2 Samuweli 6 - Mazu Otchena a Mulungu

Kaxa ya Yopangana yohodowiwana Jeruzalemu

^1-2 Siku nimohi mwene Davi ohagumaniha akoka anyakondo oiziwa wana pama a Izarayeli okwakwana 30.000, aliwa dowa ilambo ya Bali-Juda ira kadowe katukule Kaxa ya Mulugu yenno atu vadowetcha atu karomolagavo nzina na Yehova wa Makuru Matene, wenno unakala vari va akerubi ambinli.

³ Kagafiyile Bali-Juda ule, kohodowa vali Kaxa ile vande va mulombwana Abinadabe, wenno nyumbaye yafwanyeya vogwela vang'onove. Kohokumiha Kaxa ya Mulugu ile mmba mwiwa mwali atu, aliwa igweliha muatereladoni muxa wenno ali ahanarome labiwana. Evale kagatukunle Kaxa ya Mulugu ile kadowagana, awendihaga aterelado ule aligi ana Abinadabe ambinli anno kafwanyeya kagali Uza na mbalaye Ayiyo.

⁴ Eto mulombwana Ayiyo gwasogonlrege, liye kala vasogolro va aterelado wenno mwafwanyeya Kaxa ya Mulugu ile.

⁵ Eto mwene Davi vamohi na aIzarayeli atene kohokalaga mundulri kaharaga aterelado ule, aliwa imbaga nyumbo eto kaimbaga joimbana jiwa, arpa, lira, makotcho na joimbana jinakala nnga parato. Koimbagave kamutamalelaga Yehova mwa kopolo diwa datene.

⁶ Mwa enne kadowagave enne, kagafiyile nimburo nobubudavo jalo na mulombwana Nakomi, ng'ombe dedo datutumula aterelado ule dohogwagwaduwaga. Evale ng'ombe dile dagagwagwaduwile, mulombwana Uza ohidedaga Kaxa ya Mulugu ile na ndanda naye ira yahagwe.

⁷ Evale mulombwana Uza agatapunle mandaye ira ahinde Kaxa ile, Yehova ohotakaleliwaga na makalelo ohokala a masika zela mulombwana Uza na mwasa ofuna johinda Kaxa ya Mulugu ile. Evale Mulugu ohomporotcha mulombwana Uza vevale na mwasa wa yoviringaniha yaye. Mwa enne mulombwana Uza ohokwa wandamelana vevale vali Kaxa ya Mulugu ile.

⁸ Mwa enne Davi ohotakaleliwaga na mwasa oira Yehova ohompa mulombwana Uza. Na mwasa wenne, ohovahaga nimburo nenne nzina na Pereji-Uza [ku wonga Tongiwa wa Uza]. Fiyeda peno nimburo nenne nnaitaniwa na nzina neno.

⁹ Mwa enne Davi agaonne ira: <<Eni mutu mmohi uhukwa na mwasa wa Kaxa ya Yehova ila>>, ohomuovaga Yehova siku nenne. Muwari moova ohowongaga eraga: <<Nnga miyo nnawande tukula avi Kaxa ya Yehova ila ira ifiye Jeruzalemu unakala miyo?!>>

¹⁰ Mwa enne na mwasa oova, Jeruzalemu wayana liye Kaxa ya Yehova ile, kafiyilegenawo. Mbwenye adowilege ihiya vande va mulombwana mmohi aitaniwa Obedi-Edomu, nkuda Gate.

¹¹ Mwa enne Kaxa ya Yehova ile yohomala medi miraru yagali vande va mulombwana Obedi-Edomu evale. Noira enne, Yehova ohomureliha mulombwana Obedi-Edomu nkuda Gate ule vamohi na atu atene a vande vaye na mwasa wa Kaxa ya Yehova yenno yafwanyeya vande vaye.

