2 Samuweli 19 - Mazu Otchena a Mulungu

Jowabe ohomusumulula Davi

¹ Noira enne, mulombwana Jowabe ohowandeliwa ira: <<Mwene Davi uhutomola kuto, amukumbanyaga mwanaye Abisalawu.>>

² Na mwasa wenne, anyakondo a mwene Davi kagavwile ira: <<Mwene Davi unamunlela mwanaye!>>, teyela wannaga atu zela agondjiha amwidani wohotchindjeyaga, aliwa kala kumbanya.

³ Evale anyakondo atene kohovolowaga musidadi mule mozemba nnga vini mutu agondjihiwa kondoni, akala onyaswene.

⁴ Eto mwene Davi ohokalaga okunelene murwaye, anlaga eraga: <<Mwanaga Abisalawu! Mwanaga, mwanaga Abisalawu!>>

⁵ Evale mulombwana Jowabe agavwile enne, mwene Davi agalive mmba mwemule anlaga, ohozaga liye volowa nyumba yafwanyeyaga mwene Davi, liye roma wonga eraga: <<Isakanyile nyo peno muhanyaswiha atwinyu atene, anno kauwombonleni peno ingumi yenyu, kaawombonle ahiminyu a ahiyana na a alombwana, na ahiyaninyu vamohi na amwendinyu.

⁶ Nyo munaaziveliwa ale anauidani eto munaaida ale anauziveliwani! Tchoira muhumala oniha ira asogolrelri enyu na anamalabinyu atene kinna mabasa para nyo! Tchoira miyo peno dihikana ibaribari ira ahakanlege mwaninyu Abisalawu akalawo, hiyo atene nimala kwa, mogoziveliwa!

⁷ Kavenyani, mukume, mudowe unde, muwonge mazu apama na atwinyu. Mwasiwa miyo nnolumbela na nzina na Yehova ira nyo mwahakume, mahiyu anna kanakalavo nne mutu mmohi unafuna kala na nyo. Eto jaireya eno jinakala jengo josimbwa takala kwaranya makatamiho matene muonne nyo romela uzombweni wenyu fiyeda peno!>>

⁸ Mwa enne mwene Davi ohovenyaga, liye dowa garati va mulango wa sidadi. Noira enne, atu atene kohowandeliwa ira: <<Mwene uhukuma ugarati va mulango.>> Kagavwile enne, atene kohomaruwaga, aliwa dowa vivelela vamentoni va mwene. Fwanyeya ira aIzarayeli atene kamuhara mulombwana Abisalawu kohotawaga, kada mutu liye dowa kala vande vaye.

AIzarayeli atene kohowelela funa ira Davi akale mwene wewa

⁹ Mwa enne malogo matene a Izarayeli kohoroma gudulana oka oka keraga: <<Mwene Davi gunikumihile mmandani mwa amwidanihu eto guniwombonle mmandani mwa aFilistewu. Eto peno utawile mwilamboni mwihu muno na mwasa oira amutawa mwanaye Abisalawu.

¹⁰ Eto Abisalawu wenno namuhambihile hiyo oka uhukwa kondoni! Nnga nikalele nni omiyalene nahamuwelihaniwo mwene wehu ira aze anitongege akoka?>>

¹¹ Mbwenye akuda Izarayeli kawongaga eno, akuda Juda kereve garati jiwa. Evale Davi ohorumiha milanyo na mulombwana Zadoki na Abiyatare anno kali anamakuta eraga: <<Miyo nnafuna nyo ambinli muvenye, mwaagumanihe andimuwa andimuwa a Juda, mwaawandele, muire: <Kodi mwasiwa gwa nni munafunela nyo kala ogomiheda muzela mwene wenyu ira awelele vande vaye? Mwasiwa mazu matene anawonga aIzarayeli kohomala difwanya.

¹² Tchoira nyo muli abalaga, muli makuva aga, muli maningo aga. Nnga mwasiwa gwa nni munafunela nyo kala ogomiheda dizela miyo mwene wenyu?> >>

¹³ Eto noira enne, Davi ohawandelaga anamakuta amohive anne eraga: <<Mudowe eto mwamuwandele mulombwana Amasa muire: <Kodi weyo Amasa kuli makuva aga na maningo aga? Miyo nnolumbela na nzina na Yehova ira weyo unokala musogolrelri mundimuwa wa anyakondo aga kuma peno dowaga sogolro vamalroni va mulombwana Jowabe! Miyo dahairena eno mbwenye Mulugu aditonge na makalelo anafuna liye!> >>

¹⁴ Mwa enne Davi ohowanda ganyalri mirima da alombwana atene a Juda. Noira eno, aliwa kohorumihaga milanyo wa Davi ira: <<Mwene Davi hiyo nnafuna muwele vamohi na atwinyu atene.>>

¹⁵ Evale Davi agavwile mazwale, ohowelaga afiyaga muhindje Jordawu. Noira eno, nlogo natene na Juda kohozaga Jiligali ira kagumane na mwene Davi, kamulambutche muhindje Jordawu.

