2 Samuweli 3 - Mazu Otchena a Mulungu

¹ Fwanyeya ira kondo imohive yenne yohotatamulaga kondo yomala malambo madjindjene mwa akuda Sawuli na akuda Davi. Mwa enne muwari mowana mule, anyakondo a Davi kopolo diwa dodowave sogolro mbwenye anyakondo a akuda Sawuli, aliwa kopolo diwa dowelela mundulri.

Ahima a mwene Davi

² Davi agalive sidadi ya Eboroni ule ohabala anapongwe ala: Murandji baliwa aitaniwa Aminoni, wenno ambanle liye na muhiyanaye Ainowa nkuda Jezereli.

³ Wanembinli aitaniwa Kileyabi, wenno ambanle liye na muhiyanaye Abigayeli, wenno ali mwadi Nabali nkuda Karimele. Mwana waneraru aitaniwa Abisalawu, wenno ambanle liye na Maka mwana Talimayi, mwene wa Jesuri.

⁴ Mwana wanennayi aitaniwa Adoniya wenno ambanle liye na Ajite. Wanetanu aitaniwa Sefatiya, wenno ambanle liye na Abitali.

⁵ Wanetanu na mmohi aitaniwa Itiramu, wenno ambanle liye na Egala. Egala ali Davi muhiyanaye mmohiwa. Ahima atene anna Davi aabanle agali sidadi ya Eboroni.

Abineri ohomuhiya Isbozeti, liye gumanela na Davi

⁶ Tempu ya kondo muwari mwa umwene wa Sawuli na umwene wa Davi kawana atu, mulombwana Abineri ovisogolriha, undimuwa wanna liye wodowave sogolro vamentoni va atu kahara ja Sawuli.

⁷ Fwanyeya ira mwene Sawuli ahanakwe ohomukana muhiyanaye wang'ono eni aitaniwa Rizipa mwana Ayiya. Siku nimohi mulombwana Isbozeti ohomuwongagana Abineri eraga: <<Kodi mwasiwa gwa nni we umutukulaga wenno ali babaga muhiyanaye wang'ono, uroma mugonagana?>>

⁸ Evale Abineri agavwile enne, ohotakaleliwaga valukulu. Mwa enne ohonfuka Isbozeti eraga: <<Kodi weyo unaumbuwela ira miyo dili muru wa mwanambwa ofuna ja nlogo na Juda? Eto miyo fiyeda peno nnaairela upama atu a umwene wa babawo Sawuli na abalaye atene na afwaye atene. Eto miyo gunaukamihedetcha ira wahawande gondjihiwa na mwene Davi. Eto vazulu va jatene jejo kodi peno weyo unafuna udisanyege na mwasa wa muhiyana mmohi bahi?

^9-10 Tchoira Yehova oholumbela voroma vene ira: <Sogolro nnafuna dimuwake Sawuli vamohi na ahimaye umwene waye dinvahede Davi ira atongege aJuda vamohi na aIzarayeli ira Davi atongege ilambo ya Izarayeli yatene kuma ilambo ya Dani fiyeda ilambo ya Beriseba.> Mbwenye jatene jejo jalumbenle Yehova unafuna kwakwaneliheda gu miyo. Miyo peno nnolumbela ira dahauwake umwene unna we, Mulugu aditonge dagali Abineri na makalelo anafuna liye!>>

¹¹ Fwanyeya ira mulombwana Isbozeti omuova mulombwana Abineri. Muwari momuova, Abineri agawongile mazu anne, liye kawakunleve yengo.