¹² Mwa enne kohokalawo atu kavenyilege, aliwa dowa muwandela mwene Davi, aliwa ira: <<Xii, vande va Obedi-Edomu vihiyile nyo Kaxa ya Mulugu vale, Mulugu uhumureliha liye na jatene ja vande vaye na mwasa wa Kaxa ya Mulugu yenno muhiyile nyo vande vaye!>> Mwa enne Davi agavwile, ohovenyaga na atwaye, aliwa dowa vande va mulombwana Obedi-Edomu vale, aliwa dowa tukula Kaxa ya Yehova ile, aliwa idowagana mohagalala sidadi ya Jeruzalemu wewo wakala Davi.

¹³ Mwa enne alombwana katukunle Kaxa ya Yehova ile kagawendile paso tanu na imohi, mwene Davi ohotukulaga ng'ombe imohi ilukulu vamohi na mwana ng'ombe imohi ing'ining'inive yoruva, liye velela mukuto wa Yehova.

¹⁴ Evale mwene Davi agamanle velela mukuto wa Yehova, ohoromaga ina na kopolo daye datene vamentoni va Yehova momutamalela. Eto mwa tempu yenne ali agawarile kuleti ya unamakuta yosakanyiwa na usalru wapama.

¹⁵ Noira enne, Davi vamohi na aIzarayeli atene kaligi vamohi na liye kohotukulaga Kaxa ya Yehova ile, aliwa dowagana Jeruzalemu. Kadowaga, atene kokuwaga mohagalala kaimbaga palraza.

¹⁶ Mwa enne kavolowagana Kaxa ya Yopangana ya Yehova ile musidadi, mwadi Davi wenno aitaniwa Mikali mwana Sawuli, ohoing'anelaga vajanelani, liye muona mwene Davi ainaga, alupalupaga vamentoni va Yehova. Mbwenye agamuonne ohomulramwisaga mmirimani mwaye, liye hamuonaga nnga yengo.

¹⁷ Noira enne, aliwa kohotukulaga Kaxa ya Yehova ile, aliwa dowa volotchiha mmusasani wenno Davi akungile liye ira kaze kahiyemo Kaxa ile. Noira enne, Davi ohovelelaga mikuto dotumeya vamohi na jovelela ja murendele vamentoni va Yehova.

¹⁸ Agamanle velela mikuto dotumeya na jovelela ja murendele jile, ohareliha atu atene mwa nzina na Yehova wa Makuru Matene.

¹⁹ Agamanle areliha, ohagawelaga aIzarayeli atene kafwanyeyaga vevale alombwana vamohi na ahiyana kada mutu pawu imohi, pindula ya nyama na nibolu nimohi nosakanyiwa na uva oumma. Noira eno, atu atene kohobalaleya, kada mutu dowaga vande vaye.

²⁰ Noira enne, mwene Davi ohodowa ira aarelihe atu a vande vaye. Mbwenye afiyaga wene vande vale, muhiyanaye wenno aitaniwa Mikali mwana Sawuli ohozaga gumana na liye eraga: <<Kodi jaira we jile peno ali nni? We kalaga nnga zimora ohokana manyazo, we waraga johokala pama, roma aoniha jengo jokoyeya ahiyana anno anaalaba anamalabinyu!>>

²¹ Mbwenye Davi ohomuwandelaga muhiyanayele eraga: <<Miyo daina vamentoni va Yehova. Mwasiwa Yehova ohodisakulra miyo, mukwaranya babawo, nari mutu uli watene wa vande vaye. Liye agadisakunlre, ohodihambiha ira dikale mundimuwa wa Izarayeli anno anafwanyeya kagali atu a Yehova. Nona miyo nneregeve hagalala vamentoni va Yehova.

²² Tchoira miyo nnerege irana jimohive jeji eto nnokwaranyiha nnga jeji jiirile miyo peno. Eto weyo uneregeve diona nnga zimora. Mbwenye anamwali anno waawonga we, aliwa anerege diriheda.>>

²³ Eto fwanyeya ira Mikali, wenno ali mwana Sawuli ohokala eno ahabanle mwana fiyeda ukwa waye.