2 Samuweli 7 - Mazu Otchena a Mulungu

Mulugu ohosakanya yopangana na mwene Davi

¹ Yehova agamanle mukamiheda mwene Davi agondjiha amwidanaye atene, Davi ofiyeda garati vande palasiyoni waye, liye vumaga mwa murendele.

² Mwa enne siku nimohi mwene Davi ohomuwandelaga namafiyiheda mmohi aitaniwa Nata ira: <<Kaing'ana! Miyo nnakala nyumba yapama yomangiwa na matabwa a seduru agali Kaxa ya Mulugu ilive mmusasani. Kodi kifwanenle dimange nyumba ira Kaxa ile ikalegemo?>>

³ Evale Nata ohomuwakulaga Davi eraga: <<Tiye, wairena yenno inafuna we. Mwasiwa Yehova uli na weyo!>>

⁴ Mwa enne, siku nazilege Davi awongaga na namafiyiheda Nata, mahiyuni uwa, mazu a Yehova kohozaga wa namafiyiheda Nata, kamuwandelaga ira:

⁵ <<Uvenye udowe wawonge na namalaba waga Davi, umuwandele ira: Yehova unawonga ira: Unafuna dimangela nyumba miyo Yehova ira dikalegemo kahi weyo.

⁶ Tchoira miyo roma tempu yaakumihile miyo Ana Izarayeli muIjipitu, fiyeda peno va kannakayena nyumba yaga. So nnawendetchave mmusasani okungiwa, miyo kalaga emule bahi!

⁷ Eto mwatene mwawenda miyo na Ana Izarayeli atene, kodi miyo dihibabiha wonga na musogolrelri uli watene wa Izarayeli dimurumile miyo ira aakumbuzege atwaga ira: <Nnga mwasiwa gwa nni nyo hafunaga dimangela miyo nyumba yomangiwa na matabwa a seduru?> >>

⁸ Yehova ohowongaga na Nata eraga: <<Na mwasa wenno, weyo uvenye udowe wamuwandele namalaba waga Davi wire: <Yehova wa Makuru Matene gunawonga ira: <<Miyo dukumihile mukokolani mwemo mwawenda we mundulri mwa mabila ira udowe wakale musogolrelri wa atwaga aIzarayeli!

⁹ Eto miyo dalive na weyo mwatene mwavira we eto dahatolotcha amwidanawo atene vamentoni vawo! Eto eni miyo nnoza diulukulihe nzina nawo ira nikale nnga mazina a andimuwa andimuwa anafwanyeya mwilamboni ya vati!

¹⁰ Eto miyo nnoza daavahede atwaga aIzarayeli nimburo neno ira aliwa kakalegemo eto nnoazala ira aliwa kakalegeve nimburo newa. Dagaavahedile nimburo newa, kinakukumuliwegeve eto kilivo atu amohiwa abure anafuna za aonihaga goyi nnga goyi yanna atu voroma vene tempu yawendetcha atu na anamasogolrelra amohiwa daahambihile miyo mundulrimu ira kaasogolrelrege atwaga aIzarayeli!

¹¹ Weyo eni kunakana kondo akoka na amwidanawo atene, unerege vuma. Eto vamohive vevo miyo dagali Yehova nnouwandela ira miyo gunafuna umangela weyo nyumba ya umwene.

¹² <<Tchoira malambwawo kakwakwana ira udowe wavume na makolo awo, mundulri mwawo, muwari mwa ahimawo anafuna hala, miyo nnomuvenyiha mutu mmohi ira akale vamalroni vawo, eto miyo nnogarateyiha umwene waye.

¹³ Liye mbwenye gunafuna manga nyumba ira nzina naga nikalegemo. Eto miyo nnosakanya ira umwene waye ukale umwene wa mukalakala.

¹⁴ Miyo nnokala babaye eto liye unokala mwanaga. Liye mbwenye atega, miyo nnomulanga na nkogozo wa atu, na viwaxuwaxu da atu.

¹⁵ Mbwenye miyo kadiza dihiya muzivela nnga dahiyile miyo muziveliwa Sawuli, wenno dimuhiyile miyo mundulri ira weyo ukale sogolro.

