2 Samuweli 22 - Mazu Otchena a Mulungu

Davi ohomutamalela Yehova zela agondjiha amwidanaye

¹ Davi siku namuwombonle Yehova mmandani mwa amwidanaye atene eto mmandani mwa Sawuli, ohomuimbela Yehova nyumbo ila eraga:

² Yehova gu nibwe naga, gu nimburo naga notawelamo eto gu maliba divunela!

³ Yehova gu Mulugu waga, gu nibwe naga. Miyo nnatawela mwa liye. Liye gu defeza yaga eto gu kopolo dodivulusa, liye gu votawela vaga volimba eto liye gu nimburo naga notawelamo! Yehova gu Nvulusi waga. Nyo Yehova munowanda divunela muubureni mwatene!

⁴ Miyo nnerege uvepani nyo Yehova, tchoira nyo muli ofwanela tamaleliwa. Mwa eno, miyo nnokala ovuneya mwa amwidanaga atene!

⁵ Ukwa wohodirindja nnga mahindje omanganyeya a mbara! Eto dafuna dilrowe, ditolowe muwari mwa mwana muhindje otamanga.

⁶ Mingohi da Nimburo na Anokwa dohodihinda eto maratuwero a ukwa kohodimanga!

⁷ Mbwenye miyo mmakatamihoni mwali miyo dohomuitana Yehova. Miyo dohomuitana Mulugu waga ira adikamihede. Liye uhuvwa nizu naga muNyumbani munafwanyeya liye. Kuwa waga wohofiya baruni waye!

⁸ Evale ilambo ya vati yohotekenyeya, aliwa roma berimaga. Eto maaliserisi a ilambo ya zulu kohongurumela eto kohorendeya na mwasa oira Yehova ohotakaleliwa valukulu!

⁹ Utchi ohokuma mpunoni mwaye eto wanoni waye wohokuma munlo otolotcha. Makalra ohinda kohokuma mwa liye!

¹⁰ Liye ohula zulu eto ohotita na mirambo dodiba mendoni waye!

¹¹ Liye ohovava unduli wa akerubi eto ohooneya agagwenle mapepelo a nipevo!

¹² Yehova ohomala vikunela na isi ilukulu. Mirambo domanganyeya, dozaleliwa mahindje, dohomuwerewera!

¹³ Muwari momoneya wanna liye, kohojerimaga makalra a munlo!

¹⁴ Noira eno, Yehova ohoruma nnga ndari zulu eto Wenno Ukwaranyile Jatene ohovweyiha nizu naye!

¹⁵ Liye ohovoka mafumo aye, liye amwadana amwidanaye atene eto ohorumiha jerima eto ohagondjiha!

¹⁶ Muwari mosumulula wa Yehova eto muwari mwa mwelra wavumile liye bahi, pazile oneya vati va bara eto maaliserisi a ilambo ya vati pivuhuleyile atu kaoneya!

¹⁷ Yehova ohotapula muwono waye kumela zulu, liye dihideda, dikumihavo vari va mahindje madjindji vafwanyeya miyo!

¹⁸ Yehova ohodiwombola mmandani mwa mwidani waga wa kopolo, na mmandani mwa ale kadiharahara. Mwasiwa aliwa kali olimba dikwaranya miyo.

¹⁹ Miyo dagali mmakatamihoni, aliwa kohodifwanya. Mbwenye Yehova ohodibarela.

²⁰ Yehova ohodikumiha mwali miyo, dihiya nimburo na murendele. Liye uhudiwombola mwasiwa unodiziveliwa.

²¹ Yehova udiirela upama na mwasa wa upama waga. Eto uhudivaha jotambilra jaga mwasiwa mandaga kitakanle.

²² Tchoira miyo nnoharetcha ndila da Yehova eto miyo kannasakanye yabure dimuhiyaga Mulugu waga.

²³ Miyo nnokwakwanelihedetcha jofuna jaye jatene eto miyo kannahiye mangano aye!

²⁴ Eto miyo kadiirilena yabure vamentoni vaye eto miyo nnakaletchave olapela wene na jabure.

²⁵ Yehova uditambilriha zela upama waga eto na mwasa oira miyo dili mutu ohokana yabure vamentoni vaye!

