2 Samuweli 14 - Mazu Otchena a Mulungu

Jowabe ohosakanyeda makalelo ira Abisalawu awelele Jeruzalemu

¹ Mulombwana Jowabe mwana Zeruwiya ohoonaga ira: <<Eni mwene Davi vano mmirimani mwaye ukana musauwela mwanaye Abisalawu.>>

² Mwa enne Jowabe oharumaga atu, aliwa mudowela muhiyana mmohi okana zelru afwanyeya ilambo ya Tekowa. Muhiyanole agazile, mulombwana Jowabe ohomuwandelaga eraga: <<Ukale nnga mutu ukweliwe, umanle malambo madjindji akumbanyaga. Uware jowara ja umakwele, nne kuvizolihe makura.

³ Waira eno uvenye, udowe, wawonge na mwene Davi. Waire eni, eni, eni.>> Evale ohomala muwandelamo jatene jafuna liye wonga.

⁴ Evale mwana muhiyana wa Tekowa ule ohodowa vamentoni va mwene Davi. Aganfwanyile mwene Davi, ohomukokorelaga afiyihaga kove yaye vati. Evale ohoromaga wonga eraga: <<Miyo so mwene nnouvepani ira mudivulumutche.>>

⁵ Evale Davi ohonfuka muhiyanole, liye ira: <<Makatamiho bavi anafwanyeyana we?>> Muhiyanole ohoromaga muwandelamo eraga: <<Miyo dili makwele, mamunaga gukwile.

⁶ Miyo namalaba wenyu danna ahima ambinli a anapongwe. Mwa enne siku nimohi, ahimale kohovenyaga, aliwa dowa minda. Kagadowile minda ule kohoroma wana. Wana wawanaga atu ule, voira kalivo mutu aahiyihedile, mwana mmohi ohofiyeda mporotcha nfwaye ante liye fiyeda mpa.

⁷ Evale mwana mmohi agampile nfwayele, abalaga amohiwa kohoza, aliwa difwanya, atu kwi: <Nnafuna univahede mwana umpile nfwaye ule ira na hiyene nimpe, niwelihe mangawa zela mbalaye wenno umpile liye!> Fwanyeya ira aliwa anafuna kampe mwana mmohive wenno unafuna halana jatene miyo dagakwile. Aliwa anafuna katimihe nikalra naga nogomiheda nihanle ira hiyo atene nakwa, nzina na babaye nigomele dimela mwilamboni.>>

⁸ Evale mwene Davi ohomuwakulaga muhiyanole eraga: <<Venya udowege waninyu. Miyo nnoaruma atu ira kadowe kasakanyede jatene jiwongile we!>>

⁹ Evale mwana muhiyana wa Tekowa ule ohomuwakulaga mwene Davi eraga: <<Mbwiyeni so mwene miyo vamohi na abalaga nnorumelela mulandu uli watene unafuna uzelani. Mbwenye nyo vamohi na umwene wenyu watene kamunakana mulandu!>>

¹⁰ Evale mwene Davi ohomuwandelaga muhiyanole eraga: <<Miyo nnoirana yenno iwongile we. Eto wadowa vande mutu wenne unavenye aza aukukumulaga akoka na mazu anno, umuzena uno! Umuzanave uno, miyo nnomulaba ira ahawelele ukukumula akoka.>>

¹¹ Noira enne, muhiyanole ohowelela wonga na mwene Davi eraga: <<Miyo so mwene nnouvepani ira nyo munvepe Yehova Mulugu wenyu ira abalaga anno anafuna jomuweliheda kunyakunya mwanaga mmohi wenno umpile mbalaye ule, kahawande irana yenno inafuna atu irana eto mwanaga ahakwe.>> Evale mwene Davi ohomuwakulaga eraga: <<Miyo nnawonga vamentoni va Yehova okalawo ira kalivo unafuna moriheda vati nne nsisi naye nimohi.>>

¹² Evale muhiyanole ohowongagave na Davi eraga: <<Nnouvepani ira mudirumelihe miyo namalaba wenyu diwonge mbwiyeni so mwene!>> Evale Davi ohoiraga: <<Kawonga.>>

¹³ Evale muhiyanole ohowongaga na mwene Davi eraga: <<Nnga mwasiwa gwa nni mwahasakanyaga mulogo wa Mulugu na makalelo nnga munadirumela nyo yovepa yaga peno va? Tchoira nyo mwadirumelaga mazu aga peno va eni, munavimanga mulandu. Mwasiwa nyo muhuwanda mukonda mwaninyu ombala ira awelele vande vinyu, wenno atawile.

¹⁴ Tchoira hiyo atene nnaing'anela kwa. Eto ingumi yehu inakala nnga mahindje obomeliwa vati. Mahindje kabomeliwa vati, kinawelela vigumaniha kakala mahindje akoka. Tchoira Mulugu kanamuwaka mutu ingumi burebure. Mbwenye unosakanya makalelo ira wenno utamangihiwe awelele wewo utamangihiwe liye.