¹² Evale mulombwana Abineri oharuma atu na milanyo wa Davi eraga: <<Kodi unafuna tongaga ilambwela bani, kahi nyo? Ndoweni nisakanyeni yopangana yowandana miyo na nyo. Mwera eno, miyo nnoukamihedani ditukule nlogo natene na Izarayeli, duvahedeni mmandani mwenyu ira nyo mutongege!>>

¹³ Davi agavwile enne ohorumelaga eraga: <<Tabo, ihikala pama. Miyo nnosakanya yopangana yowandana na weyo. Mbwenye yengo imohi inafuna miyo uwandela tchi ila. Weyo kunabaranyeda za gumana na miyo kove na kove, wahanamuzena muhiyanaga Mikali mwana Sawuli!>>

¹⁴ Eto noira enne, mwene Davi oharuma atu na milanyo wa Isbozeti mwana Sawuli amuwandelaga eraga: <<Miyo nnafuna udivahede muhiyanaga Mikali wenno damutenle miyo na joinela 100 ja aFilistewu.>>

¹⁵ Fwanyeya ira tempu yenne Mikali ateliwe na Palitiyeli mwana Layiji. Mwa enne Isbozeti agavwile zela mazu a Davi oira: <<Miyo nnanfuna muhiyanaga Mikali>>, ohodowaga, liye muwaka mamunaye Palitiyeli.

¹⁶ Mulombwana Palitiyeli agawakiwe muhiyanaye ule kamudowagana, liye ohoromaga ahara anlaga fiyeda sidadi ya Bawurimi. Evale Abineri ohomuwandelaga eraga: <<Kawelaga udowege vande!>> Noira eno, liye ohowelelaga mundulri.

¹⁷ Evale mulombwana Abineri ohowongaga na andimuwa andimuwa a Izarayeli eraga: <<Nyo romelave wanle mofunafunetcha ira Davi autongegeni! Kodi kahi mwemo?

¹⁸ Peno mbwenye tempuwa ihifiya ira nyo mmuhambihe. Tchoira Yehova ohowonga ira: <Miyo nnafuna daawombole atwaga mmandani mwa amwidaniwa aFilistewu na mmandani mwa amwidanaga atene muwari mwa Davi.> >> Evale andimuwale kohorumela.

¹⁹ Eto noira enne, Abineri ohodowaga awandela andimuwa a nlogo na Benjami mazu mamohive anne. Na aliwene kohorumela. Nomala enne, ohovenyaga na alombwana 20, liye dowa Eboroni ira amuwandele Davi zela zelru yahenlevo malogo matene a aIzarayeli na nlogo na Benjami.

²⁰ Evale mulombwana Abineri na afwaye 20 ale, kagafiyile wa Davi sidadi ya Eboroni ule, Davi ohomusakanyelaga Abineri vamohi na afwaye pwando ilukulu.

²¹ Evale Abineri ohomuwongana Davi eraga: <<Miyo nnafuna divenye, didowe, daagude atu atene a Izarayeli daazena ira hiyo nisakanye yopangana yowandana na nyo mbwiyeni so mwene. Era eno nyo munerege atonga atu atene mofuna mwenyu.>> Noira enne, Davi ohomugunya Abineri, liye venyihana dowaga mwa murendele.

Jowabe ohompa Abineri

²² Fwanyeya ira tempu yazilege mulombwana Abineri wa Davi ule, mulombwana Jowabe vamohi na anyakondo atene tchaligivo. Mwene Davi agamulanyile Abineri mwa murendele Eboroni ule, liye agamaruwile adowaga, kari kari tchi tempu yafiyaga mulombwana Jowabe vamohi na anyakondo aye kakumaga kondoni. Aliwa kazaga, kohokagana jengo johokala ja masika jejo jaawakile atu afwiwa kondoni.

²³ Evale mulombwana Jowabe vamohi na anyakondwaye atene kagazile, kohowandeliwaga ira: <<Eni mulombwana Abineri mwana Neri ohoza wa Davi eto Davi kamuireleve yengo. Eni koholanyana, nomala eno liye dowaga mwa murendele!>>

²⁴ Evale mulombwana Jowabe agavwile enne, ohodowaga nfwanya mwene Davi anfukaga eraga: <<Kodi musakanyile nni? Abineri agazile wa nyo, mwasiwa gwa nni mmulanyaga liye adowaga mwa murendele?!

