2 Samuweli 24 - Mazu Otchena a Mulungu

Davi ohakontariha atu

¹ Mwa malambo anne Yehova ohotakaleliwaga na makalelo ohokala a masika zela aIzarayeli akoka. Mwa enne Yehova ohosakanya ira Davi aairele aIzarayeli yabure awongaga eraga: <<Kadowa wakontari indjiva wa aIzarayeli na akuda Juda.>>

² Evale mwene Davi ohomuwandelaga Jowabe musogolrelri waye wa anyakondo afwanyeya na liye eraga: <<Uvenye uwendawende muwari mwa malogo matene a Izarayeli, roma Dani ante dowa Beriseba, waakontari atu atene ira uiziwe indjiva uwa.>>

³ Jowabe mbwenye ohowonga na mwene eraga: <<Nnga kodi mwasiwa gwa nni nyo mbwiyeni so mwene funaga ira mwaalrembelre atu atene? Yeniyo mbwenye kinakala. So mbwenye Yehova Mulugu wenyu akale unafuna aindjiviha atwinyu fendo 100, kwaranya nnga muindjivele atu peno va. Eto nyo mbwiyeni so mwene muone jatene jejo na meso enyu, mwahanakwe!>>

⁴ Mbwenye Davi ohokalelave ntindi zela mazu awongile liye, kabanlre jowonga ja Jowabe na asogolrelri a anyakondo. Noira enne, mulombwana Jowabe ohomaruwaga na asogolrelri a anyakondo ale vamentoni va mwene vale ira kadowe karome akontari atu atene a Izarayeli.

⁵ Evale aliwa kagamaruwile, kohodowaga lambuwa muhindje Jordawu, aliwa roma mabasiwa sidadi ya Aroweri, pandi ya muwononi odjana wa sidadi inafwanyeya nimburo notita na Gadi, aliwa kwaranyavo dowa pandi ya Jazeri.

⁶ Nokuma evale kohodowaga Jileyadi, aliwa vira dowa mwilamboni mwa Kadeji wakaletcha akuda Eti. Noira eno, kohodowaga Dani ante aliwa dowa fiya Sidoni.

⁷ Noira eno, kohodowaga nimburo nolimba notawelamo nafwanyeya Tiru, na sidadi datene da aEvi na sidadi datene da akuda Kana. Noira enne, kohorungunuwaga, aliwa dowa pandi ya suli wa ilambo ya Juda, aliwa dowa fiyeda Beriseba.

⁸ Mwa enne kagamanle wendawenda ilambo yatene, kohowelelaga Jeruzalemu. Muwari mwa ulrendo wewa watene kamanle medi mitanu na minnayi na malambo 20.

⁹ Noira enne, mulombwana Jowabe ohodowaga muwandelamo mwene Davi, indjiva wa atu atene a Izarayeli. Ohowongaga eraga: <<Alombwana olimba mirima a Izarayeli owana na supada kali 800.000 eto a nlogo na Juda kali 500.000.>>

Mulugu ohotonga yotega ya Davi

¹⁰ Mbwenye Davi agamanle akontari atwale, ohoroma umbuwela zela ibure yasakanyile liye muwari moakontari atu. Na mwasa wenne, mwene Davi ohonvepaga Yehova eraga: <<Yehova miyo duhutegelani zela jejo jiirile miyo, daakontarigi atu. Yehova nnouvepani ira mukurumuwele yodawa yaga miyo namalaba wenyu. Mwasiwa miyo dihisakanya uzimora!>>

¹¹ Noira enne, mmetcheloni muwa, mwene Davi agavenyile na mabebehene, mazu a Yehova kohozaga wa namafiyiheda Gadi, namaona wa Davi ira:

¹² <<Udowe wamuwandele Davi wire: <Yehova gunawonga ira: <<Miyo nnafuna diwonge jengo taru jabure. Usakulre muwari mwa jengo taru ji ira miyo duirele yenno inasakulre we!>> > >>

¹³ Evale namafiyiheda Gadi agawandeliwe mazwale, ohodowaga nfwanya Davi, liye kwi: <<Yehova unouvaha jabure taru ji ira usakulrevo. Kodi weyo unafuna ira mwilamboni mwawo muze ndala fiyeda yaka taru? Owu unafuna umale medi miraru amwidanawo kautamangihaga? Owu unafuna ira mwilamboni mwawo muze itukwa ya atu kakwaga fiyeda malambo mararu? Uumbuwele inafuna we sakulra muwari mwa jabure taru ji ira miyo didowe damuwandele Yehova wenno udirumile!>>