Davi ohomulevelela mulombwana Simeyi

¹⁶ Mwa tempu yaza alombwana a Juda ira kagumane na mwene Davi, mulombwana Simeyi mwana Jera nkuda Bawurimi, wa nlogo na Benjami na liyene ohozaga mobaranya vamohi na aliwa.

¹⁷ Liye azaga, ohoza vamohi na alombwana 1.000 a nlogo na Benjami ira kamukamihede lambuwa. Fwanyeya ira Ziba wenno ali namalaba wa Sawuli na liyene ohozaga na ahimayene a anapongwe 15, vamohi na anamalabaye 20. Aliwa kohozaga muhindje Jordawu mobaranya sogolro wa mwene Davi.

¹⁸ Evale aliwa koholambuwaga valambuwetcha atu, kamuharelaga mwene Davi ira kamukamihede eto kaalambutche alombwana kafwanyeya vamohi na liye eto ira kairena yengo ili yatene yafuna mwene. Evale mwene Davi afunaga jolambuwa muhindje Jordawu, mulombwana Simeyi mwana Jera gwaligi murandji, liye maruwa dowa mukokorela mwene Davi eraga:

¹⁹ <<Mbwiyeni miyo nnauvepani ira mudikurumuwele zela yabure yauireleni miyo siku mwakumaga nyo Jeruzalemu. Mudiwale zela yenno yasakanyile miyo, nne kamuumbuweleve akoka!

²⁰ Miyo dihiiziwa ira dihitega. Nona muwari mwa aIzarayeli, dili murandji za gumana na nyo mbwiyeni so mwene.>>

²¹ Evale mulombwana Abizayi wenno mmaye ali Zeruwiya ohowonga eraga: <<Mbwiyeni, kodi mulombwana Simeyi ula kafwanenle kwa na mwasa omutembelrelra mwene wenno uhambihiwe na Yehova?>>

²² Mbwenye Davi ohomusumululaga eraga: <<Miyo kadinna pandi na nyo ana Zeruwiya. Nnga mwasiwa gwa nni nyo funaga kala amwidanaga? Miyo peno dili mwene wa Izarayeli, nona peno kalivo muIzarayeli unafuna kwa!>>

²³ Noira enne, mwene Davi ohomuwandelaga mulombwana Simeyi alumbelaga eraga: <<Miyo nnolumbela ira weyo mulombwana Simeyi kunakwa!>>

Davi ohovenyiha wandana waye na Mefibozeti

²⁴ Mwa tempu yenne mulombwana Mefibozeti, muzula wa Sawuli, na liyene ohodowaga ira agumane na mwene Davi. Fwanyeya ira romela siku nakumilegemo mwene Davi musidadi mule fiyeda siku nenne, liye nne kahuwile mendo daye nne kasatile ndevu, nne jowara jaye kafulrile.

²⁵ Mwa enne agakumile Jeruzalemu ira agumane na mwene Davi, Davi agagumanne na liye, ohonfukaga eraga: <<Mefibozeti, kodi mwasiwa ali wa nni uza wahadiharaga?>>

²⁶ Liye ohowakula, liye ira: <<Mbwiyeni so mwene, nyo muhuiziwa ira miyo dili mutu orangala. Siku namaruwaga nyo mudowaga, miyo dohomuruma namalaba waga Ziba ira ahele yogaratela vaburuni vaga, amala eno digwelevo ira duharegeni. Mbwenye namalabagole gwadinyengile.

²⁷ Eto liye agazile, agaufwanyileni, uhuwonga jonama jaye jaiziwile liye wa nyo mbwiyeni so mwene. Nyo mbwenye muli nnga mungelro wa Mulugu. Malringana muirena nnga munaonela nyo mbwiyeni so mwene!

