2 Samuweli 23 - Mazu Otchena a Mulungu

Mazu ogomiheda a Davi

¹ Ala ba mazu ogomiheda a mwene Davi mwana Jese. Ba mazu a Davi wenno ahambihiwe na Mulugu wa Jako ira akale mwene eto wenno ali mwinnya oimba nyumbo dapama muwari mwa Izarayeli.

² <<Munemba wa Yehova, gunawonga mwa miyo. Mazwaye anafwanyeya vamilomoni vaga.

³ Mulugu wa Izarayeli guwongile, Nibwe na Izarayeli gudiwandenle ira: <Mwene wenno unatonga na makalelo apama, mwene wenno unatonga amuovaga Mulugu

⁴ unalingana no wareya wa nzuwa nakumaga na mabebehi, zulu wahakale mirambo eto unalingana na muzongwe unameliha makupu mwilamboni ya vati.>

⁵ Eto Mulugu unaza arelihe vande vaga na makalelo anno. Mwasiwa liye uhusakanya na miyo yopangana yohomala, yokwakwanela, yolimba. Dihikana ibaribari ira liye unodikamiheda eto unodivaha jatene jinafuna miyo!

⁶ Mbwenye atu ohokana mabasa anaza kakale nnga minga dedo nnavokediwa kokolani mwasiwa kannahindiwa na manda!

⁷ Mbwenye unafuna hinda unatukula momba owu mwanango, liye dowa wutana minga dile, liye dowa tumeya na munlo!>>

Anyakondo a kopolo a mwene Davi

⁸ Ala ba mazina a anyakondo a kopolo Davi anna liye: Oroma ali mulombwana Josebe-Basebete nkuda Takemoni. Liye ali muwari mwa alombwana araru a kopolo eto ali mundimuwa wa afwaye. Liye ohotukula mwanangwaye, liye mala apana alombwana 800 kondo imohive.

⁹ Omuharela ali mulombwana Eliyazari, mwana Dodo. Dodo babaye ali Awoyi. Liye afwanyeya muwari mwa alombwana araru a kopolo a Davi. Siku nimohi aFilistewu kohomaruwaga, aliwa dowa kondoni ira kawane na aIzarayeli. Eliyazare na Davi kohapokiha aFilistewu. Evale aFilistewu kagavenyihanne kazaga, aIzarayeli kohotawaga.

¹⁰ Mbwenye Eliyazare ohodowa aporotcha aFilistewu ale ekave. Ndanda naye nohowaheyaga fiyeda umma agali na supada naye nene mmandani. Siku nenne Yehova ohavahaga gondjiha wohokala wa masika. So aIzarayeli afwaye ale kazilege liye agamanle apa aFilistewu ale, aliwa za ira katukulege jowanana janna atu okwa ale.

¹¹ Waneraru gu mulombwana Sama, mwana Aje nkuda Harari. Fwanyeya ira siku nimohi aFilistewu kohogumanelaga tatamo ya Leyi, wewo wafwanyeya munda wa bwanda pwi. Evale aIzarayeli kohatawaga aFilistewu.

¹² Mbwenye Sama ohoimelaga vari va mundole ambarelaga, liye apa aFilistewu. Yehova ohavaha gondjiha ohokala wa masika.

^13-14 Tempu yohanda iwandamelaga, muwari mwa alombwana a kopolo 30 a Izarayeli, kohokalawo alombwana araru kadowilege wafwanyeya Davi nimburo nolimba notawelamo, nifukwe na Adulawu. Mwa tempu yenne anyakondo a aFilistewu kakungilege misasa diwa ndabo na Refayina, tatamo ya Beleme.

¹⁵ Davi ohowongaga ira: <<Nnosauwela nnga mutu adivahe mahindje a isime inafwanyeya wandamelana va mulango wa Beleme!>>

¹⁶ Mwa enne alombwana araru a kopolo ale kohovenyaga, aliwa dowa xolra vakapamentoni va aFilistewu, aliwa dowa runga mahindje isime yenno yafwanyeya wandamelana va mulango wa Beleme. Mbwenye kagafiyilena mahindjale wa Davi, liye kang'wilege. Mbwenye akutulenlege vati, vamentoni va Yehova.