¹⁴ Evale mwene Davi ohomuwakulaga namafiyiheda Gadi, liye ira: <<Miyo dili mmakatamihoni eni. Yapamiwa evo inafwanela nigwele mmandani mwa Yehova, mwasiwa Yehova gwa tangaranga dilukulu. Mbwenye ira nigwele mmandani mwa amwidani, kanifunile.>>

¹⁵ Evale Yehova ohorumiha itukwa ya atu mwilamboni mwatene mwa Izarayeli, romela mabebehi ante ora yafunile Yehova. Mwa enne kohokwa atu ohokala a masika romela Dani ante dowa fiya Beriseba alombwana okwakwana 70.000.

¹⁶ Nomala eno, mungelro otolotcha ule agawongonle muwono waye ira atolotche Jeruzalemu, Yehova eto omuhiyiha mungelrole yabure yafuna liye ira. Liye kwi: <<Ikwakwana! Kakumihawo ndanda nawo.>> Fwanyeya ira ora yenno Mungelro wa Yehova ule afwanyeyaga nimburo nobubudavo jalo na mulombwana Arawuna nkuda Jebuzi.

¹⁷ Davi ohomuonaga mungelro aapa atu ule. Evale ohowongaga na Yehova eraga: <<Yehova utegenleni gu miyo. Dihisakanya ubure. Nnga mabila ala kautegenleni nni? So nnafuna ira muditonge miyo damwinnya vamohi na vande va ababaga!>>

Davi ohomanga ibuwa ya Yehova

¹⁸ Siku nimohive nenne namafiyiheda Gadi ohozaga wa Davi liye muwandela ira: <<Uvenye udowe, wammangele Yehova ibuwa ya mukuto, nimburo nobubudavo jalo na mulombwana Arawuna, muJebuzi.>>

¹⁹ Evale mwene Davi ohovenyaga ira airena nnga mwemo mwamuwandenle Gadi eto nnga mwemo Yehova mwawongele liye.

²⁰ Evale mulombwana Arawuna againg'anne ha ule, ohomuonaga mwene Davi vamohi na anamalabaye atene kazaga wa liye. Mwa enne liye ohodowaga, liye mukokorela mwene Davi aoramihaga kove yaye ante fiyiha vati.

²¹ Noira enne, Arawuna ohofukaga eraga: <<Kodi mwasiwa gwa nni mbwiyeni so mwene, nyo zaga wa miyo namalaba wenyu?>> Davi ohowakulaga, liye ira: <<Hiyo nazela ira nigule nimburo nawo nobubudavo jalo ira nimangevo ibuwa ya mukuto wa Yehova ira Yehova awande maliha ubure unafwanyeyana atu atene.>>

²² Evale mulombwana Arawuna ohowongaga na Davi eraga: <<Tukulani mbwiyeni so mwene. Miyo nnauvahani ira muvelele yenno munafuna nyo! Nnouvahani eto ng'ombe diwa ira akale mukuto otumeya eto nnouvahani jobubudana vamohi na magologolo ogumanihana ng'ombe di ira jikale kuni dotumeyana mukuto.

²³ Jatene eji miyo nnouvahani nyo mbwiyeni so mwene!>> Arawuna ule ohowongagave eraga: <<So mwene, Yehova Mulugu wenyu awande uonani moziveliwa.>>

²⁴ Mbwenye mwene Davi ohomuwandelaga Arawuna kwi: <<Nari. Miyo nnafuna dibabihe gula jatene eji, tchoira miyo kannavelela wa Yehova Mulugu waga mikuto dotumeya dedo divahiwe miyo sayi sayi.>> Mwa enne Davi ohogulaga nimburo nobubudavo jalo nne vamohi na ng'ombe dile na kobiri 50 da parata.

²⁵ Noira enne, Davi ohodowaga manga ibuwa ya mukuto wa Yehova eto ohovelelaga mikuto dotumeya na jovelela ja murendele. Mwa enne Yehova ohorumelaga yovepa ya Davi. Evale ubure watene wanna atu muIzarayeli mwatene wohomala. Kukala mazu a livuru na 2 Samuweli.