²⁸ Tchoira abali atene a babaga kohofwanela ira mwaape na ubure watene wanna atu zela nyo, mbwenye nyo mbwiyeni kamuirilena, muhuwanda divaha miyo upama, miyo djaga meza imohive na nyo. Miyo eto kadinnamo ira nnouvepani yengo imohiwa nyo so mwene!>>

²⁹ Evale mwene ohowakulaga eraga: <<Kuwonge yengo imohiwa. Tchoira miyo dihimala tonga ira tereno ya Sawuli, mugane weyo vamohi na namalaba wawo Ziba.>>

³⁰ Evale Mefibozeti ohowonga na Davi eraga: <<Mbwiyeni, nyo podi nvaha Ziba tereno yatene. Voira nyo mwene muhuwelela vande mwa murendele, para miyo yenno ikwakwana!>>

Davi ohomuweliheda Barizilayi upama wamuirele liye

³¹ Eto mulombwana Barizilayi nkuda Jileyadi ohokuma sidadi ya Rojelimi, liye za nkamiheda mwene Davi lambuwa muhindje Jordawu.

³² Mulombwana Barizilayi eto ali mundimuwa oulula, anna yaka 80. Liye ali mutu orayela bure. Fwanyeya ira mwene Davi agali Mahanayimi, liye ohonvaha jodja.

³³ Evale mwene Davi ohomuwongagana mulombwana Barizilayi eraga: <<Nidowege vamohi Jeruzalemu ira wakalege vamohi na miyo wewo!>>

³⁴ Mbwenye mulombwana Barizilayi ohomuwakulaga mwene Davi eraga: <<Miyo dihanlena malambo a vang'onove bahi ira ingumi yaga imale. Nnga mwasiwa gwa nni unauharelegeni miyo Jeruzalemu?

³⁵ Tchoira miyo peno dinna yaka 80. Miyo kannawanda hiyanihavo joziva na johoziva ja mwilamboni. Masiki miyo dadjaga joziva nne dang'waga, kannaonamo ziva uwa. Nyo podi kana alombwana nari ahiyana oimba pama, miyo joimba jiwa kannavwamove yengo. Nnga mwasiwa gwa nni nnaukukumulegeni miyo mbwiyeni so mwene?

³⁶ Miyo kadilabile yengo yofwanela nyo diirela upama watene wenno. So nnafuna duharegeni ante kombela ya ule ya muhindjola.

³⁷ Mudihiye ira diwelele sidadi inakala miyo ira dakwele wewo, dikoyiwe masiye wewo unafwanyeya babaga na mmaga. So mbwenye namalaba wenyu Kima, liyene gunafuna uharani mbwiyeni so mwene. Liye mbwenye nyo podi muirela nnga mwemo munafune nyo.>>

³⁸ Evale mwene Davi ohowakulaga eraga: <<Kima unadowege vamohi na miyo wewo unayege miyo. Miyo nnomuirela makalelo matene ouzivelani. Eto yengo ili yatene inafune nyo nnga miyo dimuirele, miyo nnomuirela!>>

³⁹ Evale atu atene kagamanle lambuwa muhindje Jordawu eto mwene Davi agalambuwile, ohombejarigi mulombwana Barizilayi eto ohomurelihaga. Noira eno, mulombwana Barizilayi ohowelelaga waniwa.

⁴⁰ Kuma evale mwene Davi ohovenyaga aviraga Jiligali vamohi na mulombwana Kima. Evale Davi adowaga, atu atene a nlogo na Juda vamohi na atu a vang'ono a Izarayeli kohonvelela.

Atu a nlogo na Juda kokangana na aIzarayeli

⁴¹ Noira enne, alombwana atene a Izarayeli kohozaga, aliwa nfwanya mwene Davi, aliwa ira: <<Kodi mwasiwa gwa nni abalihu a Juda kaubagani, kauwambutchagani nyo mwene muhindje Jordawu vamohi na atwinyu atene na vande venyu?>>

⁴² Evale alombwana atene a Juda kohawakulaga aIzarayeli ale keraga: <<Hiyo niza nisakanyaga eno mwasiwa goira mwene Davi gwa nlogo nihu! Nnga vevo vihikala mwasa ofunela ira nyo mukukumuwegena? Tchoira eto hiyo kanimanle jengo ja mwene, nne liye kanivahile yengo ili yatene!>>

⁴³ Evale alombwana a Izarayeli ale kohawakulaga alombwana a Juda ale keraga: <<Hiyo nili malogo kumi vamohi na mwene. Nyo mbwenye muli nlogo nimohi bahi. Eto nyo kamunfunne Davi kala mwene nnga hiyo! Nnga mwasiwa gwa nni nyo nilramwisaga? Tchoira hiyo guli arandji za muwongana mwene ira awele hiyaniha na nyo!>> Evale aliwa kohokalelagave kangana. Mbwenye alombwana a Juda basimbwile limba muwari mwa jowonga jiwa.