¹⁶ Weyo mbwenye vande vawo vamohi na umwene wawo unerege dowa sogolro malambo a mukalakala vamentoni vaga. Mpando wawo wa umwene unogarateya kala no kala.>> > >>

Lobela wa Davi

¹⁷ Noira enne, mulombwana Nata ohodowaga nfwanya mwene Davi, liye muwandelamo mazu matene Yehova amuwandenle liye muwari momuoniha jengo mmuruni mwaye.

¹⁸ Evale mwene Davi agavwile mazwale, ohovolowaga mMusasani mwa Yehova, liye garati vamentoni va Yehova, liye roma lobela eraga: <<Yehova Mulugu kodi miyo dili ani eto atu a vande vaga bani ira nyo mudifiyihe makalelo dinna miyo ala?!

¹⁹ Eto muwari mwa jatene jidiirele nyo, vamentoni va nyo Nabwiya Yehova munaona nnga jihiyeva. Ante nyo munofiyeda wonga zela vande va miyo dagali namalaba wenyu zela tempu ya sogolro. Kodi nyo Nabwiya Yehova munoiretcha eno na atu atene?

²⁰ Nabwiya Yehova miyo namalaba wenyu dagavwile jatene jiwongile nyo, kadinna yengo inafuna miyo wonga. Tchoira nyo muhumala iziwa jatene jili mmirimani mwaga dagali namalaba wenyu!

²¹ Yehova nyo na mwasa wa nipangano nenyu nnga jejo jafuna nyo na mmirimani mwenyu, muhuwanda diwandela miyo namalaba wenyu undimuwa watene wenno munafuna nyo za irana sogolro.

²² Mwa eno, nyo so Nabwiya Yehova muli mundimuwa. Tchoira kaliwo okwakwanela na nyo. Na mwasa wa jatene jivwile hiyo na mabaru ehu zela nyo, nnowanda rumela ira kaliwo Mulugu mmohiwa ahali nyo bahi!

²³ Kanilivo nlogo nolingana na atwinyu aIzarayeli. Muwari mwa malogo matene a ilambo ya vati, aIzarayeli ti nlogo nimohive nyo Mulugu mwaawombonle nyo ira kakale atwinyu. Muiragana eno ali ira muvweyihe nzina nenyu. Nyo mohowanda awombola muwari mwa aIjipitu ira kakale atwinyu eto mohowanda irana jengo jilukulu jotikiniha mwaatamangihagamo atu mwilamboni mwiwa na amilugu ewa ira atwinyu kakalemo.

²⁴ Yehova gu nyo musakannye ira aIzarayeli kakale mulogo wenyu malambo a mukalakala, nyo so Yehova gwasakunlre ira mukale Mulugu wewa.>>

²⁵ Davi ohowongagave eraga: <<Nyo so Nabwiya Yehova nnouvepani ira mukwakwanelihede kala no kala mazu muwongile nyo zela miyo namalaba wenyu na atu a vande vaga. Iranani nnga muwongele nyo.

²⁶ Mwaira eno nzina nenyu nnerege tamaleliwa kala no kala eto atu anerege wonga ira: <Yehova wa Makuru Matene gu Mulugu wa aIzarayeli!> Eto nivande na miyo namalaba wenyu Davi nnakalege nogarateya nene vamentoni venyu!

²⁷ Tchoira nyo so Yehova wa Makuru Matene, Mulugu wa aIzarayeli, muhuwanda diiziwiha miyo namalaba wenyu, mudiwandelaga ira: <Miyo nnoumangela nyumba.> Nona tcheniyo idivahile miyo namalaba wenyu kopolo ira diwande lobela yolobela yenno ilobenle miyo ila!

²⁸ So Nabwiya Yehova, nyo muli Mulugu, jowonga jenyu ti ja ibaribari. Nyo muhupangana ira mudivahe japama jatene eji dagali namalaba wenyu.

²⁹ Nona mofuna mwenyu inafwanela muwande reliha vande vaga miyo namalaba wenyu ira umwene waga udowege sogolro kala no kala, vamentoni venyu. Tchoira nyo Nabwiya Yehova muhuwonga ira munoreliha umwene waga miyo namalaba wenyu malambo a mukalakala!>>