¹⁵ Miyo para za wa nyo mbwiyeni so mwene duvepagani eni, miyo daaova ale kafuna jompa mwanaga. Pa evale vavenyile miyo diira: <Nnafuna didowe wa mwene Davi, damuwandelemo makatamiho anafwanyeyana miyo, afwase liye podi irana inavepa miyo.>

¹⁶ Dabalra ira: <Dagamuwandenlemo mwene, liye unovwa yovepa yaga, adiwombole miyo vamohi na mwanaga mmandani mwa atu anno anafuna nidimeliha muwari mwa ilambo yenno Mulugu univahile liye.>

¹⁷ Miyo eto daumbuwela ira: <Inafuna wonga mbwiyaga mwene, inodizeliha murendele.> Tchoira miyo dihiiziwa ira nyo mbwiyeni so mwene muli nnga mungelro wa Mulugu eto nyo munowanda iziwa upama na ubure. Yehova Mulugu wenyu akale na nyo.>>

¹⁸ Evale mwene Davi ohowongaga na muhiyanole eraga: <<Miyo nnafuna dufuke weyo ira udiwandele ibaribari, nne kudikuwe.>> Muhiyanole ohowakulaga, liye ira: <<Kawongani mbwiyeni so mwene!>>

¹⁹ Noira enne, mwene Davi ohonfukaga eraga: <<Kodi jatene jinawonga we jo uurumile kahi mulombwana Jowabe ira uze uwonge?>> Evale muhiyanole ohowakulaga ira: <<He, nnowonga vamentoni venyu mbwiyeni so mwene ira kalivo unawanda peruwa ahiyaga inawonga nyo mbwiyeni. Mwasiwa na ibaribari nnga munawongela nyo mwemo mbwiyeni so mwene, mulombwana Jowabe namalaba wenyu gudirumile ira dize diwonge na nyo eto liyene gudiwandenle jatene jinawonga miyo.

²⁰ Eto liye aza adiwandelaga jatene jejo ira dize diwonge na nyo, ali ira jengo jitchindjeye. Nyo mbwiyeni muhukana zelru nnga mungelro wa Mulugu, muhuiziwa jatene jinaireya mwilamboni ya vati.>>

Abisalawu ohowelela Jeruzalemu

²¹ Evale mwene ohowonga na Jowabe eraga: <<Miyo nnoirana mazu matene avepile we. Venya umudowele mwanaga Abisalawu!>>

²² Evale mulombwana Jowabe ohodowaga, liye mukokorela mwene Davi aoramihedaga kove yaye vati, liye mureliha mwene eraga: <<Miyo peno dihiiziwa ira nyo mbwiyeni so mwene mudifwewela murima. Tchoira nyo muhurumela yovepa yaga, miyo namalaba wenyu.>>

²³ Noira enne, mulombwana Jowabe ohomaruwaga, liye dowa ilambo ya Jesuri, mutukula mulombwana Abisalawu, muzana sidadi ya Jeruzalemu.

²⁴ Abisalawu agafiyile Jeruzalemu, Davi ohokumiha mazu oira: <<Liye kaze vamentoni vaga. So adowe akale vande vaye.>> Noira enne, mulombwana Abisalawu ohodowaga, liye roma kalaga vande vaye eto kadowile vamentoni va mwene.

Davi ohogumana na mwanaye Abisalawu

²⁵ Fwanyeya ira muwari mwa ilambo yatene ya Izarayeli kafwanyeyamo mulombwana oriyetchetcha kwaranya mulombwana Abisalawu. Liye ali mutu oriya maningo matene, romela vati va vanyalo ante muruni, nne kaanna yano yotakala.

²⁶ Eto liye nsisi naye nali nlukulu. Magomelo wa kada yaka, liye osatetcha nsisi naye nne, mwasiwa nomunyemela. Asata, nsisi nne, apima nyemela uwa, nanyemela kilu mbinli, molingana na kilu yafuna mwene ira atu kalabegena.

²⁷ Abisalawu eto aabanle ahima araru anapongwe ve na mwana mmohi wa muhiyana oriyetchetcha wenno aitaniwa Tamari.

²⁸ Abisalawu ohomala Jeruzalemu ule yaka mbinli dompumbula ahagumanaga na babaye Davi.

²⁹ Mwa enne ohomuitanihaga mulombwana Jowabe ira aze, katapanye makalelo oira liye agumane na babaye. Agamuitanne enne, mulombwana Jowabe kadowilegewo. Noira enne, ohomuitaniha fendo yanembinli eto kadowilewo.

³⁰ Evale mulombwana Abisalawu oharuma anamalabaye ira: <<Kavwani pama! Munda wa mulombwana Jowabe usakanyile madilre na miyo eto liye uzanlemo sevada. Eni nyo muvenye mudowe mwatumeye munda watene!>> Evale anamalaba ale kohodowaga, aliwa mala tumeya munda wa mulombwana Jowabe.

³¹ Mwa enne mulombwana Jowabe agaonne ira: <<Mundaga uhuja>>, ohovenyaga, liye dowa nfwanya mulombwana Abisalawu vande vaye, liye nfuka ira: <<Kodi mwasiwa gwa nni anamalabawo katumeyele atu mundaga?>>

³² Abisalawu ohomuwakula Jowabe ira: <<Miyo dohourumiheda milanyo ira uze uno. Tchoira miyo dafuna durume ira udowe wa mwene eto weyo kuzilewo. Miyo duitanihaga ali ira durume udowe wa mwene, wawonge ira: <Mwanawo Abisalawu unafuka ira kodi mwasiwa gwa nni mudiwelihagawo ilambo ya Jesuri? Yali yapama mwahadihiyilege dikalaga wewule!> Nona miyo nnafuna didowe vamentoni va mwene damwinnya, liye adifwanyana yabure, aire dipa wene.>>

³³ Mwa enne mulombwana Jowabe ohodowa wa mwene Davi, liye muwandelamo jatene jawongile Abisalawu. Davi agavwile, ohomuitaniha mwanaye ule ira kagumane. Kagagumanne, Abisalawu ohomukokorela mwene, aoramihedaga kove yaye vati. Evale mwene Davi ohombejarigi Abisalawu.