¹⁷ Liye ohowongaga eraga: <<<<Yehova miyo kannang'wa mahindjala! Tchoira miyo dang'wa mahindjala, inakalege nnga ding'wile sangiri na alombwana kazuzumihile vingumi diwa, kadowa karunga mahindjala kazana!>> Mwa enne liye mahindjale kang'wilege. Ti jejo jairile alombwana araru a kopolo ale.

¹⁸ Eto mulombwana Abizayi, mwana Zeruwiya Jowabe mbalaye ali mundimuwa wa anyakondo 30 a kopolo ale. Siku nimohi liye ohotukulaga mwanango waye kondoni, liye fiyeda apana atu 300. Mwa enne nzina naye nohoroma vweya kalaga nnga alombwana araru a kopolo ale.

¹⁹ Mulombwana Abizayi ule ali mutu ovweya bure muwari mwa anyakondo 30 a kopolo ale eto liye ali mundimuwa wewa. Mbwenye vweya wavweyile liye kwafiyile makalelo kavweyile alombwana araru a kopolo ale.

²⁰ Eto ohokalawo mulombwana mmohiwa aitaniwa Benaya, mwana Joyada wa sidadi ya Kabizeli. Liye ali mulombwana wa kopolo eto oirana jengo jidjindji. Liye ohapa anyakondo ambinli a kopolo a Mowabe. Liye eto ohodowa mpa podogoma mmulihani, vati vagali neve.

²¹ Benaya eto ohompa mulombwana mmohi eni nkuda Ijipitu, mulombwana mulukulu. Benaya ule annaga ikumbuzo bahi, mbwenye mulombwana owopiha ule ohokagana mwanango mmandani mwaye. Evale Benaya ohomukwivelaga, liye muwaka mwanango anna liye mmandani mwaye mule, liye mpana mwinnya.

²² Ti jejo jairile mulombwana Benaya mwana Joyada. Evale liye nzina naye novweya nnga alombwana araru a kopolo ale.

²³ Liye ali mutu ovweya bure muwari mwa anyakondo 30 a kopolo ale. Mbwenye vweya wavweyile liye kwafiyile nnga makalelo kavweyile alombwana araru a kopolo ale. Davi ohomutukula, liye muhela kala musogolrelri wa agwarda aye anno kamuing'aneletcha.

Mazina a atu amohiwa kafwanyeya muwari mwa nikuru na 30

²⁴ Muwari mwa nikuru naitaniwa 30, alombwana kalimo ba ala: Azayeli wenno ali Jowabe mbalaye, mulombwana Eliyanani mwana Dodo wa sidadi ya Beleme,

²⁵ mulombwana Sama na mulombwana Elika, akuda Harodi;

²⁶ Helezi nkuda Palti, Ira mwana Ikesi nkuda Tekowa;

²⁷ Abiyezeri nkuda Anatoti, Mebunayi nkuda Husati;

²⁸ Zalimomi nkuda Awoyi, Marayi nkuda Netofa;

²⁹ Helebe mwana Bana nkuda Netofa, Itayi mwana Ribayi wa sidadi ya Jibeya, sidadi ya nlogo na Benjami.

³⁰ Benaya nkuda Piratoni, Hidayi wa mwana muhindje wa Gaji;

³¹ Abi-Albomi nkuda Ariba, Azimavete nkuda Bawurimi;

³² Eliyaba nkuda Saliboni, na ana Jazeni, na Jonata;

³³ Sama nkuda Harari, Ayawu mwana Sarari nkuda Arari;

³⁴ Elifeleti mwana Akajibayi, (Akajibayi babaye ali nkuda Makate), Eliya mwana Ayitofeli nkuda Jiloni;

³⁵ Hezarayi nkuda Karimele, Parayi nkuda Aribi;

³⁶ Igali mwana Nata, wa sidadi ya Zoba, Bani nkuda Gadi;

³⁷ Zeleki nkuda Amoni, Narayi nkuda Beroti wenno atukuletcha jowanana ja Jowabe mwana Zeruwiya;

³⁸ mulombwana Ira na mulombwana Garebe, akuda Itira;

³⁹ Mulombwana Uriya nkuda Eti. Gumaniha atenene kali alombwana 37.