²⁵ Eno liye azela monyenga ira awendelele uno ira aiziwe mwatene munadowa nyo, na jatene jinahinda nyo. Nyo eto muhumala muiziwana jejo!>>

²⁶ Mwa enne Jowabe agamanle wonga na Davi, nokuma vevale, ohorumihaga milanyo na anyakondo ale ira: <<Mudowe mwamuwelihe mulombwana Abineri.>> Evale aliba rumiwa ale kohoromaga mutamangela ante aliwa dowa nfwanya isime ya Sira, aliwa muweliha. Mbwenye jaireya atu enne Davi kaiziwile.

²⁷ Evale aliba rumiwa ale kagamuwelihile mulombwana Abineri, agazile Eboroni ule akoka, Jowabe ohomutukulaga Abineri, mudowana okala ha ule, wandamelana va mulango va sidadile, kalaga nnga unafuna amuwandele yengo yokoyeya. Evale Jowabe ohomulataga Abineri mbani, liye weliha kunyakunya zela mbalaye Azayeli wenno Abineri ampile liye. Agamulatile enne Abineri ohokwa.

²⁸ Evale Davi agavwile ira: <<Jowabe uhumpa Abineri>>, ohowongaga ira: <<Miyo na umwene waga kaninna mulandu vamentoni va Yehova zela sangiri na Abineri mwana Neri.

²⁹ Mulugu amutonge mulombwana Jowabe vamohi na muibalini mwatene mwa babaye zela ubure usakanyile liye. Eto vande vaye malambo matene vifwanyeye mutu okana molra owu maranya owu hehi mutu orangala unafuna wendaga na nkogozo owu hehi mutu opiwa na supada kondoni owu hehi mutu ohokana jodja.>>

³⁰ Fwanyeya ira Jowabe na mbalaye Abizayi, kampele Abineri mwana Neri na mwasa oira liye ohompa mbaliwa Azayeli kondoni, kawanaga Jibeyawu.

³¹ Nomala enne, mwene Davi ohomuwandelaga Jowabe vamohi na anyakondo atene kafwanyeya na liye eraga: <<Mukawule jowara jenyu, muware masakwi, mukumbanyege ukwa wa Abineri!>> Mwa enne kamudowagana ira kamukoye mulombwana Abineri, Davi oaharaga mundulri mwa kaxawu.

³² Evale kohomukoyaga Abineri mwilamboni mwa Eboroni mwemule. Kagamanle mukoya, kagalive masiyeni wewule, mwene Davi ohotomolaga kuto amunlelaga Abineri. Eto atu atene kafwanyeyaga evale, na aliwene kohonlaga.

³³ Mwene Davi ohomukumbanyaga Abineri awongaga eraga: <<Kodi mwasiwa gwa nni Abineri akwa nnga mbava?!

³⁴ Tchoira liye mandaye tchamangiwe nne mendo daye kadafungihiwe na makurenti. Mbwenye liye ukwile nnga mutu apiwaga na apanga!>> Noira enne, atu atene kohowelelagave munlelaga mulombwana Abineri.

³⁵ Nomala mukoya Abineri, Davi kafunilegeve jodja siku nenne. Mwa enne kohokalawo kavenyilege, aliwa dowa mukanyihedaga ira adje. Mbwenye Davi ohowakulaga alumbelaga eraga: <<Miyo nnolumbela ira miyo dilawiha pawu nari yengo imohiwa nzuwa nahanavire, Mulugu aditonge na makalelo anafuna liye!>>

³⁶ Evale atu atene kagavwile enne, kohoziveliwaga. Tchoira ora yenno aliwa koziveliwa jatene jaira mwene.

³⁷ Mwa enne atu atene kafwanyeyaga vevale vamohi na aIzarayeli atene kohovayelaga iziwa ira: <<Ii, mwene Davi kafunile ira Abineri mwana Neri apiwe nari!>>

³⁸ Noira enne, mwene Davi ohowongaga na anamalabaye atene eraga: <<Kodi nyo kamuiziwile ira peno muwari mwa aIzarayeli uhukwa musogolrelri, mulombwana mulukulu?

³⁹ Miyo mbwenye masiki dagalive mwene osakulriwa na Yehova, miyo peno kadinna kopolo doakwaranya ahima a Zeruwiya ala na uwali unna atu. Yehova amutonge mutu wabure zela ibure iirile liye.>>