²⁶ Nyo muli ororomeleya wa atu anno anafwanyeya kagali ororomeleya eto muli okwakwanela zela atu anne ali okwakwanela.

²⁷ Nyo muli otchena zela atu anne ali otchena eto muli orutcha wa atu anne ali abure.

²⁸ Nyo munoavunela atu anne anaviyeviha, mbwenye meso enyu anaaing'ana atu ovitukulela ira mwaatitihe.

²⁹ Nyo Yehova muli panti yaga! Nyo Yehova munomoneya isi inafwanyeyana miyo!

³⁰ Nyo munodivaha kopolo ira dagalive meka, diwande wana na nikuru nompumbula na amwidanaga! Eto muwari mwa kopolo da Mulugu waga, nnowanda lupa muru vazulu viwa, miyo dowa morela pandi ya ule!

³¹ Ndila ya Mulugu tchi ndila yapama. Eto Mazu a Yehova bokwakwanela. Liye gu defeza para atu anne anatawela mwa liye.

³² Kodi uli Mulugu bani ahali Yehova? Eto uli nibwe bani ahali Mulugu wehu?

³³ Mulugu gu nimburo naga nolimba notawelamo eto gu kopolo daga eto liye unosakanyeda ira ndila daga dikale dofwanela vamentoni vaye.

³⁴ Liye usakanya ira mendo daga dikale nnga mendo da nase. Liye uhudiimetcha pama mamburo otama.

³⁵ Liye unoterenariha mandaga ira dadowa kondoni, diwandege tambula urwa nosakanyiwa na mukuwa.

³⁶ Nyo muhudivaha defeza yovulusa wenyu. Dikamiheda wenyu uhuwanda dikaliha mutu olimba.

³⁷ Nyo muhurambalaliha ndila yaga ira manyalo aga kahateredeye.

³⁸ Miyo dihiwanda ahara amwidanaga ante miyo fiyeda agondjiha. Miyo kadawelenle mundulri fiyeda atolotcha.

³⁹ Miyo dohatolotcha eto dohawamba ira kahawande venya akoka. Aliwa kogwela vamanyaloni vaga.

⁴⁰ Nyo muhudivaha kopolo dowanana kondoni eto muhusakanya ira ale anavenya ira kawane na miyo kaze kaririyele vati, manyaloni waga.

⁴¹ Nyo muhusakanya ira amwidani aga kaditawe eto miyo dahatolotcha ale kadiidile.

⁴² Aliwa kohodowa avepaga afwiwa ira kaakamihede, mbwenye kalivo aavunenle. Noira eno, kohomukuwela Yehova, mbwenye liye karumenle.

⁴³ Mwa enne miyo dohatchila ante aliwa fiyeda kala nnga tumbulru na vati. Eto dohatchakatcha nnga madogo a murampani.

⁴⁴ Nyo muhuwanda divunela mmaduguduguni mwali miyo na mulogo waga eto muhuwanda divaha ira dikale mwene wa malogo oindjivene. Atu dahaaiziwile miyo voroma vene, peno anadilaba miyo.

⁴⁵ Atu oza okumela vilambo dimohi kohoza dikokorela miyo eto kagavwile nizu naga, kohodivwelela mobaranya.

⁴⁶ Atu oza mirima diwa dohomala nyungulruwa, aliwa roma kumamo nyumba dolimba mwavitanle atu, kangurumelaga.

⁴⁷ Yehova ukalawo! Otamaleliwa akale wenno unafwanyeya agali nibwe naga! Eto oteteliwa akale Mulugu waga wenno unafwanyeya agali nibwe nodivulusa.

⁴⁸ Liye unafwanyeya agali Mulugu wenno unaaweliheda kunyakunya amwidanaga eto unaahela atu atene vati va umwene waga.

⁴⁹ Liye gudikumihilevo vari va amwidanaga. Nyo muhudivweyiha vari va atu anne kadiharahara. Nyo muhuwanda divunela mmandani mwa alombwana opa.

⁵⁰ Na mwasa wenno Yehova miyo nnoutamalelani vari va malogo eto nnoimba nyumbo dotamalela nzina nenyu!

⁵¹ Mulugu gunanvaha gondjiha ulukulu mwene waye eto unomuoniha upama waye mutu wenne umusakunlre liye, wenno unafwanyeya agali Davi vamohi na ahimaye atene, malambo a mukalakala.