2 Samuweli 8 - Mazu Otchena a Mulungu

Davi ohagondjiha amwidanaye

¹ Jejile jagaireyile, Davi ohomaruwaga, liye dowa wana na aFilistewu. Agadowile wana na aFilistewu ale, ohagondjihaga, liye awaka utongi wanna atu. Eto ohawaka mmandani mwiwa sidadi imohi yakala atu yenno yaitaniwa Metegi-Ama, liye tukula kala yaye.

² Eto noira eno ohodowaga agondjiha akuda Mowabe. Agaagondjihile, ohawandelaga ira kagonanti vati. Kagagonatile, ohotukulaga ngohi, liye roma pima ante ngohile vagomenle atu, liye apa. Nomala liye pima akoka ante ngohile vagomenle atu, liye apa. Nomala liye pima akoka ante ngohile vagomenle atu, liye ahiya, kwahaapa. Liye iragana eno fiyeda atu atene mala. Mwa enne akuda Mowabe kahapiwe ale kohokala anamalaba a Davi eto aliwa kompagalri misoko.

³ Eto noira eno, ohodowaga liye wana na mulombwana Hadadezeri, mwana Reyobe, mwene wa Zoba, liye fiyeda mugondjiha. Tempu yenno ali mwene Hadadezeri agadowile ira awombole utongi waye vilambo dafwanyeya wandamelana muhindje Eufarati.

⁴ Evale liye agamugondjihile mwene Hadadezeri ule, ohomuwakaga aaterelado 1.000 a kondoni, na atu 7.000 owendiha kavalo da kondoni vamohi na anyakondo amohiwa okwakwana 20.000 owenda na mendo. Mwa enne Davi ohotukulagamo kavalo 100 bahi da kondoni ira dikale daye. Mbwenye kavalo datene dohala ohorangalihaga mendo.

⁵ Evale akuda Siriya kakala Damaxiku kohozaga ira kamukamihede Hadadezeri mwene wa Zoba ule. Muwari mwa akuda Siriya kazile ale, Davi ohapaga 22.000.

⁶ Davi agaagondjihile, ohosakanyaga mabazi a anyakondo aye sidadi ya Damaxiku muwari mwa akuda Siriya. Evale akuda Siriya kohokala anamalaba a Davi, aliwa roma mpagalrigi misoko. Eto Yehova omukamiheda mwene Davi ira awandege agondjiha amwidanaye mwatene mwadowa liye wana.

⁷ Davi agamugondjihile mwene Hadadezeri ule, ohawakaga anamalaba a Hadadezeri ale defeza da oru dedo dawendetchana atu, liye dowagana Jeruzalemu.

⁸ Eto ohotukulaga mukuwa oindjiva afwanyeya sidadi ya Beta na sidadi ya Berotayi, sidadi dedo dafwanyeya mwilamboni mwa mwene Hadadezeri emule.

⁹ Ohokalawo mwene mmohi wa ilambo ya Hamate, wenno aitaniwa Toyi. Liye agavwile ira: <<Eni mwene Davi uhugondjiha nikuru natene na anyakondo a mwene Hadadezeri!>>, ohoziveliwaga.

¹⁰ Muwari moziveliwa, ohomurumaga mwanaye mmohi aitaniwa Jorawu ira adowe amulondjele Davi eto amutetele zela mabasa alabile liye na mwasa owana na mwene Hadadezeri fiyeda mugondjiha. Tchoira Hadadezeri na mulombwana Toyi mundulri mwaza atu keretcha wana. Evale ohomurumana mwanaye ule jengo ja parata, ja oru na ja mukuwa.

¹¹ Mwanaye ule agazilena nvaha Davi, Davi ohotukulaga jengo jile, liye velela wa Yehova na makalelo nnga airilena liye malambo a mundulri ja parata na ja oru jejo jaawakile liye atu a vilambo datene dagondjihile liye.

¹² Vilambo daawakile liye jengo, anvaheda Yehova ti di: Edomu, Mowabe, ilambo ya akuda Aminoni, ilambo ya aFilistewu na ilambo ya akuda Amaleki. Davi eto ohonvaheda Yehova jejo jamuwakile liye Hadadezeri, mwana Reyobe, mwene wa Zoba.

¹³ Davi agawenlewo, ohapaga alombwana a Edomu okwakwana 18.000 nimburo naitaniwa ndabo na Mwinnyu. Mwa enne Davi nzina naye nohovweya.

¹⁴ Davi agagondjihile, osakanyaga mabazi a anyakondo aye muwari mwa ilambo yatene ya Edomu. Evale akuda Edomu atene kohokala anamalaba a Davi. Eto Yehova omukamiheda mwene Davi ira awandege agondjiha amwidanaye mwatene mwadowa liye wana.

Asogolrelri a mwene Davi

¹⁵ Mwene Davi oatongetcha aIzarayeli atene. Muwari motonga, otonga mwa ibaribari eto oasogolrelra mokwakwanela atwaye atene.

¹⁶ Musogolrelri waye wa anyakondo aitaniwa Jowabe wenno mmaye ali Zeruwiya. Eto maliba lremba joira ja guverno ali Jozafa mwana Ailude.

¹⁷ Eto Zadoki mwana Ayitube na Aimeleki mwana Abiyatare, aliwa kafwanyeya kagali anamakuta. Mulombwana Seraya ali maliba lremba madugumento a mwene.

¹⁸ Mulombwana Benaya mwana Joyada ali mundimuwa wa agwarda a Davi, anno kafwanyeya kagali akuda Kereti, na akuda Peleti. Eto ahima a mwene Davi kali andimuwa osogolrelra ja aIzarayeli.