agawongile enne, mulombwana Mefibozeti ohokokoraga, aoramihedaga kove yaye vati, liye wakula eraga: <<Mbwiyeni miyo dagali mulombwana Mefibozeti nnafwanyeya dagali nnga mwanambwa okwene. Nnga miyo dili ani ira nyo mudiirele eno?>>

⁹ Noira eno, mwene Davi ohomuitanaga Ziba wenno ali namalaba wa Sawuli, liye muwandela eraga: <<Ziba miyo nnafuna duwandele. Jatene jali ja mwene Sawuli na vande vaye vatene, miyo peno dihimala nvaha marafula patarawu wawo muzuliye ula!

¹⁰ Eni kuma peno, weyo vamohi na ahimawo atene vamohi na anamalabawo atene mudowe mwalimege. Mwagalimile, jengo jinafuna kumaga munerege zana, munvahege mulombwana Mefibozeti ula vamohi na atu atene a vande vaye ira kakayena jodja. Mbwenye mwinnya Mefibozeti ula unadjege meza imohive na miyo!>> Fwanyeya ira mulombwana Ziba anna ahima a anapongwe kumi na atanu, vamohi na anamalaba 20.

¹¹ Evale liye ohowakulaga eraga: <<Mbwiyeni miyo dagali namalaba wenyu nnoirana jatene nnga mwemo muwongele nyo!>> Kuma evale dowaga sogolro, mulombwana Mefibozeti adja vamohi na mwene Davi nnga mwanaye.

¹² Mulombwana Mefibozeti ule ohomukana mwanaye mmohi wa muzombwe wenno aitaniwa Mika. Eto atu atene kakala vande va Ziba, kohoroma mulaba mulombwana Mefibozeti nnga anamalaba aye.

¹³ Ala ali makalelo Mefibozeti akala liye Jeruzalemu, adjaga meza imohive na mwene Davi. Mulombwana Mefibozeti alive orangala manyalo amenlene.